ەلىمىزدە قۇنى 55 تەڭگە تۇراتىن ەڭ تومەنگى قوعامدىق كولىك جولاقىسى اقتوبەدە بولاتىن. وتكەن قازان ايىنىڭ اياعىندا قالاداعى جولاقى ءتاريفى 80 تەڭگەگە كوتەرىلدى. سونداي-اق زەينەتكەرلەر ءۇشىن − 60, 7-15 جاس ارالىعىنداعى بالالار ءۇشىن 40 تەڭگە كولەمىندە بەلگىلەندى.
اۆتوبۋستارداعى جولاقى قۇنى وسكەننەن كەيىن, بۇل وزگەرىس جۇرگىنشىلەرگە كورسەتىلەتىن سەرۆيستىك قىزمەتتىڭ دەڭگەيىنە دە اسەر ەتۋى كەرەك. سونىمەن ءبىر مەزەتتە قىزمەت كورسەتۋ مادەنيەتى مەن ساپاسىن كوتەرۋ قاجەت. ارينە, مۇنىڭ ءوزى ءبىر كۇندە نەمەسە ءبىر-ەكى ايدا تىندىرىلا قوياتىن ءىس ەمەس ەكەنى بەلگىلى. دەگەنمەن, وبلىس ورتالىعىندا جۇرگىنشىلەردى تاسىمالداۋمەن اينالىساتىن باستى ەكى قۇرىلىم – «اۆتوپارك» پەن «جولاۋشىلار اۆتوكولىك كاسىپورنى» جشس-نىڭ وكىلدەرى بۇل ماسەلەگە بۇگىننەن باستاپ كوڭىل اۋدارسا, ۇتىلماسى انىق. سالادا بەلگىلەنگەن ءتيىستى نورماتيۆتەر مەن تالاپتارعا سايكەس ءتاريفتىڭ كوتەرىلگەن جاعدايىندا تاسىمالداۋشىلار قوعامدىق كولىكتى GPS-ترەكەرلەر سەكىلدى زاماناۋي قوندىرعىلارمەن جابدىقتاۋى كەرەك. وسى ارقىلى قوزعالىس كەستەسى مەن ءجۇرۋ جيىلىگىن ءبىرشاما رەتتەۋگە بولادى.
بۇگىندە جۇرگىزۋشىلەر مەن جولاۋشىلار وسى ماسەلەگە بايلانىستى ورىندى وكپە-رەنىشتەرىن ءبىلدىرىپ ءجۇر. رەداكتسيامىزعا حابارلاسقان تۇرعىنداردىڭ ايتۋىنشا, قالالىق اۆتوبۋستار كوپ جاعدايدا قوزعالىس كەستەسى مەن ءجۇرۋ ارالىعىن ساقتاي بەرمەيدى. اسىرەسە, جاڭبىرلى, لايساڭ, ايازدى ماۋسىمداردا اۆتوبۋس كۇتۋشىلەردىڭ شىدامى تاۋسىلادى. وبلىس ورتالىعىنىڭ تۇرعىندارى قالالىق باعىتتار بويىنشا قىزمەت كورسەتەتىن اۆتوبۋستاردىڭ مەرزىمىنەن ەرتە توقتايتىنىن ايتادى.
ال قالالىق جولاۋشىلار كولىگى جانە اۆتوموبيل جولدارى ءبولىمىنىڭ باسشىسى رۋسلان تورەعالي ءار باعىتتىڭ جۇمىسىن اياقتايتىن ءتيىستى ۋاقىتى بەكىتىلگەنىن جەتكىزدى. بۇل ورتالىق كوشەلەردەگى باستى باعىتتاردا ساعات 22.00-گە دەيىن بەلگىلەنگەن. ال قالا ماڭىنداعى اۋىلدارعا قاتىنايتىن باعىتتاردا بۇل ۋاقىت كەشكى 20.00-21.00-گە ەسەپتەلگەن. دەگەنمەن, بارلىق قالالىق باعىتتاعى اۆتوبۋستار قىزمەتى اياقتالۋىنىڭ ءبىر ۋاقىتقا سايكەس كەلە بەرمەۋى جولاۋشىلار تاسقىنىنا, ياعني ونىڭ ازدىعى مەن كوپتىگىنە بايلانىستى تۋىندايدى.
اقتوبە وبلىستىق اۆتوموبيل جولدارى جانە جولاۋشىلار كولىگى باسقارماسىنىڭ باسشىسى ايازباي وسمانعاليەۆكە حابارلاسقانىمىزدا, ول الداعى ۋاقىتتا قالالىق باعىتتارداعى ايالدامالاردا ەلەكتروندى تابلو ورناتۋ ءىسى قولعا الىناتىنىن ايتتى. وسى ارقىلى قوعامدىق كولىكتەردىڭ ءجۇرۋ كەستەسىن ءجىتى زەردەلەپ وتىرۋعا بولادى. قازىرگى كۇنى جاڭا تەحنولوگيانى ەنگىزۋگە قاتىستى ءتيىستى تالداۋلار مەن ازىرلىك جۇمىستارى جۇرگىزىلۋدە.
