ارگەنتينادا جالاۋى جەلبىرەگەن جاسوسپىرىمدەر وليمپياداسى ءوز مارەسىنە تاياپ قالدى. ون ءبىرىنشى جارىس كۇنى قازاقستاندىق سپورتشىلار ءۇشىن ءساتتى ءوتتى. ولار ەل قورجىنىنا 2 التىن, 1 كۇمىس جانە 1 قولا جۇلدە سالدى.
ۆەلوسپورت جارىسى بويىنشا ەرلەر اراسىندا كوماندالىق سىنعا قاتىسقان گلەب برۋسەنسكي مەن ەۆگەني فەدوروۆ قارسىلاستارىنان وق بويى العا وزىپ, جاسوسپىرىمدەر وليمپياداسىنىڭ چەمپيونى اتاندى. سونداي-اق بوكسشى ايبەك ورالباي (91 كيلو) فينالدىق سايىستا الجيرلىك مۇحاممەد ءامين ءحاسيدتى ايقىن باسىمدىقپەن جەڭىپ, وليمپيادانىڭ التىن جۇلدەسىن يەلەندى. وسى وليمپيادادا كوك بايراعىمىزدى ۇستاپ شىققان دامير تويباي (+91 كيلو) فينالدا رەسەيلىك الەكسەي درونوۆتەن جەڭىلىپ, كۇمىسپەن شەكتەلدى. ال قىزدار اراسىنداعى باسەكەدە نادەجدا ريابەتس قولا جۇلدەگەر اتاندى.
ون ءبىر كۇننىڭ قورىتىندىسى بويىنشا قازاقستان قۇراماسى مەدال سانى بويىنشا جالپىكوماندالىق ەسەپتە 8 مەدالمەن (4 التىن, 2 كۇمىس, 2 قولا) 14-ورىندا كەلەدى. العاشقى ورىندا 56 مەدال (28, 16, 16) جيىنتىعىن توپتاعان رەسەي قۇراماسى تۇر.