البانيانىڭ ەۋروپالىق جانە سىرتقى ىستەر ءمينيسترى ديتمير بۋشاتي استاناعا رەسمي ساپارمەن كەلدى. بۇل ساپار ەكى ەل اراسىنداعى ەكىجاقتى قارىم-قاتىناستار تاريحىندا البانيانىڭ سىرتقى ىستەر ۆەدومستۆوسى باسشىسىنىڭ قازاقستانعا العاشقى ساپارى, دەپ حابارلايدى ءسىم ءباسپاسوز قىزمەتى.
سىرتقى ىستەر ءمينيسترى قايرات ابدىراحمانوۆپەن وتكەن كەلىسسوزدەر بارىسىندا تاراپتار ساياسي, ساۋدا-ەكونوميكالىق جانە مادەني ىنتىماقتاستىقتىڭ اعىمداعى جاعدايى مەن كەلەشەگىن تالقىلادى. قۇرىلىس, ەنەرگەتيكا, اۋىل شارۋاشىلىعى, كولىك-لوگيستيكا, ينفراقۇرىلىم جانە تۋريزم سالالارى ىنتىماقتاستىقتىڭ پەرسپەكتيۆالىق باعىتتارى بولىپ انىقتالدى.
البان دەلەگاتسياسى قازاقستانداعى شەتەلدىك ينۆەستورلار ءۇشىن قولايلى جاعدايلار مەن ارتىقشىلىقتار تۋرالى, سونداي-اق «استانا» حالىقارالىق قارجى ورتالىعى شەڭبەرىندەگى ىنتىماقتاستىق مۇمكىندىكتەرى تۋرالى حاباردار ەتتى.
ەكى ەل اراسىنداعى تاۋار اينالىمىنىڭ كولەمى تومەن, وسىعان بايلانىستى ساۋدا-ەكونوميكالىق ىنتىماقتاستىق قارقىنىن قامتاماسىز ەتۋ ماقساتىندا تاراپتار ساۋدا-ەكونوميكالىق ىنتىماقتاستىق, ينۆەستيتسيالاردى كوتەرمەلەۋ مەن ءوزارا قورعاۋ جانە قوسارلانعان سالىق سالۋدى بولدىرماۋ تۋرالى ءۇش نەگىزگى كەلىسىمدەرگە قول قويۋ پروتسەسىن جەدەلدەتۋ تۋرالى ۋاعدالاستى. سونىمەن قاتار كەلىسسوزدەردىڭ كۇن تارتىبىندە ءوزارا قۇقىقتىق كومەك كورسەتۋ تۋرالى قۇجاتتار بار.
حالىقارالىق جانە ايماقتىق كۇن تارتىبىندەگى وزەكتى ماسەلەلەر, سونىڭ ىشىندە ورتالىق ازيا مەن بالقان ايماعىنداعى جاعداي تۋرالى پىكىر الماسىلدى. قازاقستان مەن البانيانىڭ نەگىزگى حالىقارالىق ماسەلەلەر بويىنشا ۇستانىمدارىنىڭ ۇقساستىعى بۇۇ, ەۋروپاداعى قاۋىپسىزدىك جانە ىنتىماقتاستىق ۇيىمى, يسلام ىنتىماقتاستىق ۇيىمى سياقتى پلاتفورمالار اياسىندا ىنتىماقتاستىققا مۇمكىندىك بەرەتىندىگى اتاپ ءوتىلدى.
بۇل تۇرعىدا ەلباسى نۇرسۇلتان نازارباەۆتىڭ حالىقارالىق جانجالداردى رەتتەۋدەگى جەكە ۇلەسىن اتاپ ءوتىلىپ, سونداي-اق مەملەكەت باسشىسى «Astana Club» شەڭبەرىندە جاساعان باستامالارى - 1975 جىلعى حەلسينكي پروتسەسىن جاڭارتۋ, وعان قوسا 2020 جىلى استانادا قاۋىپسىزدىك جانە ىنتىماقتاستىق جونىندەگى كونفەرەنتسيانى وتكىزۋ جانە ەقىۇ, ازياداعى ءوزارا ىقپالداستىق جانە سەنىم شارالارى جونىندەگى كەڭەسى مەن اسەان ايماقتىق فورۋمىنىڭ ءبىرىنشى بىرلەسكەن كونسۋلتاتيۆتىك كەزدەسۋىن ۇيىمداستىرۋ تۋرالى اتاپ ءوتىلدى.
كەلىسسوزدەر بارىسىندا قازاقستاندىق تاراپ البانيانىڭ 2020 جىلى ەقىۇ-عا توراعالىق ەتۋ كانديداتۋراسىن قولداۋعا جانە وسى ۇيىمعا توراعالىق ەتۋ تاجىريبەسىمەن بولىسۋگە دايىن ەكەندىگىن ءبىلدىردى.
كەزدەسۋ قورىتىندىسى بويىنشا ديپلوماتتار سىرتقى ىستەر مينيسترلىكتەرى اراسىنداعى ىنتىماقتاستىق تۋرالى حاتتاماعا قول قويىپ, كاسىپكەرلەر پالاتالارى اراسىنداعى ىنتىماقتاستىق تۋرالى مەموراندۋم قابىلداندى.
د. ءبۋشاتيدىڭ ساپارى اياسىندا پارلامەنت سەناتىندا, ۇكىمەتتە, ينۆەستيتسيالار جانە دامۋ مينيسترلىگىندە, «Kazakh Invest» ۇك اق جانە «اتامەكەن» ۇلتتىق كاسىپكەرلەر پالاتاسىدا كەزدەسۋلەر جوسپارلانعان.