بۇگىندە جولاۋشىلار تاسىمالداۋ جۇيەسىندە قىزمەت كورسەتۋ مادەنيەتىن كوتەرۋدىڭ ماڭىزى جوعارى. بۇل ءوز كەزەگىندە الەۋمەتپەن قاتىستى قىزمەتتى الەمدىك نورماتيۆتەر مەن ستاندارتتار جۇيەسىنە ءبىرشاما جاقىنداتا تۇسەدى. ماسەلەن, ەلەكتروندى بيلەتتەر جۇيەسىن ەنگىزۋ سياقتى قاناتقاقتى جوبا كەيبىر اۆتوبۋستاردا قولدانىلا باستادى. مۇنداي جاعدايدا كوندۋكتورلار مەن جۇرگىزۋشىلەر بيلەت قۇنىنىڭ بەلگىلى ءبىر بولىگىن قىمقىرىپ قالا المايدى. بارلىق تابىس جولاۋشىلار تاسىمالداۋ كاسىپورىندارىنا تۇسەدى.
بۇعان دەيىنگى تالداۋلار وبلىس ورتالىعىنداعى جانە قالا ماڭىنداعى باعىتتار ءۇشىن كەم دەگەندە 400 اۆتوبۋس قاجەت ەكەنىن كورسەتەدى. بۇگىندە باعىتتارعا شىعىپ جۇرگەن قوعامدىق كولىكتەردىڭ سانى 300-ءدىڭ ۇستىندە. قالاداعى اۆتوپاركتەردى جاڭعىرتۋ, جاڭا اۆتوبۋستار الۋ ءجون-اق. الايدا, جولاۋشىلار تاسىمالداۋ ىسىندەگى بارلىق تۇيتكىل مۇنىمەن شەشىلمەيدى. بۇل تىعىرىقتان شىعۋدىڭ باستى جولدارىنىڭ ءبىرى كەيبىر قالالىق باعىتتاردى وڭتايلاندىرۋ بولماق. وسى ورايدا قوس كاسىپورىن اراسىندا بىرىنشىسىنەن ەكىنشىسىنە اۋىسىپ جاتقان باعىتتار دا بار. وڭتايلاندىرۋ ءىسىنىڭ باستى ماقساتى, ءبىر ورامدار مەن كوشەلەردەگى باعىتتاردىڭ سانىن كوبەيتۋدەن, كەي جاعدايلاردا ونى بىرىكتىرۋدەن تۋىندايدى.
اقتوبە قالاسىندا اۆتوبۋس جۇرگىزۋشىلەرى قات. ونىڭ ءتۇرلى سەبەبى بار. سونىڭ ءبىرى – جۇرگىزۋشىلەر جالاقىسىنىڭ تومەندىگى. سوندىقتان تاسىمالداۋشى كاسىپورىندار ازىن-اۋلاق كەمشىلىكتەرى ءۇشىن جۇرگىزۋشىلەردى جۇمىستان شىعارۋعا مۇددەلى ەمەس. جۇرگىزۋشىلەر قاتارىنىڭ كەمۋىنە قوعامدىق اۆتوكولىك جۇرگىزۋ قۇقى دا اسەر ەتەدى. ماسەلەن, الداعى ۋاقىتتا D كاتەگورياسىن يەلەنۋ ءۇشىن جۇرگىزۋشىلەرگە كەم دەگەندە ءۇش جىل ۋاقىت قاجەت بولادى, دەيدى اقتوبە اۆتوپاركىنىڭ رەسمي وكىلى رۋسلان جىلقامانوۆ. بۇل قادام جۇرگىزۋشىلەردىڭ بىلىكتىلىگىن كوتەرۋ جانە جولاۋشىلار قاۋىپسىزدىگىن قامتاماسىز ەتۋ ماقساتىندا تۋىنداپ وتىر. جالپى, ءتاريفتىڭ كوتەرىلگەنى قوعامدىق كولىك جۇرگىزۋشىلەرىنىڭ جالاقىسىن قايتا قاراۋعا ءارى ونى وسىرۋگە مۇمكىندىك بەرمەك.
ءيا, اقتوبەدە قوعامدىق كولىكتەردەگى ءتاريفتىڭ كوتەرىلگەنى جۇرگىزۋشىلەر جالاقىسىنىڭ وسۋىنە عانا ەمەس, سونىمەن بىرگە قىزمەت كورسەتۋ ساپاسىنىڭ جاقسارۋىنا دا ىقپالىن تيگىزسە يگى.
تەمىر قۇسايىن,
«ەگەمەن قازاقستان»
اقتوبە