قازاقستان مەن وزبەكستان ۇكىمەتى تاۋار اينالىمىن كەلەسى جىلى 5 ملرد اقش دوللارىنا جەتكىزۋدى كوزدەپ وتىر. بيىلعى 9 ايدا ساۋدا - تاۋار اينالىمىنىڭ كولەمى 2 ملرد اقش دوللارىنان اسقان.
شىمكەنتتە العاش رەت وتكەن قازاقستان مەن وزبەكستاننىڭ وڭىرارالىق ىنتىماقتاستىق فورۋمىندا وسىنداي دەرەكتەر كەلتىرىلدى. سونداي-اق بىرقاتار كەلىسىمدەر جاسالىپ, قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى اسقار مامين جانە وزبەكستان رەسپۋبليكاسى ۆيتسە-پرەمەرى اچيلباي راماتوۆ ارىپتەستىكتى دامىتۋ بويىنشا مەموراندۋمعا قول قويدى. ەكونوميكالىق ارىپتەستىكتى, ساۋدا قاتىناستارىن ايماقتار اراسىندا دامىتۋعا سەرپىن بەرۋدى ماقسات ەتكەن فورۋمدا ءتۇرلى يدەيالار مەن جوبالار تالقىلانىپ, كەلىسىمدەر جاسالدى. «قازاقستان - ءبىزدىڭ باستى ستراتەگيالىق سەرىكتەسىمىز. ءبىر جىلدىڭ ىشىندە ءبىزدىڭ ەلىمىز ەكونوميكانىڭ ءتۇرلى سالالارىندا جەتىستىككە جەتتى. 2018 جىلى ەكى ەل اراسىنداعى تاۋار اينالىمى ءوستى. ءالى دە جىل سوڭىنا دەيىن 3 ملرد دوللارعا جەتكىزۋگە مۇمكىندىك بار. بۇل - ناقتى مەجە», - دەدى اچيلباي راماتوۆ. سونداي-اق وزبەكستان ۇكىمەت باسشىسىنىڭ ءبىرىنشى ورىنباسارى فورۋم تەك قانا ساۋدا-ەكونوميكالىق قاتىناستاردى, ونەركاسىپ يندۋسترياسىن دامىتۋ عانا ەمەس, ەكى ەلدىڭ تۋىستىق قارىم - قاتىناستارىن, مادەني-رۋحاني بايلانىستارىن دا ارتتىراتىنىن اتاپ ءوتتى.
فورۋم بارىسىندا تۇركىستان وبلىسىنىڭ اكىمى جانسەيىت تۇيمەباەۆ پەن جيزاق وبلىسىنىڭ اكىمى ەرگاش ساليەۆپەن وڭىرلەر اراسىنداعى ساۋدا-ەكونوميكالىق جانە ينۆەستيتسيالىق ىنتىماقتاستىقتى نىعايتۋ جايىن تالقىلادى. ەكى وبلىس اراسىندا مەموراندۋم جاسالدى. سونداي-اق, اتالعان فورۋم شەڭبەرىندە قوس ەلدىڭ بىرقاتار وڭىرلەرى اراسىندا دا مەموراندۋم ءتۇزىلدى. تۇركىستان وبلىسىنان باسقا, قاراعاندى, شىعىس قازاقستان, قوستاناي وڭىرلەرىنىڭ جانە استانا, الماتى, شىمكەنت قالالارىنىڭ باسشىلىعى تۇزىلگەن 13 قۇجاتقا قول قويدى. مىسالى, اقمولا وبلىسىنىڭ اكىمى مəلىك مىرزالين مەن وزبەكستان رەسپۋبليكاسى سىرداريا وبلىسىنىڭ حوكيمى گوفۋرجون ميرزاەۆ əرىپتەستىك تۋرالى مەموراندۋمعا قول قويدى. «كوكشەتاۋدا ءبىز قۇنى 20 ميلليون اقش دوللارى جəنە «نوۆوپەك» جشس-مەن 10 ميلليون اقش دوللارى بولاتىن ەكسپورت بويىنشا ينۆەستيتسيالىق كەلىسىم جاسادىق. سىرداريا مەن اقمولا وبلىستارىنىڭ ۇقساستىعى كوپ. سوندىقتان ەكونوميكانىڭ وزگە دە سالالارىن بىرلەسىپ دامىتامىز», - دەدى سىرداريا وبلىسىنىڭ حوكيمى. جالپى ەكى ەل اراسىندا جاسالعان قۇجاتتارعا سايكەس بۇگىنگى كۇنى ەلىمىزدە 800-دەن استام كاسىپورىن وزبەك كاپيتالىنىڭ قاتىسۋىمەن جۇمىس ىستەپ كەلەدى ەكەن.
وڭىرارالىق فورۋم بارىسىندا ەكى ەلدىڭ اۋىل شارۋاشىلىعى تەحنيكالارى, ونەركاسىپ, جەڭىل جانە تاعام ونەركاسىبى, قۇرىلىس, جيھاز ءوندىرىسىنىڭ كورمەسى ءوتتى. كوپشىلىك نازارىنا اسىل تۇقىمدى شارۋاشىلىق, توقىما بۇيىمدارى, فارماتسەۆتيكا ونىمدەرى ۇسىنىلدى.
عالىمجان ەلشىباي,
«ەگەمەن قازاقستان»
شىمكەنت