يتاليالىق تانىمال جۋرناليست تانكرەدي پالمەري ءوزىنىڭ Twitter الەۋمەتتىك جەلىسىندەگى پاراقشاسىندا الەمدە ەڭ كوپ جالاقى الاتىن 10 فۋتبولشىنىڭ ءتىزىمىن جاريالادى.
تانكرەدي پالمەريدىڭ زەرتتەۋى بويىنشا, ليونەل مەسسي الەمدە ەڭ كوپ جالاقى الاتىن فۋتبولشىلاردىڭ كوشىن باستاپ تۇر. ونىڭ جالاقىسى – 40 ميلليون ەۋرو. وسى جازدا «يۋۆەنتۋس» كلۋبىنا اۋىسقان كريشتيانۋ رونالدۋ جاڭا كومانداسىندا جىلىنا 31 ميلليون ەۋرو جالاقى الادى. ۇزدىك ۇشتىكتە پسج كلۋبىنىڭ فۋتبولشىسى نەيمار تۇر. ونىڭ جىلدىق تابىسى – 30 ميلليون ەۋرو.
ۇزدىك وندىققا اندرەس ينەستا (25 ملن), وسكار (24 ملن), الەكسيس سانچەس (22,5 ملن), انتۋان گريزمانن (20 ملن), حالك (20 ملن), حاۆەر ماسكەرانو (19 ملن) جانە گابي (19 ملن) ەنگەن.
ءالي بيتورە,
«ەگەمەن قازاقستان»