قازتالوۆ اۋىلىندا ساز مەكتەبى اشىلدى

ءبىر قىزىعى, ساز مەكتەبىنىڭ جاڭا عيماراتى قۇرمانعازى كوشەسىنىڭ بويىندا ورنالاسقان. تۇرعىندار وسىنىڭ ءوزىن جاقسى ىرىمعا بالاپ وتىر. 24 بالا ارنالعان ساز مەكتەبىندە ونەرلى وقۋشىلاردىڭ جان-جاقتى ءبىلىم الۋىنا بارلىق جاعداي جاسالعان. مۇندا اسپاپ سىنىپتارىمەن قاتار, بي, كونتسەرت زالدارى بار. قۇرىلىسقا باتىس قازاقستان وبلىستىق بيۋدجەتىنەن 87 ملن. 615,9 مىڭ تەڭگە بولىنگەن.

- اۋىلىمىزدا ساز مەكتەبى 1965 جىلى اشىلعان ەكەن. بىراق بۇعان دەيىن ءوزىنىڭ جەكە عيماراتى بولعان ەمەس. ساز مەكتەبىنىڭ قۇرىلىسى تۋرالى تۇرعىندار كوپتەن ماسەلە كوتەرىپ كەلگەن ەدى. مىنە, 53 جىلدان سوڭ جاڭا ساز مەكتەبىنە قول جەتكىزىپ وتىرمىز, - دەيدى ەڭبەك ارداگەرى عالىمجان نىعمەتوۆ.

- جاڭا وسى جەرگە كەلەردە قازتالوۆ اۋىلىن ارالاپ, تاۋەلسىزدىك, جەلتوقسان, ساۋات, سىرىم كوشەلەرىنە توسەلگەن اسفالتتى كوردىك. قالاداعىداي جول, جاياۋ جۇرگىنشىلەرگە تروتۋار سالىنعان. ال مىناۋ سۋ جاڭا ساز مەكتەبىندە مەكتەپ وقۋشىلارى قوسىمشا ءبىلىم الىپ, ونەرىن ورىستەتەدى. بيىلعى قاراشا ايىنداعى جولداۋىندا ەلباسىمىز قازاقستاندىقتاردىڭ ءومىر ساپاسىن ارتتىرۋ تۋرالى ايتتى. مەملەكەتتىڭ بارلىق قۋات-كۇشى وسىعان جۇمسالادى, - دەدى وسى شاراعا ارنايى كەلگەن باتىس قازاقستان وبلىسىنىڭ اكىمى التاي كولگىنوۆ.

اكىمنىڭ ايتۋىنشا, بيىل ورال قالاسىندا كوپقاباتتى 25 ءۇي سالىنىپ جاتىر. وبلىس اۋماعىندا 500 شاقىرىمدىق اۆتوكولىك جولىنىڭ قۇرىلىسى ءجۇردى. جاقىندا رەسەيدىڭ ساراتوۆ باعىتىنا شىعاتىن 104 شاقىرىمدىق جول تەلەكوپىر ارقىلى تاپسىرىلادى. بيىل باتىس قازاقستان وبلىسىندا 2 مىڭ شاقىرىمدىق سۋ قۇبىرى تارتىلىپ, 110 ەلدىمەكەنگە تازا اۋىز سۋ بەرىلدى, ونىڭ 14-ءى – قازتالوۆ اۋدانىندا. 44 ەلدىمەكەنگە گاز قۇبىرى تارتىلا باستالدى, ونىڭ دا 13 اۋىلى – قازتالوۆ اۋدانىنان. كەلەر جىلى قازتالوۆ اۋىلىنا كەڭ جولاقتى ينتەرنەت كەلەدى.

- ءبىز بايلانىس مينيسترلىگىمەن, «قازاقتەلەكوم» مەكەمەسىمەن كەلىسىپ, كەلەر جىلى «تسيفرلى قازاقستان» باعدارلاماسى اياسىندا باتىس قازاقستان وبلىسىنىڭ 93 ەلدىمەكەنىن كەڭجولاقتى ينتەرنەتكە قوساتىن بولدىق. ونىڭ دا 13 اۋىلى – وسى قازتالوۆ اۋدانىندا. اۋدان ورتالىعىنداعى الما ورازباەۆا اتىنداعى مەكتەپكە جاڭا عيمارات سالۋ ءۇشىن 2019 جىلى رەسپۋبليكادان قارجى بولىنەدى. كورىپ وتىرعانداي, الدىمىزدا كوپ جاقسىلىق كۇتىپ تۇر, - دەدى ءوڭىر باسشىسى.

جينالعان حالىق التاي كولگىنوۆتىڭ ءسوزىن قول شاپالاقتاپ قارسى الدى. راسىندا دا اۋىل تۇرعىندارىنىڭ الەۋمەتتىك جاعدايى جاقسارىپ كەلەدى. 2019 جىلى قازتالوۆتى ورال قالاسىمەن جالعايتىن اۆتوجول قۇرىلىسى اياقتالماق. ءبىر ماسەلە – ءدال بۇگىن قازتالوۆ اۋىلىنىڭ تۇرعىندارىنا اۋىز سۋ گرافيكپەن بەرىلىپ وتىر. ونىڭ سەبەبى, سۋ كوزىنىڭ تاپشىلىعى. بىراق التاي كولگىنوۆ الداعى جىلى بۇل ماسەلە شەشىلەتىنىن, قۇبىر جاڭادان تابىلعان سۋ قورىنا جالعاناتىنىن ايتتى. 

- اۋدان ورتاپىعىنداعى جاڭادان ساز مەكتەبىنىڭ قۇرىلىسى باستالعان كەزدە بارلىق اتا-انا قۋاندىق. قىسقا ۋاقىتتا قۇرىلىس اياقتالىپ, بالالارىمىز جاپ-جارىق, جىلى ورىنعا ورنالاسىپ جاتىر. جاڭا مەكتەپتە بالالارعا بارلىق جاعداي جاسالعان. وسىنداي جاعداي جاساعان وبلىس, اۋدان باسشىلارىنا اتا-انالار اتىنان زور العىس ايتامىز! سونداي-اق ءبىز دە ساز مەكتەبىنە اتا-انالار اتىنان 170 مىڭ تەڭگەگە سينتەزاتور الىپ بەردىك. بۇل جاڭادان ءوز شاڭىراعىن سايلاپ جاتىرعان ونەر ۇجىمىنا دەگەن قولداۋىمىز بولماق. بالالارىمىزدىڭ ونەرلەرى وركەندەي بەرسىن! – دەيدى قازتالوۆ اۋىلىنىڭ تۇرعىنى ايناگۇل قابدولوۆا.

قازبەك قۇتتىمۇرات ۇلى,

«ەگەمەن قازاقستان»