قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆانىڭ توراعالىعىمەن قازاقستان رەسپۋبليكاسىنىڭ پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا وتىرىسى ءوتتى, دەپ حابارلايدى اقوردانىڭ ءباسپاسوز قىزمەتىن.
وتىرىستى اشقان گ.ابدىقالىقوۆا مەملەكەت باسشىسى نۇرسۇلتان نازارباەۆتىڭ بيىلعى جولداۋداعى «جاستار مەن وتباسى ينستيتۋتىن كەشەندى قولداۋ مەملەكەتتىك ساياساتتىڭ باسىمدىعىنا اينالۋعا ءتيىس» دەگەن سوزىنە باسا نازار اۋداردى.
– ۇلتتىق كوميسسيا جۇمىسىنىڭ ماڭىزدى باعىتىنىڭ ءبىرى وتباسىلىق قۇندىلىقتاردى اسىرەسە جاستار اراسىندا نىعايتۋ بولىپ سانالادى, – دەدى مەملەكەتتىك حاتشى.
قازاقستان رەسپۋبليكاسىنىڭ باس پروكۋراتۋراسى «وتباسىنداعى زورلىق-زومبىلىقسىز قازاقستان» پيلوتتىق جوباسىن جۇزەگە اسىرۋ قورىتىندىسى جونىندە مالىمەت بەردى. ونى جۇزەگە اسىرۋ بارىسىندا شىمكەنت قالاسى مەن تۇركىستان وبلىسى اكىمدىكتەرىندە وتباسى, جاستار جانە بالالار ىستەرى جونىندەگى باسقارمالار اشىلدى. شىمكەنتتە «مەديتسينالىق پسيحولوگيالىق وڭالتۋ ورتالىعى» قۇرىلدى. تۇركىستان وبلىسىنىڭ 14 اۋدانىندا جانە شىمكەنت قالاسىندا «حالىقتى الەۋمەتتىك-پسيحولوگيالىق قولداۋ قىزمەتتەرى» اشىلدى. 2018 جىلعى 9 ايدىڭ قورىتىندىسى بويىنشا, ولارعا زاڭدىق جانە الەۋمەتتىك ماسەلەلەر بويىنشا كونسۋلتاتسيا بەرىلىپ, 865 ادامعا پسيحولوگيالىق كومەك كورسەتىلدى.
سونىمەن قاتار, قازاقستان رەسپۋبليكاسىنداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسىن ىسكە اسىرۋ بويىنشا الماتى وبلىسىنىڭ 2017-2019 جىلدارعا ارنالعان ءىس-شارالار جوسپارىنىڭ ورىندالۋى جونىندە بايانداما تىڭدالدى. ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى اياسىندا 160 ادام جۇمىسقا ورنالاسىپ, 127 ادام جولداما العان, 142 ادام قايتا دايارلاۋ كۋرستارىنا قابىلداندى. بيىلعى 10 اي ىشىندە «بيزنەستىڭ جول كارتاسى 2020» باعدارلاماسى بويىنشا 23 ايەل پايىزدىق مولشەرلەمەنى سۋبسيديالاۋ تۇرىندە جالپى قۇنى 763 ملن تەڭگەدەن اساتىن مەملەكەتتىك قولداۋعا يە بولدى. جاستار رەسۋرستىق ورتالىقتارى جانىنان الماتى وبلىسىنىڭ جاس وتباسىلارىن قولداۋ كلۋبتارى اشىلدى. ولاردىڭ جۇمىسى وتباسى قۇندىلىقتارىن قالىپتاستىرۋعا جانە نىعايتۋعا, اجىراسۋلاردىڭ الدىن الۋعا باعىتتالعان.
قوعامدىق دامۋ مينيسترلىگى وتباسىنى دامىتۋ مەن قولداۋدىڭ 2019-2024 جىلدارعا ارنالعان جول كارتاسىنىڭ جوباسىمەن تانىستىردى. وندا وتباسىن قۇرۋ مەن دامىتۋدىڭ بارلىق كەزەڭىندەگى ۆەدومستۆوارالىق كەشەندى جۇمىستار قاراستىرىلعان.
باسقوسۋدا 2018 جىلعى جۇمىس قورىتىندىسى مەن 2019 جىلعا ارنالعان جۇمىس جوسپارى قارالدى.
جيىن سوڭىندا مەملەكەتتىك حاتشى گۇلشارا ابدىقالىقوۆا مەملەكەتتىك ورگاندارعا بىرقاتار ناقتى تاپسىرما بەردى.