قوعامدىق دامۋ ءمينيسترى دارحان كالەتاەۆ ءوزىنىڭ باتىس قازاقستان وبلىسىنا جۇمىس ساپارى اياسىندا ورال قالاسىندا ءوتىپ جاتقان وڭىرلىك ازاماتتىق فورۋمعا قاتىستى.
ءىس-شارانى اشقان دارحان كالەتاەۆ اعىمداعى جىلعى 27-28 قاراشادا مەملەكەت باسشىسىنىڭ قاتىسۋىمەن استانادا وتەتىن قازاقستاننىڭ ازاماتتىق فورۋمى تۋرالى حاباردار ەتىپ, سونداي-اق وڭىردەگى ازاماتتىق قوعام ينستيتۋتتارىن دامىتۋ بويىنشا قابىلدانىپ جاتقان شارالارعا نازار اۋداردى.
مينيستر, قازاقستان رەسپۋبليكاسىنىڭ پرەزيدەنتى ءوز جولداۋىندا ازاماتتىق قوعاممەن ءتيىمدى بايلانىس قالىپتاستىرۋ ماسەلەسىن ەرەكشە باعىت رەتىندە بەلگىلەگەنىن اتاپ ءوتتى.
«سوڭعى كەزدەرى ازاماتتىق قوعام ينستيتۋتتارىنا قاتىستى كەلىپ تۇسەتىن بارلىق ماتەريالداردى قاراي كەلە, ءبىز جۇمىستى قايتا تۇرلەندىرۋ قاجەتتىلىگىن كورىپ وتىرمىز. الداعى ازاماتتىق فورۋمنىڭ ماقساتتارىنىڭ ءبىرى ۇكىمەتتىك ەمەس ۇيىمدار الاڭىن قايتا تۇرلەندىرۋ, تۇتاستاي العاندا ەلدەگى ازاماتتىق قوعامدى دامىتۋ بولىپ تابىلادى. ءبىز ازاماتتىق قوعامدى ەلدىڭ دامۋىنا تارتۋدىڭ جاڭا جولدارى بار ەكەنىن كورىپ وتىرمىز», - دەدى د.كالەتاەۆ.
قوعامدىق دامۋ ءمينيسترى ءوزىنىڭ ءىس-ساپارى اياسىندا قوعامدىق كەڭەستەردىڭ قىزمەتىنە ارنالعان رەسپۋبليكالىق كونفەرەنتسياعا قاتىستى, وندا قوعامدىق كەڭەستەردىڭ قىزمەتىن جەتىلدىرۋگە باعىتتالعان جوسپارلارىمەن ءبولىستى.
دارحان كالەتاەۆ مەملەكەتتىك قىزمەتشىلەردىڭ كەڭەس قۇرامىنداعى ۇلەسىن بارىنشا ازايتۋ, ۇەۇ-داردىڭ قاتىسۋىن 90 پايىزعا دەيىن كەڭەيتۋ جوسپارلانىپ وتىرىلعانىن اتاپ ءوتتى. بۇل رەتتە, ەكونوميكالىق ىنتىماقتاستىق جانە دامۋ ۇيىمىنىڭ سىبايلاس جەمقورلىققا قارسى ءىس-قيمىل بويىنشا ستامبۋل جوسپارىنىڭ ۇسىنىسىنا سايكەس كەڭەستەر قۇرامىن بەكىتەتىن جۇمىس توپتارىنا مەملەكەتتىك ورگانداردىڭ باسشىلارى ەمەس, ازاماتتىق قوعام وكىلدەرى جەتەكشىلىك ەتەتىنى ايتىلدى.
ءمينيستردىڭ اقپاراتى بويىنشا, قوعامدىق كەڭەستەردىڭ قىزمەتىنە ادىستەمەلىك جانە الەۋمەتتىك قولداۋ كورسەتۋ جونىندەگى ۋاكىلەتتى ورگاننىڭ فۋنكتسيالارىن قوعامدىق دامۋ مينيسترلىگىنە بەكىتۋ ۇسىنىلۋدا. بۇدان بولەك, قوعامدىق كەڭەستەردىڭ قىزمەتى بويىنشا جىل سايىن ۇلتتىق بايانداما شىعارۋ جوسپارلانۋدا.