پرەزيدەنت نۇرسۇلتان نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جاڭا جولداۋىندا حالىقتىڭ تابىسىن ارتتىرۋ ماسەلەسى الدىڭعى ورىنعا قويىلدى.
وسى تالاپتىڭ اتاۋلى الەۋمەتتىك كومەككە دە قاتىسى بارى ءسوزسىز. ويتكەنى ول جۇزدەگەن وتباسى تۇرمىسىنىڭ جاقسارۋىنا جاردەم بەرىپ كەلەدى.
2018 جىلعى 5 قاراشادا ماجىلىستە «جاڭا فورماتتاعى اتاۋلى الەۋمەتتىك كومەكتى ەنگىزۋ بارىسى تۋرالى» تاقىرىبىندا ۇكىمەت ساعاتى ءوتىپ, سول جەردە اۋىلشارۋاشىلىعى مينيسترلىگىنىڭ وكىلى الەۋمەتتىك كومەك الۋ تۋرالى قويىلعان سۇراققا جاۋاپ بەرە المادى. سوندىقتان پرەمەر-ءمينيستردىڭ ورىنباسارى – اۋىلشارۋاشىلىعى ءمينيسترى ومىرزاق شوكەەۆتىڭ اتىنا ساۋال جولداپ, وسى سۇراقتى قويۋىمىزعا تۋرا كەلدى.
اتاۋلى الەۋمەتتىك كومەكتى الۋعا ۇمىتكەر از قامتىلعان وتباسىلاردىڭ جيىنتىق كىرىسىن ەسەپتەۋدىڭ قولدانىستاعى ادىستەمەسىنە سايكەس ادامنىڭ (وتباسىنىڭ) جان باسىنا شاققانداعى ورتاشا كىرىسىن ەسەپتەۋدە جەكە قوسالقى شارۋاشىلىقتان (جقش) الىنعان كىرىستەر ەسكەرىلەدى.
بۇل رەتتە جوعارىدا اتالعان ادىستەمەدە كوزدەلگەن, جەكە قوسالقى شارۋاشىلىقتان تۇسەتىن كىرىستەردى ەسەپتەۋ بويىنشا كوزقاراستار 2005 جىلدان بەرى قايتا قارالماعان, بۇل كازىرگى جاعدايدا اتاۋلى الەۋمەتتىك كومەكتى الۋعا ۇمىتكەرلەر كىرىستەرىنىڭ مولشەرىن اسىرا ۇلعايتۋعا نەمەسە كەمىتۋگە الىپ كەلەدى. ەڭبەك جانە حالىقتى الەۋمەتتىك قورعاۋ مينيسترلىگى ءوز تاراپىنان اۋىل شارۋاشىلىعى مينيسترلىگىنە ءتيىستى ۇسىنىستاردى قاراۋ جانە بەكىتۋ ءۇشىن تاپسىرىپ قويعانىن مالىمدەپ وتىر.
وسىعان بايلانىستى انىقتاعىمىز كەلەتىنى – اتاۋلى الەۋمەتتىك كومەك تاعايىنداۋدا اۋىل شارۋاشىلىعى مينيسترلىگىندە جەكە قوسالقى شارۋاشىلىقتان تۇسەتىن جيىنتىق كىرىستى ەسەپتەۋدىڭ قولدانىستاعى ادىستەمەسىن جاڭارتۋ جانە قايتا قاراۋ ءۇشىن قانداي شارالار قارالىپ جاتقاندىعى, قاي مەرزىمگە دەيىن ول شارالار قولدانىسقا ەنەتىنى.
ءبايدىلدا جىلقىشيەۆ,
ءماجىلىس دەپۋتاتى