وبلىس ورتالىعىنداعى «ورمان جانە جانۋارلار الەمىن قورعاۋ جونىندەگى» مەكەمەگە قاراستى پاۆلودار, جاڭااۋىل, چەرنورەتسك, يامىشەۆ, چەرنوە جانە كوكتوبە ورمانشىلىقتارى بار.
ماقسات − وڭىردەگى ورمان قورىن قورعاۋ, ساقتاۋ, اعاشتاردى ءوسىرۋ, جانۋارلار الەمىن قورعاۋ, ولاردىڭ ءوسىمىن كوبەيتۋگە ۇلەس قوسۋ.
بيىل وڭىردە «ەكولوگيا جىلى» دەپ جاريالاعاندى. وسى باستاماعا وراي وبلىس ورتالىعىنا قاراستى ورمانشىلىقتا 9,5 گەكتار جەرگە قاراعايلار وتىرعىزىلدى. ورمانشىلار جاڭا ەگىلگەن قاراعايلاردى جاز بويى كۇتىپ, باپتاپتى. ورمانشىلىقتار قاراۋىنداعى 9799 گەكتار جەردى كۇتىپ, باپتايدى, كۇزەتەدى. ورتتەن, زاڭسىز اعاش كەسۋشىلەردەن, اڭ اۋلاۋشىلاردان قورعايدى. ورمان جانە جانۋارلار الەمىن قورعاۋ جونىندەگى مەكەمەگە قاراستى اۋماقتا اڭ اۋلاۋعا تىيىم سالىنعان.
سوندىقتان, دەيدى ورمانشىلار, - جەرگىلىكتى اكىمدىك, توتەنشە جاعداي, جەرگىلىكتى پوليتسيا, ورمانشىلىق باسقارماسىنان قۇرالعان وبلىستىق شتاب قۇرىلسا دەگەن ۇسىنىس ايتادى.
ورمانشىلار زاڭسىز اعاش كەسۋ, ورمان ورتىنەن باسقا, ورماندى مەكەندەيتىن جانۋارلاردى قورعاۋعا شاقىرادى. اعاش اراسىندا جابايى دوڭىز, ەشكى, تۇلكى مەن قويان, باسقا دا جانۋارلار بار. قازىر ورمانشىلار جانۋارلاردىڭ ازىعىن دايىنداۋعا كىرىسىپ كەتىپتى.
− جانۋارلارعا قىس كەزىندە قاردىڭ استىنان ازىق تابۋى قيىن. سوندىقتان, بيوتەحنيكالىق شارالار اياسىندا 300 كەلى تۇز, اعاش بۇتاقتارىنان بۋىپ جاسالعان 1600 دانا ازىق, 6 توننا ءشوپ دايىندالدى. كۇزدە جاۋىننان, قىستا ايازدان, بوراننان قورعايتىن كۇركەلەر جاسالدى. اڭداردىڭ ازىعىنا لايىقتى كەسىلگەن اعاشتاردىڭ دىڭگەكتەرى ويىلىپ, ارنايى استاۋلار ءىلىنىپ, جەم-ءشوپ سالىنادى, دەيدى ورمانشىلار.
فاريدا بىقاي,
«ەگەمەن قازاقستان»
پاۆلودار