قازاقستاننىڭ بارلىق ايماعىندا جىل بويى اتالىپ ءوتىپ كەلە جاتقان ۇلى كۇيشى قۇرمانعازى ساعىرباي ۇلىنىڭ 200 جىلدىق مەرەيتويىنا ارنالعان شارالار جيىنتىعىنىڭ اۋقىمدىسى ءوزى اتىن يەلەنىپ وتىرعان قۇرمانعازى اتىنداعى ۇلتتىق كونسەرۆاتوريادا جالعاسىن تاپتى.
مادەنيەت جانە سپورت مينيسترلىگىنىڭ قولداۋىمەن «بابادان امانات» اتتى ءداستۇرلى مۋزىكا فەستيۆالى اياسىندا وتكەن ء«داستۇرلى مۋزىكا: تاريح جانە تەوريا ماسەلەلەرى» اتتى حالىقارالىق عىلىمي-تاجىريبەلىك كونفەرەنتسيا وزىنە دەيىنگى بارلىق شارالاردى ءارى تولىقتىرىپ, ءارى تۇيىندەگەندەي بولدى. جيىنعا مادەنيەت جانە سپورت مينيسترلىگى مەن ءبىلىم جانە عىلىم مينيسترلىگىنىڭ وكىلدەرى, قازاقستان, رەسەي, وزبەكستان, قىرعىزستان سەكىلدى كۇيشىلىك ونەر قالىپتاسقان كورشى ەلدەردە كومپوزيتور مۇراسىن زەرتتەۋمەن اينالىساتىن جانە كۇي ونەرىن زەردەلەيتىن بەلگىلى عالىمدار, تانىمال مۋزىكا ماماندارى, سونداي-اق استانا, اتىراۋ, ورال قالالارىنان ارنايى شاقىرىلعان قوناقتار قاتىستى.
عىلىمي كونفەرەنتسيانى اشقان ۇلتتىق كونسەرۆاتوريانىڭ رەكتورى, قازاقستاننىڭ ەڭبەك سىڭىرگەن قايراتكەرى ارمان جۇدەباەۆ قازاق ۇلتتىق مۋزىكا ونەرىندە ايىرىقشا ورىن الاتىن كۇرەسكەر كۇيشى, داۋلەسكەر دومبىراشى قۇرمانعازىنىڭ رۋحتى شىعارمالارىنىڭ تابيعاتى مەن تاريحىنا از-كەم توقتالىپ ءوتتى. «بۇگىن ءبىزدىڭ تالاي ءدۇلدۇلدى باپتاعان كيەلى شاڭىراعىمىزدا كۇيشى بابامىز قۇرمانعازىنىڭ 200 جىلدىق مەرەيتويى قۇرمەتىنە ەكى بىردەي ۇلكەن شارانىڭ شىمىلدىعى ءتۇرىلىپ وتىر. ونىڭ ءبىرى «بابادان امانات» اتتى ءداستۇرلى مۋزىكا فەستيۆالى بولسا, ەندى ءبىرى وسى فەستيۆال اياسىندا الىس-جاقىنداعى مۋزىكا مايتالماندارىنىڭ باسىن قوسىپ, كۇي جانە كۇيشىلىك ونەر تۋرالى عىلىمي پايىم مەن تۇجىرىمدامالار جاسالاتىن حالىقارالىق عىلىمي كونفەرەنتسيا مادەنيەتىمىزدەگى ايتۋلى وقيعا بولىپ وتىر. الداعى جىلدى ەلباسىمىز «جاستار جىلى» دەپ جاريالادى, سول سەبەپتى بابادان قالعان مۇرانى جاستار جالعاستىرسىن, قاسيەتىن-كيەسىن سەزىنسىن دەگەن نيەتپەن اۋقىمدى شارانى ستۋدەنتتەرىمىز بەن جاس عالىمدارىمىزدى قاتىستىرا وتكىزىپ وتىرمىز. ۇلتتىق بولمىسىمىزدى جاڭعىرتۋ مۇددەسىندە بۇل فەستيۆالدىڭ ماڭىزى زور» دەدى ارمان جۇدەباەۆ.
عىلىمي كونفەرەنتسيادا سەرجان شاكىرات, ەدىگە نابيەۆ, الماس الماتوۆ, قاتيموللا بەردىعاليەۆ, ايتجان توقتاعانوۆ, ورىنباي دۇيسەن سەكىلدى بەلگىلى كۇيشىلەر مەن جىرشى, فولكلور تانۋشىلار دا قاتىسىپ, قۇرمانعازى تۇلعاسى ارقىلى جالپى كۇيشىلىك ونەردىڭ ءورىسى مەن وركەندەۋى تۋرالى سالماقتى اڭگىمە ءوربىتتى.
پ.چايكوۆسكي اتىنداعى ماسكەۋ مەملەكەتتىك كونسەرۆاتورياسىنىڭ پروفەسسورى, ونەرتانۋ دوكتورى ۆيولەتتا يۋنۋسوۆا ازياداعى ءداستۇرلى مۋزىكا تاريحىنىڭ زاماناۋي عىلىمي باعىتتارمەن توقايلاسۋى تۋرالى اڭگىمەلەسە, ءداستۇرلى قازاق مۋزىكا مادەنيەتىنىڭ ماڭىزى مەن دامۋى جونىندە پروفەسسور سايدا ەلامانوۆا وي ءوربىتتى.
سونداي-اق كونفەرەنتسيادا دينانىڭ ورىنداۋشىلىق مانەرى, اقان سەرىنىڭ اندەرىندەگى سوپىلىق سارىن, جەتىسۋدىڭ وڭتۇستىك-باتىسىنداعى ءان فولكلورىنىڭ قازىرگى تاڭداعى جاي-كۇيى, سىر وڭىرىندەگى جىراۋلىق ءداستۇردىڭ زەرتتەلۋى, ارقا دومبىراسىنىڭ پەرنەلىك جۇيەسى تۋرالى مۋزىكا زەرتتەۋشىلەرى مەن بولاشاق عىلىم ماگيسترلەرى مازمۇندى باياندامالار جاسادى. كۇيدى ورىنداۋ ونەرىندەگى جەكە تالعام دا ءسوز بولماي قالعان جوق. ماسەلەن, قازانعاپ كۇيشىلىك مەكتەبىنىڭ كورنەكتى وكىلى باقىت باسىعاراەۆتىڭ, كۇيشى رىسباي عابديەۆتىڭ, قىزىربەك جاناسىل ۇلىنىڭ, ايتباي مۇزداحانوۆتىڭ, ايتقالي جايىموۆتىڭ, ماعاۋيا ءحامزيننىڭ, قۇراقتىڭ دوسجانىنىڭ كۇيلەرى مەن وزىنە ءتان ەرەكشەلىكتەرىن, كۇي ونەرىندەگى ورنى مەن مۋزىكاعا قوسقان ۇلەسىن ونەرتانۋشى ماماندار قىزىقتى دەرەكتەر مەن مالەمەتتەر نەگىزىندە اڭگىمەلەپ بەردى.
ايگۇل احانبايقىزى,
الماتى