دەۆيس كۋبوگىنىڭ رەيتينگى جاريالاندى

ۇزدىكتەر ءتىزىمىن فرانتسيا تەننيسشىلەرى باستاپ تۇر. ولار 32637,50 ۇپاي جيعان ەكەن. ەكىنشى ورىندا – حورۆاتيا. حورۆاتتاردىڭ قورجىنىندا 30257,50 ۇپاي بار. ءدال وسى قوس كوماندا كۇنى كەشە عانا اياقتالعان دەۆيس كۋبوگىنىڭ فينالدىق سايىسىندا ءوزارا كۇش سىناسىپ, بۇل باسەكە حورۆاتيانىڭ پايداسىنا شەشىلگەن بولاتىن. 15685 ۇپايمەن ارگەنتينا قۇراماسى ءۇشىنشى ورىنعا تابان تىرەدى. بيىلعى ماۋسىم وڭتۇستىك امەريكا وعلاندارى ءۇشىن اسا ءساتتى بولمادى. بيىل ولار ايتۋلى جارىستىڭ الەمدىك توبىنا دا شىعا المادى. الايدا ارگەنتينالىقتاردىڭ وسىعان دەيىن جيعان ۇپاي قورى ۇزدىكتەر ساناتىنان كورىنۋ ءۇشىن جەتكىلىكتى بولدى.

ءتورتىنشى ورىندا – بەلگيا (14941,25 ۇپاي). بەلگيالىقتار بيىل دەۆيس كۋبوگىنىڭ شيرەك فينالىنا شىقتى. ودان كەيىنگى ساتىلارعا ۇلىبريتانيا (11916,25 ۇپاي), اقش (9849,38 ۇپاي) جانە يسپانيا (9149,38 ۇپاي) جايعاستى. بيىلعى جارىستا بريتاندىقتار 1/8 فينالدا سۇرىنسە, امەريكالىقتار مەن يسپاندىقتار جارتىلاي فينالدا ونەر كورسەتتى. سونداي-اق, «توپ-10» كوماندانىڭ قاتارىندا سەربيا (7000 ۇپاي), اۆستراليا (6712 ۇپاي) جانە يتاليا (5826 ۇپاي) قۇرامالارى بار.

ءبىر ايتا كەتەرلىگى, قازاقستان بۇرىنعى تمد ەلدەرى اراسىنداعى ەڭ ۇزدىك كورسەتكىشكە قول جەتكىزىپ وتىر. تىپتەن, رەسەيدىڭ ءوزى جەرلەستەرىمىزدەن كوپ قالىپ قويدى. ولار 1633 ۇپايمەن 22 ورىندى قاناعات تۇتۋدا.

عالىم سۇلەيمەن,

«ەگەمەن قازاقستان»