ميلان قالاسىندا ەۋروپاداعى قاۋىپسىزدىك جانە ىنتىماقتاستىق ۇيىمى سىرتقى ىستەر مينيسترلەرى كەڭەسىنىڭ 25-ءشى وتىرىسى وتۋدە.
قازاقستان سىرتقى ىستەر ءمينيسترى قايرات ءابدىراحمانوۆ ءوز سوزىندە بريۋسسەلدەگى «ازيا-ەۋروپا» سامميتىندە (اسەم) ۇسىنىلعان نۇرسۇلتان نازارباەۆتىڭ باستاماسىمەن تانىستىردى.
«ن. نازارباەۆ ەۋروپالىق وداق, رەسەي, اقش جانە قىتاي باسشىلارىنىڭ بىرلەسكەن تالقىلاۋى ارقىلى حالىقارالىق كەلىسپەۋشىلىكتەردى شەشۋدىڭ ماڭىزدىلىعىن اتاپ ءوتتى. تالقىلاۋ بۇۇ قامقورلىعىمەن ارنايى سەسسيا تۇرىندە وتكىزىلۋى دە مۇمكىن, سونداي-اق استانا مۇنداي جوعارى دەڭگەيدەگى كەزدەسۋگە الاڭ بولا الادى», دەلىنگەن حابارلامادا.
قازاقستاننىڭ ەقىۇ ايماعىندا جانە ودان تىس جەرلەردە جانجالداردى رەتتەۋگە, وڭىرلىك جانە جاھاندىق پروبلەمالاردى شەشۋ ءۇشىن حالىقارالىق بىرلەسكەن كۇش-جىگەرگە بەلسەنە قاتىسۋعا دەگەن بەيىلدىلىگى اتاپ ءوتىلدى.
«حەلسينكي قورىتىندى اكتىسى قاعيداتتارىنا نەگىزدەلە وتىرىپ, ەقىۇ مەملەكەتتەرى 2010 جىلعى استانا سامميتىندە ەركىن, دەموكراتيالىق جانە بولىنبەيتىن ەۋرواتلانتيكالىق جانە ەۋرازيالىق قاۋىپسىزدىك قوعامداستىعىنىڭ جالپى كورىنىسى تۋرالى كەلىسىمگە كەلدىك, بىراق ءبىز وعان قول جەتكىزۋ جولدارى تۋرالى كەلىسپەدىك. سوندىقتان حەلسينكي قۇجاتىنىڭ 45-جىلدىعىنا وراي ۇيىمداستىرۋعا بولاتىن جوعارى دەڭگەيدەگى كونفەرەنتسيا وسى باعىتتا ناقتى شارا بولادى », - دەپ ءتۇسىندىردى مينيستر.
قازاقستان ەقىۇ-دىڭ شيەلەنىستەردى الدىن-الۋ جانە شەشۋگە, تەرروريزم, راديكاليزم, ادام ساۋداسى جانە باقىلانبايتىن كوشى-قونعا قارسى ءىس-قيمىل قۇرالدارىن نىعايتۋعا مۇددەلى. وسى رەتتە سيريا بويىنشا استانا پروتسەسى ەۋرو-جەرورتا تەڭىزى قاۋىپسىزدىگىنە قاۋىپ-قاتەردى تومەندەتۋدە ماڭىزدى ءرول اتقارادى, دەلىنگەن قازاقستاندىق دەلەگاتسيانىڭ سوزىندە.
ەۋرازياداعى قيىندىقتاردى شەشۋدە حالىقارالىق ۇيىمداردىڭ سينەرگياسىن ناسيحاتتاۋ ماقساتىندا, قاتىسۋشى مەملەكەتتەر ەقىۇ, اوسشك جانە اسەان ايماقتىق قاۋىپسىزدىك فورۋمى حاتشىلىقتارىنىڭ بىرلەسكەن وتىرىسىن ۇيىمداستىرۋ تۋرالى پرەزيدەنت ن. نازارباەۆتىڭ باستاماسى ۇسىنىلدى.
قاتىسۋشىلاردىڭ نازارى اۋعانستانداعى احۋالدىڭ دامۋى جانە وسى رەتتە قازاقستاننىڭ ەقىۇ-دىڭ اۋعانستان جونىندەگى جوعارى دەڭگەيدەگى كەزدەسۋىن 2019 جىلى استانادا وتكىزۋ نيەتىنە اۋدارىلدى. بۇل ءىس-شارا ايماقتىق سەرىكتەستىك جانە قاۋىپسىزدىك پەن دامۋ اراسىنداعى قارىم-قاتىناسقا باعىتتالاتىن بولادى.
«قاۋىپسىزدىك پەن دامۋ تۋرالى ايتا وتىرىپ, كوپىر قۇرۋعا قابىلەتتى جانە كوپتەگەن ماڭىزدى ماسەلەلەر بويىنشا كونسەنسۋسقا قول جەتكىزۋگە مۇمكىنشىلىك بەرەتىن ەقىۇ-دىڭ ەكونوميكالىق جانە ەكولوگيالىق ولشەمدەرىنىڭ ۇلكەن الەۋەتىن ۇمىتپاۋىمىز كەرەك. بۇل مۇمكىندىكتەردىڭ ءبىرى - ەقىۇ-دىڭ استاناداعى جاڭا بۋىنىنىڭ قالىپتاسۋى بولاتىن ەدى, بۇل وزىق تاجىريبەلەرمەن, اناليتيكالىق جانە عىلىمي-زەرتتەۋ جۇمىستارىمەن الماسۋ ارقىلى ورنىقتى ءوزارا بايلانىستىلىق ماسەلەلەرىمەن اينالىساتىن ەدى», - دەدى قازاقستان ءسىم باسشىسى.
ەقىۇ ەكونوميكالىق جانە ەكولوگيالىق كوميتەتىنىڭ توراعاسى رەتىندە قازاقستان ميلانداعى سىرتقى ىستەر مينيسترلەر كەڭەسىنىڭ الاڭىندا ءوزارا بايلانىستىلىق (connectivity) ماسەلەلەرى بويىنشا ارنايى ءىس-شارا ۇيىمداستىردى.
ميلانداعى ەقىۇ وتىرىسىنىڭ اياسىندا ۇجىمدىق قاۋىپسىزدىك تۋرالى شارت ۇيىمىنا (ۇقشۇ) مۇشە-مەملەكەتتەر سىرتقى ىستەر مينيسترلەرىنىڭ جۇمىس كەزدەسۋى ءوتتى.
سونىمەن قاتار ميلاندا يتاليا, اۋستريا, نيدەرلاندى, سلوۆاكيا, سەربيا, ەستونيا, موناكو, بولگاريا, رۋمىنيا جانە باسقا ەلدەر دەلەگاتسيالارىنىڭ باسشىلارىمەن, سونداي-اق ەقىۇ ۇلتتىق ازشىلىقتار جونىندەگى جوعارعى كوميسسارىمەن ەكىجاقتى كەزدەسۋلەر وتكىزىلۋدە.
ەقىۇ مينيسترلىك كەزدەسۋى اشىلۋىنىڭ قارساڭىندا قىرعىزستاننىڭ توراعالىعىمەن ۇجىمدىق قاۋىپسىزدىك تۋرالى شارت ۇيىمىنىڭ مۇشە-مەملەكەتتەرى سىرتقى ساياسي ۆەدومستۆولارى باسشىلارىنىڭ جۇمىس كەزدەسۋى ءوتتى.