بريۋسسەلدەگى ەۋروپا وداعى ءسامميتىنىڭ ەكىنشى كۇنىندە ۇلىبريتانيا پرەمەر-ءمينيسترى تەرەزا مەي «برەكسيتتەن» كەيىنگى وتپەلى كەزەڭدى بىرنەشە ايعا سوزاتىنىن ايتتى, دەپ حابارلايدى Euronews.
بۇل شەشىم ەۋرووداقتا قالاتىن يرلانديا مەن بىرىككەن كورولدىك قۇرامىنداعى سولتۇستىك يرلانديانىڭ شەكارا ماسەلەسىن رەتتەۋ ءۇشىن قابىلداندى.
تەرەزا مەي: «جاڭا جۇيە ەنبەيىنشە, وتپەلى كەزەڭدى ۇزارتىپ, ەۋرووداقپەن كەلىسىم ورناتۋعا تىرىسامىز. ءبىزدىڭ ويىمىزشا, ورتاق شەشىم قابىلدانباعاننىڭ وزىندە دە شەكارا جۇمىسى ەسكى تارتىپتە جالعاسا بەرەدى», دەدى.
ەۋرووداق كوشباسشىلارى قاراشانىڭ 17, 18 كۇندەرى «برەكسيت» شارتتارىن تالقىلاۋعا نەگىزدەلگەن جەدەل ءسامميتتى وتكىزۋدەن باس تارتتى.
ەۋروپا پارلامەنتىنىڭ توراعاسى انتونيو تاياني: «شەشىلمەگەن ءۇش ماسەلە قالدى. ءبىرىنشىسى – ەۋروپا وداعىنداعى ازاماتتار مەن ۇلىبريتانيا ازاماتتارىنىڭ قۇقىعى, ەكىنشىسى – تولەم ماسەلەسى. ەكى ماسەلە بويىنشا كەلىسىم جاسالدى دەپ ويلايمىن. ءۇشىنشى ماسەلە – شەكارا. بۇل - ءالى دە تالقىلانۋدى قاجەت ەتەتىن سۇراق. شەشىمى تابىلماسا دا, جاقسى ناتيجەمەن اياقتالاتىنىنا سەنەمىن», دەدى.
ەكى تاراپ تا شەكارا جۇمىسىنىڭ بۇزىلۋىن قالامايدى. دەگەنمەن, بريۋسسەل مەن لوندون بۇل ماسەلەنى ەۋروپا وداعىنىڭ شەكارا جۇمىسى اياسىندا شەشۋگە تىرىسۋدا.