قازىرگى كەزەڭدە تۇركىتىلدەس مەملەكەتتەر قارقىندى دامىپ كەلە جاتىر جانە ارقايسىسى حالىقارالىق ارەنادا وزىنە لايىقتى ورىنعا يە. سول مەملەكەتتەردىڭ ءبىرى, تۇركى الەمىنىڭ ماڭىزدى بولىگى – قازاقستان رەسپۋبليكاسى. ونىڭ ىشكى جانە سىرتقى ساياساتتى جۇرگىزۋى, سەرىكتەستىك قاعيدالارىنا شىنايى كوزقاراسى حالىقارالىق بەدەلىنىڭ زور ەكەنىن كورسەتەدى. ايتا كەتۋ كەرەك, قازاقستاننىڭ تاۋەلسىزدىك جىلدارى قول جەتكىزگەن بارلىق جەتىستىكتەرى تۇڭعىش پرەزيدەنت نۇرسۇلتان نازارباەۆتىڭ ەسىمىمەن تىعىز بايلانىستى.
ءۇش جىل بۇرىن, دالىرەك ايتقاندا, 2015 جىلدىڭ قىركۇيەگىندە تۇركىتىلدەس مەملەكەتتەر ىنتىماقتاستىعى كەڭەسىنىڭ استانادا وتكەن 5-ءشى سامميتىنە قاتىسقانىم ەسىمدە. ءدال سوندا مەنىڭ تۇركى مادەنيەتى مەن مۇراسى حالىقارالىق قورىنىڭ باسشىسى رەتىندەگى كانديداتۋرام بەكىتىلدى. كەلەسى كۇنى ءبىز قازاق حاندىعىنىڭ 550 جىلدىق مەرەيتويىنا قاتىستىق. سول جەردە مەن ءوز تاريحىن, ۇلتتىق ەرەكشەلىگىن ساقتاعان, ءوز داستۇرلەرىن ماقتان تۇتا الاتىن زاماناۋي جانە قۋاتتى قازاقستاندى كوردىم.
بۇگىندە تۇركى ەلدەرى مەملەكەتتەرى باسشىلارىنىڭ اراسىندا وتە تەرەڭ باۋىرلاستىق پەن سەنىمدى ارىپتەستىك بار ەكەندىگىن ايرىقشا اتاپ ءوتۋ كەرەك. ءوز كەزەگىندە مەملەكەت باسشىلارىنىڭ بەرىك بىرلىگى ءبىزدىڭ تۋىس حالىقتارىمىز اراسىنداعى ءوزارا بايلانىسقا وڭ اسەرىن تيگىزۋدە. ءتۇبى ءبىر تۇركى باۋىرلار اراسىنداعى بۇل ىنتىماقتاستىق پەن ارىپتەستىك الداعى ۋاقىتتا ودان ءارى نىعايا تۇسەدى دەپ سەنەمىن.
وسى تۇرعىدا ەلباسى نۇرسۇلتان نازارباەۆ پەن ازەربايجان حالقىنىڭ ۇلتتىق كوشباسشىسى گەيدار اليەۆتىڭ ۇزاق جىلداردىڭ تەزىنە ءتوزىپ بەرگەن ايرىقشا دوستىق قارىم-قاتىناستا بولعانىن ايتا الامىن. قۋاناتىن ءبىر جايت, وسى ءداستۇر قازىر دە جالعاسىن تابۋدا. ازەربايجان مەملەكەتىنىڭ پرەزيدەنتى يلحام اليەۆ پەن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ اراسىندا دا وتە جاقىن دوستىق بايلانىس بەرىك قالىپتاسقان.
سونىمەن قاتار ەلباسى نۇرسۇلتان نازارباەۆتىڭ بىتىمگەرشىلىك ميسسيانى تابىستى اتقارىپ وتىرعانىن ايرىقشا اتاپ وتكىم كەلەدى. كوپتەگەن ەلدەر اراسىندا كەلىسپەۋشىلىكتەر تۋىنداعان كەزدە, قازاقستاننىڭ دانا ءارى كەمەڭگەر كوشباسشىسىنا جۇگىنەدى. وسىلايشا نۇرسۇلتان نازارباەۆتىڭ باسشىلىعىنداعى قازاقستان بايسالدى ساياساتىمەن الەمدىك قوعامداستىقتىڭ سەنىمىنە يە بولىپ, تاتۋلاستىرۋ ميسسياسىن ناتيجەلى جۇزەگە اسىرىپ كەلەدى.
جاقىندا قازاقستان پرەزيدەنتى نۇرسۇلتان نازارباەۆ تۇركى الەمى ءۇشىن ماڭىزدى زور تاريحي شەشىمدەر قابىلدادى. اتاپ ايتقاندا, قازاقستاننىڭ لاتىن الىپبيىنە ءوتۋى باۋىرلاس ەلدەرىمىزدى بۇرىنعىدان دا جاقىنداستىرا تۇسسە, تۇركىستانعا وبلىس مارتەبەسىن بەرۋ تۇركى الەمىنە ەرەكشە سەرپىن بەرگەن جاڭالىق بولدى. سونداي-اق «تۇركى الەمىنىڭ تۇلعالارى», «تۇركى الەمىنىڭ قاسيەتتى جەرلەرى» سياقتى ماڭىزدى جوبالارعا باستاماشى بولىپ, باي مادەني مۇرامىزدى, رۋحاني باي قۇندىلىقتارىمىزدى بولاشاق ۇرپاققا ساقتاۋ جانە جەتكىزۋدە ۇلكەن ماڭىزدى قادامدار جاسادى.
گيۋناي ەفەنديەۆا,
تۇركى مادەنيەتى مەن مۇراسى حالىقارالىق قورىنىڭ پرەزيدەنتى