اماندىق باتالوۆ باستاعان الماتى وبلىسىنىڭ دەلەگاتسياسى قوستاناي وبلىسىندا بولدى. دەلەگاتسيا الدىمەن قوستانايدىڭ سوڭعى جىلدارداعى جەتىستىكتەرى – يندۋستريالىق ايماقتى, «بايان سۇلۋ» كونديتەر فابريكاسىنىڭ جاڭعىرتىلعان تسەحتارىن, «سارىارقااۆتوپروم» ماشينا جاساۋ زاۋىتىن جانە بىرنەشە سپورت نىسانىن ارالاپ كوردى.
قوناقتار «سارىارقااۆتوپروم» زاۋىتىندا بولعاندا الماتى وبلىسىنىڭ اكىمى ا.باتالوۆقا تالدىقورعانداعى بالالار ءۇيى ءۇشىن «Peugeot 301» ماشيناسىنىڭ كىلتى تابىس ەتىلدى. الماتى وبلىسىنىڭ اكىمى قوستانايلىق زاۋىتتا قۇراستىرىلىپ جاتقان اۆتوبۋستار مەن جۇك ماشينالارىنا قىزىعۋشىلىق ءبىلدىردى.
– ءبىز جۇردەك ماشينالاردى شەتەلدەرگە شىعارىپ جاتىرمىز. بيىل 11 مىڭ ماشينانى ساپقا قويامىز, كەلەسى جىلى بۇل كورسەتكىش ەكى ەسە كوبەيەتىن بولادى. كاسىپورىندا ءبىر مىڭ ادام جۇمىس ىستەيدى, ورتاشا جالاقىسى − 125 مىڭ تەڭگە. الداعى ۋاقىتتا جالاقىنى ءوسىرۋ ويدا بار. ەكسپورت كولەمى بيىل 7 پايىزعا ارتتى, – دەدى «الليۋر» كومپانيالار توبى» اق ديرەكتورلار كەڭەسىنىڭ توراعاسى اندرەي لاۆرەنتەۆ.
ەكىجاقتى كەزدەسۋدە قوستاناي وبلىسىنىڭ اكىمى ارحيمەد مۇحامبەتوۆ قوستاناي وبلىسى مەن الماتى وبلىسىنىڭ اراسىنداعى ەكونوميكالىق بايلانىس نىعايا تۇسكەنىن اتاپ ءوتتى. مىسالى, وتكەن جىلى الماتى وبلىسىنا قوستاناي وڭىرىنەن جىبەرىلگەن ونىمدەر قۇنى 9 ميلليارد تەڭگەدەن اسقان. بۇل بۇرناعى جىلمەن سالىستىرعاندا 14 پايىزعا كوپ. سونداي-اق جەتىسۋلىق بيزنەس وكىلدەرىنىڭ قوستانايعا ارتقان ءونىمى دە وسى شامالاس بولادى.
ا.مۇحامبەتوۆ ىنتىماقتاسىپ وتىرعان ەكى وبلىس تا شەكارالىق ءوڭىر ەكەنىن اتاپ ايتتى. الماتى وبلىسى قىتايمەن, قوستاناي رەسەيمەن شەكتەسەدى. مۇنىڭ ءوزى ەكى وبلىستىڭ دا نارىعىن كەڭەيتە تۇسەدى. بۇل قوس وبلىستىڭ مەموراندۋم بويىنشا ينۆەستيتسيا سالۋىنا قولايلىلىق تۋعىزادى. ارحيمەد بەگەجان ۇلى رەسەيگە ينۆەستيتسيا سالاتىن الماتىلىق كاسىپكەرلەرگە قوستانايدا وزدەرىنىڭ وكىلدىگىن اشۋىنا ۇسىنىس جاسادى. توبىل-تورعاي ءوڭىرىنىڭ جەتىسۋلىقتارعا ۇسىنارى دا جەتكىلىكتى.
