بوكەي ورداسى اۋدانى تابيعي گازبەن تولىق قامتىلدى

بيىل بوكەي ورداسى اۋدانىنىڭ 12 اۋىلىنا, جالپى 6550 تۇرعىنى بار 1151 ءۇي مەن 35 الەۋمەتتىك نىسانعا گاز قۇبىرىن تارتۋ ءۇشىن باتىس قازاقستان وبلىستىق بيۋدجەتىنەن 213 ملن. 511 مىڭ تەڭگە بولىنگەن ەدى. ايتا كەتەيىك, ورال قالاسىنان 500-600 شاقىرىم قاشىقتا جاتقان بوكەي ورداسى اۋدانىندا 7 اۋىلدىق وكرۋگ, 22 ەلدى مەكەن بار. تابيعي گاز وكرۋگ ورتالىقتارى عانا ەمەس, شاعىن اۋىلدارعا – بۇرىنعى بولىمشەلەرگە دە تارتىلىپ جاتىر.

- اۋدان ورتالىعى سايحىن سەلوسىنان ەڭ شالعاي جاتقان ءبىزدىڭ ۇيالى اۋىلىندا 215 ءۇي بار. ءبىز بۇل كۇندى اسىعا كۇتتىك. سەكسەنگە جۋىق اۋىل تۇرعىنى ۇيلەرىنە تابيعي گاز كىرگىزۋگە دايىن وتىر. قازىرگى تاڭدا 72 ءۇيدىڭ قۇجاتى تاپسىرىلىپ, 35 ءۇيدىڭ قۇجاتى قۇپتالدى. ۇيالىلىقتار تەزەك جاعىپ, كۇل شىعارۋ بەينەتىنەن قۇتىلاتىن بولدى, - دەيدى اۋىل اكىمى باقىتجان ورازعۇلوۆ.

اۋداننىڭ 12 ەلدىمەكەنىنە گاز قۇبىرىن تارتىپ, ءوڭىردىڭ الەۋمەتتىك دامۋىنا ۇلەس قوسقان مەردىگەر ء«اليا-سەرۆيس» جشس بولسا, ۇيالى اۋىلىنداعى اۋىلىشىلىك گاز قۇبىرىن «باتىسكوتلومونتاج» جشس جۇرگىزىپتى. ۇيالى اۋلىنداعى جۇمىستاردىڭ جوبالىق قۇنى 38,6 ملن. تەڭگە بولىپتى.

– ەلباسىمىز حالىقتىڭ ءال-اۋقاتىن كوتەرۋدى, تۇرمىس ساپاسىن ارتتىرۋدى باستى باعدار ەتىپ وتىر. جىل سايىنعى جولداۋ, قولعا الىنىپ جاتقان مەملەكەتتىك باعدارلامالاردىڭ قاي-قايسىسىنىڭ دا باستى تەمىرقازىعى – حالىقتىڭ ءال-اۋقاتىن, ءومىر ءسۇرۋ ساپاسىن جاقسارتۋ. ناتيجەسىن وزدەرىڭىز كورىپ وتىرسىز, اۋدان تازا اۋىز سۋمەن, كوگىلدىر وتىنمەن 100 پايىز قامتاماسىز وتىر. بيىل 2000 شاقىرىم سۋ قۇبىرى تارتىلىپ, وبلىس بويىنشا 110 ەلدى مەكەنگە تازا اۋىز سۋ جەتكىزىلدى. ونىڭ ىشىندە ءتورت اۋىل – بوكەي ورداسى اۋدانىنان. جىل سايىن 500 شاقىرىم جولدى جوندەۋ كوزدەلگەن. وبلىس بويىنشا 44 ەلدى مەكەنگە گاز تارتۋ جوسپارلانعان بولسا, بۇگىنگى تاڭدا 25 ەلدى مەكەندە كوگىلدىر وتىن پايدالانۋعا بەرىلدى. ەلباسى ن.نازارباەۆ وبلىسىمىزعا بيىلعى جىلدىڭ مامىرىندا كەلگەن ساپارىندا جول ماسەلەسىن كوتەرگەن ەدى. بۇل بىرەر اي, ءتىپتى بىرەر جىلدا بىتە قوياتىن شارۋا ەمەس, جاۋاپكەرشىلىگى دە, قاراجاتى دا اۋقىمدى شارۋا. قازتالوۆ-جانىبەك-بوكەي وردا ارالىعىنداعى 336 شاقىرىم جولدى جوندەۋ قولعا الىندى. مۇنىڭ ءبارى دە –تاۋەلسىزدىگىمىزدىڭ جەمىسى, ەلباسىنىڭ ستراتەگيالىق ساياساتىنىڭ جەتىستىگى, - دەدى باتىس قازاقستان وبلىسىنىڭ اكىمى التاي كولگىنوۆ اۋىل تۇرعىندارىمەن كەزدەسۋدە.

اۋىلعا كەلگەن كوگىلدىر وتىننىڭ سيمۆوليكالىق الاۋىن ءوڭىر باسشىسى التاي كولگىنوۆ پەن ەڭبەك ارداگەرى مۇقسي بەكقاليەۆ تۇتاتتى.

ايتا كەتەيىك, بۇگىنگى تاڭدا باتىس قازاقستان وبلىسىنىڭ 4 اۋدانى تابيعي گازبەن تولىق قامتىلىپ وتىر. 2018 جىلدىڭ قورىتىندىسى بويىنشا وبلىس حالقىنىڭ تابيعي گازبەن قامتىلۋى 95,4%-ءتى قۇرادى. ارينە, گازداندىرۋ جۇمىستارى جالعاسادى. كەلەسى جىلى قازتالوۆ اۋدانىندا – 13 اۋىلعا, تەرەكتى اۋدانىندا – 7 ەلدىمەكەنگە – بارلىعى 20 اۋىلعا گاز قۇبىرىن تارتۋ جوسپارلانعان.

قازبەك قۇتتىمۇرات ۇلى,

«ەگەمەن قازاقستان»