نۇرسۇلتان نازارباەۆ حالىقارالىق ساۋدا ورتالىقتارى قاۋىمداستىعى (WTCA) باسقارماسى توراعاسىنىڭ ورىنباسارى رولف درااكپەن جانە «Nest Investments HOLDINGS» كومپانيالار توبىنىڭ كورپوراتيۆتىك قىزمەتتەر جونىندەگى ديرەكتورى مەحران ەفتەحارمەن كەزدەستى, دەپ حابارلايدى اقوردانىڭ ءباسپاسوز قىزمەتى.
كەزدەسۋ بارىسىندا تاراپتار قاۋىمداستىق پەن «استانا» حالىقارالىق قارجى ورتالىعى اراسىنداعى ىنتىماقتاستىقتىڭ پەرسپەكتيۆالى باعىتتارىن, سونىڭ ىشىندە قازاقستانعا الەمنىڭ ءىرى كورپوراتسيالارى مەن قارجى ينستيتۋتتارىن تارتۋ, ەلىمىزدىڭ حالىقارالىق ىسكەرلىك بەلسەندىلىك ورتالىعى رەتىندەگى ءرولىن ارتتىرۋ, سونداي-اق «ەكسپو-2017» كورمەسىنىڭ عيماراتتار كەشەنىن كورمەدەن كەيىنگى كەزەڭدە پايدالانۋ ماسەلەلەرىن تالقىلادى.
حالىقارالىق ساۋدا ورتالىقتارىنىڭ قاۋىمداستىعى (WTCA) – جاھاندىق ساۋدا مەن ينۆەستيتسيانى دامىتۋعا ىقپال ەتەتىن حالىقارالىق ساياسي ەمەس ۇيىم. دۇنيەجۇزىلىك ساۋدا ورتالىقتارى ءوزارا ءبىر جەلى ارقىلى بايلانىسقان جانە وندا داستۇرگە ساي «Eni», «لۋكويل», «Panasonic», «J.P. Morgan», «Bank of New York» جانە الەمنىڭ باسقا دا ءىرى كورپوراتسيالارىنىڭ وفيستەرى ورنالاسقان.
كەزدەسۋ بريۋسسەل قالاسىندا قازاقستان – ەۋروپا بيزنەس-فورۋمى الاڭىندا ءوتتى.