گازداندىرۋ ءىسىن جالعاستىرۋدىڭ ماڭىزى زور

بۇل باستاما بۇدان بۇرىنعى الەۋمەتتىك باعدارلامالاردىڭ جۇيەلى ىسكە اسىرىلۋىنا ىقپال ەتىپ, ءاربىر قازاقستاندىقتىڭ ءال-اۋقاتىن ودان ءارى جاقسارتۋعا باعىتتالعان اسا ءىرى جوبا, ماڭىزدى قۇجات.            

وڭىرلەردە بولعان ءىسساپارلارىمىزدىڭ بارىسىندا, جامبىل وبلىسى تۇرعىندارى تۇرمىس-تىرشىلىكتەرىنە بايلانىستى بىرقاتار ماسەلەنى كوتەردى. سونىڭ ىشىندە وبلىس ەلدى مەكەندەرىن تابيعي گازبەن تولىق قامتاماسىز ەتۋ بارىسى كوكەيكەستى ماسەلە رەتىندە العا تارتىلدى. اۋا رايى قاتال, كەيبىر جىل­دارى قار شامادان تىس تۇسەتىن تاۋلى اي­ماق­تاردا ورنالاسقان اۋىلداردىڭ ءتۇيىنى شەشىلمەگەن ماسەلەلەرى كوڭىلدى الاڭداتادى. اتاپ ايتقاندا, گازبەن قامتىلماعان ەلدى مەكەندەردەگى اۋىل جاستارىنىڭ قالاعا كوشۋىنىڭ ارتۋى, سونداي-اق قوشقاراتا جانە ەرتاي اۋىلدارىنداعى جاڭادان سالىن­عان ساۋلەتتى ەكى قاباتتى مەكتەپتەردىڭ وقۋشى­لارمەن قامتاماسىز ەتىلمەي قالۋ قاۋپى تۋرالى وي-تولعانىستارىن اۋىل تۇرعىندارى قامىعا ايتتى. 

اۋىل تۇرعىندارىنىڭ كوتەرگەن وتىرعان ماسەلەلەرى ورىندى دەپ سانايمىز. سوڭعى بىرنەشە جىل بويى گازداندىرۋ ماسەلەسى بار­لىق جوعارعى بيىلىك ورگاندارىندا ءوز شەشىمىن تاپپاعان سوڭ تۇرعىنداردىڭ ءومىر ءسۇرۋ ساپاسىن ارتتىرۋعا دەگەن ءۇمىت جول­داۋدان كەيىن قايتا جاندانۋدا.

قازىر جامبىل وبلىسىنداعى 377 ەلدى مەكەن­نىڭ 181-ءى گازداندىرىلعان. بۇل – 48% دەگەن ءسوز. 2018-2025 جىلدارى تاعى 173 ەلدى مەكەندى گازبەن قامتۋ جوسپارلانۋدا, ناتي­جەسىندە 354 ەلدى مەكەن گازداندىرىلىپ, 94%-عا جەتەتىن بولادى. 

سونىمەن قاتار 2019 جىلى «نۇرلى جول» باعدارلاماسى اياسىندا تاراز قالاسىن­داعى كوپ­قاباتتى ۇيلەر اراسىنداعى جىلۋ جەلى­لەرىن قايتا جاڭعىرتۋ بويىنشا ءۇش جوبا ازىرلەنىپ, ينۆەستيتسيا جانە دامۋ مينيسترلىگىنە بيۋدجەتتىك ءوتىنىم تاپسىرىلدى جانە اتالمىش باعدارلامانى جاڭارتۋدى جالعاستىرۋ ماقساتىندا 1,5 ملرد تەڭگە قاجەت ەكەنىن جەتكىزەمىز.

ەلدى مەكەندەردى گازداندىرۋدى جالعاس­تى­رۋ ءۇشىن ۇكىمەتتەن 2019-2021 جىلدارعا ار­نال­عان رەس­پۋبليكالىق بيۋدجەتتەن قوسىمشا 4,5 ملرد تەڭگەنىڭ بولىنۋىنە ىقپال ەتۋ سۇرالدى. 

ءابدالى نۇراليەۆ,

سەنات دەپۋتاتى