ەلىمىزدىڭ قاي تۇپكىرىندە بولماسىن, ونىڭ ەلدى-مەكەندەرى مەن اۋىلدارىندا, اۋداندارى مەن قالالارىندا, ءتىپتى وبلىس ورتالىقتارىنىڭ وزىندە ىرعالىپ-جىرعالماي, تەز شەشىمىن تابۋدى قاجەت ەتەتىن وزەكتى ماسەلەلەر بولماي تۇرمايدى. ەگەر بۇل جايتتەر ۋاقىتىندا ورىندالماسا, تۇرعىندار تاراپىنان ءار ءتۇرلى تۇسىنبەستىكتەر تۋىنداۋى مۇمكىن. سوندىقتان دا تولعاقتى الەۋمەتتىك-تۇرمىستىق ماسەلەلەردى دەر كەزىندە رەتتەۋدىڭ ماڭىزى مەن ءرولى جوعارى. بۇل ءۇشىن وڭىردە «وزەكتى ماسەلەلەر كارتاسى» قۇرىلعان. سوعان سايكەس ءتيىستى تالداۋلار مەن زەرتتەۋ جۇمىستارى جۇرگىزىلىپ كەلەدى. قابىرعالى قۇجاتقا كوز سالساق, قازىرگى كەزدە شۇعىل شەشۋدى قاجەت ەتەتىن 72 وزەكتى ماسەلە بار ەكەنىن كورەمىز. ونىڭ دەنى تۇرعىن-ءۇي كوممۋنالدىق شارۋاشىلىعىنا قاتىستى بولسا, كەلەسى كەزەكتەگى وزەكتى ماسەلەلەر تىزبەگىن اۆتوكوىك جولداىنا قاتىستى تۇيتكىلدەر قۇرايدى. سونىمەن بىرگە تۇرعىن-ءۇي قۇرىلىسى, مادەنيەت, سپورت جانە دەنساۋلىق ساقتاۋ سالالارىندا دا تۇبەگەيلى شەشىمىن تاۋىپ ۇلەرمەگەن ماسەلەلەر بار ەكەنى ايقىن كورىنەدى. ونىڭ كولەمى 22 پايىزدىق كورسەتكىشكە ءتان.
كارتانىڭ اتى – كارتا. كارتاعا قاراپ, كوپ جايتتەردى كوڭىلگە توقۋعا بولادى. وڭىردەگى وزەكتى ماسەلەلەردىڭ قازىرگى جاعدايىن وي بەزبەنىنەن وتكىزۋگە دە مۇمكىندىك مول. ەڭ باستىسى ايماققا كارتانىڭ كومەگىمەن ءوز شەشىمىن كۇتكەن ماسەلەلەردى جەدەل ءارى كورنەكى تۇردە باقىلاۋعا جول اشىلعان. سودان سوڭ ونىڭ ءبارى ءتيىستى قۇزىرلى ورگانداردىڭ نازارىنا بەرىلىپ ءجۇر. ءوز كەزەگىندە ولار ناقتى رەسۋرستاردىڭ كولەمى مەن ءىستىڭ ورىندالۋ مەرزىمىن ايقىنداپ, ناقتى شەشىم الىپ ءجۇر.
ايتالىق ايماقتا اۋدان ورتالىقتارى مەن قالالاردىڭ كارتاسىن جاساقتاۋدىڭ باستاپقى كەزەڭىندە 14 ماسەلە بولىپتى. ءارى ونىڭ ءبارىنىڭ شەشىمى بيۋدجەت قاراجاتىن بولۋگە بايلانىستى ورىستەپتى. بۇگىنگى كۇنى ونىڭ جەتەۋى وڭ شەشىمىن تاپقانى بەلگىلى بولىپ وتىر. اتاپ ايتقاندا اتالمىش جوبالار بويىنشا 2,4 ميلليارد تەنگە بيۋدجەت قاراجاتى ءبولىندى. سونىمەن بىرگە الداعى 2019 جىلى جۇزەگە اساتىن جوبالارعا 894,3 ميلليون تەنگە, سونداي-اق بۇدان كەيىنگى 2020 جىلى اتقارىلاتىن جوبالارعا 490,6 ميلليون تەنگە ءبولۋ قاراستىرىلعان. قىسقاسى بۇگىنگى كۇنى وڭىردەگى جەرگىلىكتى اتقارۋشى ورگاندار, سونىڭ ىشىندە وبلىستىق باسقارمالار مەن اۋداندىق اكىمدىكتەر كارتادا كورسەتىلگەن ماسەلەلەردى شەشۋگە ءبىر كىسىدەي جۇمىلعان. مۇنداعى باستى ۇستانىم – ورىن العان وزەكتى ماسەلەلەردى قويان-قولتىق ءوزارا بىرلەسىپ شەشۋ بولىپ وتىر.
تەمىر قۇسايىن,
«ەگەمەن قازاقستان»
اقتوبە