قىزىلجار وڭىرىندەگى ءبىلىم مەكەمەلەرى وزىق تەحنولوگياعا كوشە باستادى. 80 نىسانعا ءپيروليزدى ۇزاق جاناتىن قازاندىق قويىلىپ, سونىڭ ارقاسىندا ءار نىسان جۇزدەگەن توننا كومىر ۇنەمدەۋگە ءارى قورشاعان ورتاعا زيان كەلتىرمەۋ مۇمكىندىگىنە يە بولعانى وسىنى ايعاقتايدى.
زاماناۋي وزىق يدەيالاردى وتاندىق وندىرىسكە ەنگىزۋگە تالپىنىپ جۇرگەن «ساپرو-نات» جشس-ءنىڭ ەنەرگيانى ۇنەمدەۋ سالاسىنداعى قارىشتى قادامدارى مەن ىرگەلى ىزدەنىستەرىن جەرگىلىكتى بيلىك ۇنەمى قولداپ كەلەدى. كومپانيانىڭ ەكسپو-2017 حالىقارالىق كورمەسىندە ۇسىنىلعان وزىق جوبالاردىڭ وڭىردە قولدانىسقا ەنگىزىلۋىنە مۇرىندىق بولعانى دا ءسوز جوق, قۇپتارلىق قادام دەپ بىلەمىز. «جاسىل» ەكونوميكا باعىتى بويىنشا نەمىس تەحنولوگياسىنىڭ تاڭداپ الىنۋى كەزدەيسوقتىق ەمەس.
«Viessmann» كومپانياسىنىڭ ناقتى ەكونوميكالىق ناتيجەلەرگە باعىتتالعان ەنەرگيانى ۇنەمدەۋ سالاسىنداعى يننوۆاتسيالىق جەتىستىكتەرى كاسىپورىندى بۇرىننان قىزىقتىراتىن. ەندى, مىنە, ونى قولدانۋدىڭ ارقاسىندا جىل سايىن جاعىلاتىن وتىندى ۇنەمدەۋگە, جىلىتۋ ساپاسىن جاقسارتۋعا, قورشاعان ورتاعا زيان كەلتىرمەۋگە قول جەتكىزىلدى. ناقتى ايتساق, نەمىس تەحنولوگياسى بويىنشا ءپيروليزدى ۇزاق جاناتىن قازاندىقتار 80-گە جۋىق نىساندا ورناتىلىپ, وتىن شىعىنىن 1,5-2 ەسەگە دەيىن ازايتۋعا مۇمكىندىك بەردى.
«جاسىل» ەكونوميكانىڭ راحاتىن العاشقىلاردىڭ قاتارىندا كورۋشىلەردىڭ ءبىرى – اققايىڭ اۋدانى استراحان مەكتەبى بولدى. قوندىرعى ورناتىلعالى مەكتەپ كومىر الۋ, پەش جوندەۋ مەحناتىنان قۇتىلدى. بۇل ماسەلەلەرمەن جىلۋ تاراتۋشى تىكەلەي ءوزى اينالىسادى. ەڭ باستىسى, قورشاعان ورتاعا زياندى قالدىقتاردىڭ تارالۋى ازايدى. بۇرىن مەكتەپتە جىلىتۋ ماۋسىمى كەزىندە جارتى مىڭ توننا كومىر جاعىلسا, قازىر 200-250 توننادان اسپايدى. وت جاعۋشى تاۋلىك ىشىندە ءبىر-اق رەت كومىر سالىپ قويىپ, قالعان ۋاقىتتا قالىپتى تەمپەراتۋرانى باقىلاپ وتىرادى. مۇنداعى نەمىس تەحنولوگياسىنا نەگىزدەلگەن يننوۆاتسيالىق پەشتەر جەرگىلىكتى ءوندىرىس وشاعىندا شىعارىلادى. سەرىكتەستىك ەندىگى كەزەكتە رەسەيدىڭ «سفەرا» قازاندىعى نەگىزىندە وتاندىق ۇلگىنى قۇراستىرماق. بۇل جوبا نەگىزىنەن ءىرى كاسىپورىندارعا ارنالعان. جانە بيوتىنعا كوشۋ جايى دا ويلاستىرىلعان.
اۆتوماتتى تۇردە باسقارىلاتىن نەمىستىڭ مودۋلدىك جىلۋ قۇرىلعىسى باعدارلاماسىن ء«ابي جەر» جشس دا تابىستى كادەگە جاراتىپ وتىر. اتالعان سەرىكتەستىك قۇرىلتايشىلارىنىڭ ءبىرى قايرات قادىرالين:
– پولشالىق تەحنولوگيا بويىنشا جۇمىس ىستەيتىن بيوماسسالىق «Ecopalm RM 03-2 500 كۆ» ماركالى قازاندىقتار 200-دەن استام مەكەمەگە ورناتىلدى. كومىر جاعاتىن قازاندىقتارمەن سالىستىرعاندا وتە ءتيىمدى. پايدالانۋ مەرزىمى – 20 جىل. قازىردىڭ وزىندە جوعارى سۇرانىسقا يە بولىپ وتىر. جىل اياعىنا دەيىن تاعى 20 نىسانعا قويىلادى. بالامالى ەنەرگياعا كوشۋ تابيعي رەسۋرستاردى ءتيىمدى جۇمساۋعا مۇمكىندىك بەرەدى. جاھاندىق ۇردىستەن دە قالۋعا بولمايدى. ءبىز سول سەبەپتى وسى قازاندىقتارعا باسىمدىق بەرىپ وتىرمىز, – دەيدى.
نەمىس جانە پولشالىق ۇلگىدەگى زاماناۋي قوندىرعىلاردا كومىر ورنىنا استىق قالدىقتارىنان وندىرىلەتىن بيووتىن پايدالانىلاتىندىقتان, اۋا مۇلدەم لاستالمايدى. ء«ابي جەر» شارۋاشىلىعى 30 مىڭ گەكتارعا جۋىق القاپقا بيداي, ارپا, مايلى داقىلدار وسىرەدى. دەمەك, بيوتىن دايىنداۋعا مۇمكىندىكتەرى جەتكىلىكتى.
جۋىردا وبلىستىق اكىمدىكتىڭ وتىرىسىندا ۇزاق جاناتىن قازاندىق قوندىرعىلارىن ورناتۋ تەحنولوگياسىن جەتىلدىرۋ, ونىڭ سانىن كوبەيتۋ ماسەلەلەرى تالقىلانىپ, ءوڭىر باسشىسى قۇمار اقساقالوۆ ءتيىستى ورىندارعا ناقتى تاپسىرمالار جۇكتەدى. الدا وسى باعىتتا اتقارىلۋعا ءتيىس اۋقىمدى مىندەتتەر تۇر.
ءومىر ەسقالي,
«ەگەمەن قازاقستان»