رەسپۋبليكالىق دەڭگەيدەگى تۋرنير وبلىستىق «سارىارقا سامالى» گازەتىنىڭ 90 جىلدىق مەرەيتويى قارساڭىندا ۇيىمداستىرىلدى. ءتۋرنيردىڭ اشىلۋ سالتاناتىنا, وتكىزىلگەن كۇندەرى گازەتتە قىزمەت ەتكەن ارداگەرلەر جۋرناليستەر, وڭىردەگى سپورت سالاسىنىڭ وكىلدەرى قاتىستى.
- گازەت ۇجىمى سول كەزدەگى گازەت رەداكتورى مۇحيت وماروۆتىڭ باستاماسىمەن 2008 جىلدان باستاپ توعىزقۇمالاقتان جىل سايىن ء داستۇرلى تۋرنير وتكىزىپ كەلەدى. العاشىندا قاتىسۋشىلار سانى 180 بولسا, بۇگىنگى كۇنى تۋرنيرگە جەر-جەردەن 418 توعىزقۇمالاقشى كەلدى. ءوڭىردىڭ بارلىق اۋىلدارىنان, ەلىمىزدىڭ ءار وڭىرىنەن, اۋعانستان, ازەربايجان, قىتاي, موڭعوليا, تۇركيا ەلدەرىنىڭ توعىزقۇمالاقشىلارى قاتىسىپ, ءتۋرنيردى حالىقارالىق دەڭگەيگە كوتەردى, - دەيدى گازەتتىڭ باس رەداكتورى نۇربول جايىقباەۆ.
ال, موڭعوليانىڭ توعىزقۇمالاق فەدەراتسياسى پاۆلودارعا جارىسقا باراتىن توعىزقۇمالاقشىلار اراسىندا ارنايى ىرىكتەۋ وتكىزىپتى. جارىس كەزىندە زامانبەك قوجانياز ۇلى باستاپ كەلگەن بايان ولگەيلىك 11 ويىنشى توعىزقۇمالاق ويناۋدا بار شەبەرلىكتەرىن سالدى.
شارانىڭ جابىلۋ راسىمىنە دۇنيەجۇزىلىك توعىزقۇمالاق فەدەراتسياسىنىڭ ۆيتسە-پرەزيدەنتى, مەملەكەتتىك جاتتىقتىرۋشى داستان قاپاەۆ قاتىستى.
- جەرگىلىكتى جەردە وتكىزىلەتىن ءتۋرنيردىڭ حالىقارالىق دەڭگەيگە كوتەرىلىپ كەلە جاتقاندىعى قۋانتادى. ەكىنشىدەن, 400 دەن اسا توعىزقۇمالاقشىعا تورەلىك ەتۋ دە ۇلكەن جاۋاپكەرشىلىك. قاتىسۋشىلار جاس ەرەكشەلىكتەرىنە بايلانىستى 5 توپقا ءبولىنىپ, جارىسقا قاتىستى. سوڭىندا 60 توعىزقۇمالاقشى جۇلدەگە يە بولسا, «ەڭ جاس ويىنشى» اتالىمىن سەمەيلىك 5 جاستاعى ەردوس بەرىكقانوۆ يەلەندى, -دەيدى داستان قاپاەۆ.
سونىمەن, «شەبەرلىگىن شىڭداعانى ءۇشىن» نوميناتسياسى بويىنشا الماتى وبلىسىنان ايشا امانجول, «جەڭىسكە دەگەن قۇشتارلىعى ءۇشىن» سەمەيلىك اليعازى قايساروۆ لايىقتى دەپ تانىلدى.
تۋرنير ناتيجەسىندە پاۆلودارلىق توعىزقۇمالاقشىلار توپ جاردى. قىرعىزستاندا وتكەن «III دۇنيەجۇزىلىك كوشپەندىلەر ويىنىندا» توعىزقۇمالاقتان وبلىستىڭ باس جاتتىقتىرۋشىسى ارىستان قاپاەۆ باستاعان توعىزقۇمالاقشىلار التىننان القا تاقتى.
گازەت رەداكتورى نۇربول جايىقباەۆ ءتۋرنيردىڭ وتۋىنە قولداۋ بىلدىرگەن وبلىستىق دەنە شىنىقتىرۋ جانە سپورت باسقارماسىنا, پاۆلودار, ەكىباستۇز قالالىق اكىمدىگىنە, وبلىستىق كاسىپكەرلەر پالاتاسىنا, «ەرتىس مەديا» جشس-نە, شارباقتىلىق كاسىپكەر قيساميدەن ماشەنوۆكە, قالاداعى «شاحمات ءۇيىنىڭ» ۇجىمىنا العىسىن ايتتى.
فاريدا بىقاي,
«ەگەمەن قازاقستان»
پاۆلودار
سۋرەتتى تۇسىرگەن: دارحان ومىرزاقوۆ