بۇگىن ءوڭىر اكتيۆىنىڭ جينالىسىندا اتىراۋ وبلىسىنىڭ اكىمى نۇرلان نوعاەۆ جاڭا ورىنباساردى تانىستىردى.
- پرەزيدەنت اكىمشىلىگىنىڭ كەلىسىمىمەن جانە وبلىس اكىمىنىڭ وكىمىمەن نۇرلان باقتىباي ۇلى تاۋباەۆ وبلىس اكىمىنىڭ جاڭا ورىنباسارى بولىپ تاعايىندالدى, - دەدى نۇرلان نوعاەۆ.
بۇعان دەيىن بۇل قىزمەتتى اتقارعان سۇيىنشاليەۆ جاسۇلان اسقار ۇلى وسى لاۋازىمنان بەرگەن وتىنىشىنە سايكەس ءوز ەركىمەن بوساتىلدى.
- مەن جاسۇلان اسقار ۇلىنا وسى قىزمەتتە اتقارعان جەمىستى جانە بەلسەندى جۇمىسى ءۇشىن العىسىمدى بىلدىرەمىن. ءسىزدىڭ جۇمىسىڭىزدىڭ بارىسىندا وبلىستا كوپتەگەن جوبالار جۇزەگە اسىرىلدى. قۇرىلىس جانە تكش سالاسى جاڭا سەرپىن الدى. سىزگە الداعى ۋاقىتتا دا جاڭا جۇمىس سالاسىندا ءوز ىسىنە ادال بولۋعا جانە ءوز قىزمەتىن كاسىبي جۇزەگە اسىرۋعا تىلەكتەسپىن, - دەدى نۇرلان نوعاەۆ.
اكىمنىڭ ورىنباسارى بولىپ تاعايىندالعان نۇرلان تاۋباەۆتىڭ تۇرعىن ءۇي-كوممۋنالدىق, اۆتوموبيل, قۇرىلىس سەكتورىنا جەتەكشىلىك ەتۋگە مۇمكىندىك بەرەتىن ۇلكەن جۇمىس تاجىريبەسى بار.
- مەن نۇرلان باقتىباي ۇلىنىڭ تاجىريبەسى مەن ءبىلىمى قويىلعان مىندەتتەردى جۇزەگە اسىرۋ ءۇشىن پايدالى بولاتىنىنا سەنىمدىمىن. ونىڭ ءۇش جوعارى ءبىلىمى بار. ەڭبەك قىزمەتىنىڭ باسىندا بيزنەس سالاسىندا جۇمىس ىستەدى. قر ۇلتتىق ەكونوميكا مينيسترلىگى تابيعي مونوپوليالاردى رەتتەۋ, باسەكەلەستىكتى جانە تۇتىنۋشىلاردىڭ قۇقىقتارىن قورعاۋ كوميتەتىنىڭ اتىراۋ وبلىسى بويىنشا دەپارتامەنتىندە ءارتۇرلى لاۋازىمداردا قىزمەت اتقاردى. 2015 جىلى وسى دەپارتامەنتتى باسقاردى. 2018 جىلدىڭ باسىنان وسى كۇنگە دەيىن اتىراۋ قالاسى اكىمىنىڭ ورىنباسارى قىزمەتىن اتقاردى. بۇل ءوڭىر ءۇشىن قاجەتتى جوبالاردى دامىتۋعا باعىتتالعان مىندەتتەردى ىسكە اسىرۋ ءۇشىن ونىڭ ءبىلىمى جەتكىلىكتى ەكەنىن كورسەتەدى, - دەپ اتاپ ءوتتى نۇرلان نوعاەۆ.
نۇرلان تاۋباەۆ 1976 جىلى اتىراۋ قالاسىندا دۇنيەگە كەلگەن. اتىراۋ مۇناي جانە گاز ينستيتۋتىن, قازاقستان ەكونوميكا جانە قۇقىق ينستيتۋتىن, ح. دوسمۇحامەدوۆ اتىنداعى اتىراۋ ۋنيۆەرسيتەتىن تاۋ – كەن ينجەنەرى, زاڭگەر, ەكونوميست-مەنەدجەر ماماندىعى بويىنشا بىتىرگەن.
ەڭبەك جولىن 1995 جىلى "ەكسپرەسس-يۋگ" جشس ديرەكتورىنىڭ ورىنباسارى بولىپ باستاعان, 1998-2000 جىلدارى "دەنساۋلىق" جشس جانە "يسلام" جشس ديرەكتورى بولىپ جۇمىس ىستەگەن.
2000-2006 جىلدارى اتىراۋ قالاسىنىڭ تۇرعىن ءۇي-كوممۋنالدىق شارۋاشىلىق, جولاۋشىلار كولىگى جانە اۆتوموبيل جولدارى ءبولىمىنىڭ باسشىسى, 2006-2008 جىلدارى باسەكەلەستىكتى قورعاۋ كوميتەتى اتىراۋ وبلىسىنىڭ مونوپوليالاردى رەتتەۋ باسقارماسىنىڭ باسشىسى قىزمەتتەرىن اتقاردى.
2008-2012 جىلدارى قر باسەكەلەستىكتى قورعاۋ اگەنتتىگىنىڭ (مونوپولياعا قارسى اگەنتتىك) اتىراۋ جانە ماڭعىستاۋ وبلىستارى بويىنشا وڭىرارالىق ينسپەكتسياسىنىڭ باستىعى, ال 2012-2014 جىلدارى اتىراۋ وبلىسى بويىنشا مونوپولياعا قارسى ينسپەكتسيانىڭ باسشىسى بولدى.
2014-2015 جىلدارى قر ۇلتتىق ەكونوميكا مينيسترلىگى تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتىنىڭ ستراتەگيالىق تالداۋ باسقارماسىنىڭ باس ساراپشىسى بولىپ جۇمىس ىستەدى.
2015-2017 جىلدارى قر ۇلتتىق ەكونوميكا مينيسترلىگى تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتىنىڭ اتىراۋ وبلىسى بويىنشا دەپارتامەنتىنىڭ باسشىسى قىزمەتىن اتقاردى.
2017 جىلدان 2018 جىلعى 15 اقپانعا دەيىن قر ۇلتتىق ەكونوميكا مينيسترلىگى تابيعي مونوپوليالاردى رەتتەۋ, باسەكەلەستىكتى جانە تۇتىنۋشىلاردىڭ قۇقىقتارىن قورعاۋ كوميتەتىنىڭ اتىراۋ وبلىسى بويىنشا دەپارتامەنتىنىڭ باسشىسى بولدى.
2018 جىلدىڭ 15 اقپانىنان بۇگىنگى كۇنگە دەيىن اتىراۋ قالاسى اكىمىنىڭ ورىنباسارى.