– ءبىز وزىمىزدە قۇراستىرىلىپ جاتقان ماشينالار مەن تراكتورلار, كومبايندار مەن باسقا دا اۋىلشارۋاشىلىعى تەحنيكالارىن بەرە الامىز. وسى جىلى رۋدنىي قالاسىندا قۋاتتى زاماناۋي تسەمەنت زاۋىتى ىسكە قوسىلادى, سىزدەرگە قىتايمەن شەكاراداعى جاڭادان سالىنىپ جاتقان نۇركەنت قالاسىنىڭ قۇرىلىسى ءۇشىن ونىڭ ءونىمىن ارتتىرۋعا ابدەن بولادى, – دەدى ا.مۇحامبەتوۆ. سونىمەن قاتار جەتىسۋدىڭ اسەم تابيعاتىن كورۋگە, كورىكتى جەرلەرىن ارالاپ, دەمالۋعا قوستانايلىقتاردىڭ ىنتالى ەكەنى ايتىلدى.
ال الماتى وبلىسىنىڭ اكىمى ا.باتالوۆ ءوزىنىڭ وسكەن جەرى − قوستاناي وبلىسىنىڭ كوركەيگەنىن كورىپ قۋانعانىن جاسىرمادى. جەتىسۋلىق دەلەگاتسيا قوستاناي قالاسىنداعى مەملەكەت-جەكەمەنشىك ارىپتەستىگىمەن سالىنعان قۇرىلىستار, تۇرعىن ۇيلەر جانە قالانى كوركەيتۋ جۇمىستارىنان وزىق تاجىريبە دە الۋدى ۇيعاردى. ارينە, ءىرى مەگاپوليس − الماتى قالاسى تۇرعان وبلىستى قوستاناي وڭىرىمەن سالىستىرۋعا بولمايدى. ولاردا 6 يندۋستريالىق ايماق بار, ال قوستانايدا بىرەۋى ەندى سالىنىپ جاتىر. بىراق ا.باتالوۆ ينۆەستيتسيا تارتۋ جونىنەن قوستاناي وبلىسىنىڭ العا كەتكەنىن مويىندادى. قوستانايداعى يندۋستريالىق ايماقتىڭ ينۆەستورلار ءۇشىن سونشالىقتى قولايلى ەتىپ سالىنىپ جاتقانىنا جوعارى باعا بەردى.
جەتىسۋلىق ارىپتەستەر قوستانايلىق ينۆەستورلارعا جەر تەلىمىن بەرۋگە ۋادە ەتتى. تالدىقورعان قالاسىندا «بايان سۇلۋ» كونديتەر فابريكاسىنىڭ ساۋدا پاۆيلونى سالىناتىن بولادى. دەمەك, «بايان سۇلۋدىڭ» ساپالى ءونىمى قازاقستاننىڭ وڭتۇستىك, شىعىس ايماقتارىنا شىعارىلۋى ءۇشىن مول مۇمكىندىك تۋادى.
– «بايان سۇلۋ» كونديتەر فابريكاسى ءۇشىن قانتتى دا وزىمىزدەگى زاۋىتتان بەرەمىز. جەتىسۋلىقتار قانت قىزىلشاسىنىڭ القاپتارىن كەڭەيتىپ, ونىمدىلىك ءۇشىن دە زاماناۋي تەحنولوگيالاردى پايدالانىپ جاتىر. قىزىلشا القاپتارىنداعى جۇمىستارعا قوستانايدا قۇراستىرىلعان «بەلارۋس» تراكتورىن پايدالاناتىن بولامىز, – دەدى ا.باتالوۆ.
قوس وبلىستىڭ اكىمدەرى ىنتىماقتاستىق جونىندەگى مەموراندۋمعا قول قويدى. وندا كورسەتىلگەن نەگىزگى جۇ-مىس باعىتتارىن ناقتىلاي ءتۇسۋ ءۇشىن ەكى وبلىس اكىمدەرىنىڭ ورىنباسارلارىنا تاپسىرما بەرىلدى.
ءنازيرا جارىمبەت,
«ەگەمەن قازاقستان»
قوستاناي