«مەنىڭ اۋلام» باعدارلاماسى بويىنشا سەمەيدە 9 اۋلا جوندەلدى. وبلىس اكىمى دانيال احمەتوۆ سەمەي قالاسىنا جۇمىس ساپارى كەزىندە قوستاناي, 79 جانە ماماي باتىر, 92 مەكەنجايلارىندا بولىپ, جىل سايىن اۋلالاردى جوندەۋگە ميلليارد تەڭگەدەن استام قارجى جۇمسالاتىندىعىن ايتتى. وسى اتالعان كوشەلەردەگى كوپپاتەرلى ۇيلەردە تۇراتىن سەمەيلىك وتباسىلار ءۇشىن «مەنىڭ اۋلام» باعدارلاماسىنىڭ ورىندالۋى ايرىقشا قۋانىش بولدى.
تۇرعىندار اۋلالارىنا جينالىپ, ريزاشىلىقتارىن ءبىلدىردى. تۇرعىندار اتىنان ءسوز العان پيك ءتورايىمى ءدىلدا جەلدىباەۆا دانيال كەنجەتاي ۇلىنا اۋلالارعا جاعداي جاساپ قانا قويماي, بەينەباقىلاۋ كامەرالارىن دا ورناتقاندىقتارىن ايتا كەتتى.
− ەلباسىمىز بيىلعى جولداۋىندا حالىقتىڭ ءال-اۋقاتىن ارتتىرۋدى تاپسىرىپ وتىر, ءبىز بۇل مىندەتتەردى ورىنداۋىمىز قاجەت. بالالار وينايتىن الاڭدار, كەشكە قاراي اقساقالدار باس قوساتىن ورىندار بولۋى كەرەك. مىنە, 100 ءتۇپ كوشەت وتىرعىزدىق دەپ جاتىر, بۇل تاماشا ءىس. ەندى سەمەيدىڭ سىرتىنداعى ارالدى دا قالىپقا كەلتىرىپ, سالاماتتى تۇردە دەمالاتىن ورىنعا اينالدىرامىز. بەينەباقىلاۋ كامەرالارى بار اۋلالار وسكەمەندە دە, سەمەيدە دە بولادى. وسى ارقىلى دامىعان ەلدەردىڭ مادەنيەتىنە جەتەمىز, اۋلالاردى كورىكتەندىرۋدى جىلما-جىل جالعاپ وتىرامىز, − دەدى دانيال احمەتوۆ.
ايتا كەتۋ كەرەك, قالادا العاشقى 9 اۋلا جوندەلۋى ءۇشىن 611 ميلليون تەڭگە قاراجات قاراستىرىلعان. قازىرگى ۋاقىتتا 405 ميلليون تەڭگە ناقتى 6 اۋلا ءۇشىن بەرىلگەن. قالعان ءۇش اۋلانىڭ جوبا-سمەتالىق جۇمىستارى قاراستىرىلۋدا. الدا تاعى دا اۋلالار جوندەلۋى ءۇشىن قارجىلار قاراستىرىلماق.
− «مەنىڭ اۋلام» باعدارلاماسى 3 جىلعا نەگىزدەلگەن. وسى ءۇش جىل ىشىندە قالادا 62 بىرلەسكەن اۋلالاردى جوندەۋ كوزدەلىپ وتىر, − دەدى قالا اكىمى ەرماك ءسالىموۆ, − جوندەلەتىن اۋلالار كوميسسيا ارقىلى تاڭدالىپ الىندى. باستى تالاپ − اۋلانىڭ كەڭ اۋماعى جانە جەكەمەنشىك پيك جەتەكشىلىگى بولۋى كەرەك. قاريالار وتىرىپ دەمالاتىن ورىندىقتار, بالالار وينايتىن الاڭقايلار, سپورتپەن اينالىسۋعا بولاتىن باسكەتبول, ۆولەيبول, فۋتبول الاڭدارى, اۋلانىڭ جارىقپەن قامتىلۋى سياقتى كوپتەگەن ماڭىزدى دۇنيەلەر وسىنىڭ ىشىنە كىرەدى.
راۋشان قابجانقىزى,
«ەگەمەن قازاقستان»
سەمەي