پرەزيدەنت ن.نازارباەۆتىڭ « ۇلى دالانىڭ جەتى قىرى» اتتى ماقالاسى موڭعوليانىڭ "نەەلتتەي حاالگا / اشىق ەسىك" گازەتىندە جاريالاندى.
باعدارلامالىق ماقالانىڭ تولىق ءماتىنى ۇلانباتىردا شىعاتىن موڭعوليا زيالى قاۋىمىنىڭ ءۇنى "نەەلتتەي حاالگا / اشىق ەسىك" ("Open door" 7-14. 2018. N48) اتتى گازەتىنىڭ 7 جەلتوقسان كۇنگى سانىندا جارىق كوردى. ماقالا ەلباسىنىڭ جانە قازاق تاريحىنىڭ ەتنوگرافياسىنان حابار بەرەتىن باعالى كەسكىندەرمەن اسەم بەزەندىرىلىپ, گازەتتىڭ ءۇش بەتىنەن ورىن العان. ماقالاعا رەداكتسيا تاراپىنان جازعان اڭداتپادا «قازاقستان رەسپۋبليكاسىنىڭ پرەزيدەنتى ن.نازارباەۆتىڭ « ۇلى دالانىڭ جەتى قىرى» اتتى بۇل كولەمدى ماقالاسى ونىڭ وتكەن جىلى جازعان «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنىڭ جالعاسى ىسپەتتى. ەجەلگى زاماننان كورشىلەس ءومىر ءسۇرىپ, تاريحى, تۇرمىس-تىرشىلىگى, سالت-ءداستۇرى ورتاق جەلىلەس بولعان قازاق ەلىنىڭ پرەزيدەنتىنىڭ بۇل تەرەڭ ماعىنالى ماقالاسىن قالىڭ وقىرمان قاۋىمنىڭ نازارىنا ۇسىنامىز» دەگەن.
كوشپەندىلەردىڭ مۋزەيلىك قۇندىلىقتارى مەن مۇراسىن ورتاق زەرتتەۋگە بۇل يدەيانىڭ سەرپىن مەن سەنىم بەرەتىنىن موڭعوليانىڭ ۇلتتىق مۋزەيىنىڭ ديرەكتورى, تاريح عىلىمدارىنىڭ دوكتورى د.ءسۇحبااتار مىرزا «كوشپەندىلەر وركەنيەتىنىڭ كوكجيەگىن كەڭەيتكەن» دەگەن بولاتىن «ەگەمەن قازاقستان» گازەتىندە جاريالانعان پىكىرىندە.
جالپى, پرەزيدەنت ن.نازارباەۆتىڭ « ۇلى دالانىڭ جەتى قىرى» اتتى ماقالاسى موڭعوليانىڭ «mongolcom.mn» ۇلتتىق پورتالىندا, «مونگول زامان» گازەتى (5.12.2018) سەكىلدى ءباسپاسوز قۇرالدارىندا جاريالانىپ, وقىرمانداردىڭ تەرەڭ قىزىعۋشىلىعى مەن ويتالقىسىنا يە بولدى.
دايىنداعان اقەدىل تويشان ۇلى,
موڭعوليانىڭ قازاقستانداعى مادەنيەت ەلشىسى