جاقىندا عارىشتى زەرتتەۋگە مول ينۆەستيتسيالار سالا باستاعان قىتاي عارىش الەمىنە جاساندى اي جىبەرۋدى جوسپارلاپ وتىر, دەپ حابارلايدى تۇركيانىڭ NTV جاڭالىق ارناسى.
قىتاي ۇستىمىزدەگى جىلى جارىق جۇيەسىنە جاڭالىق ەنگىزۋ ماقساتىندا عارىشقا جاساندى اي جىبەرەدى. زەرتتەۋ ناتيجەلەرى بويىنشا, جاساندى اي 80 كيلومەترگە دەيىنگى اۋماقتى جارىقتاندىرا الادى. جاساندى جارىق قۇرىلعىسى قىتايدىڭ وڭتۇستىگىندەگى چەندۋ قالاسىنا ورنالاستىرىلادى. چەندۋ اۆياتسيا ءبىلىم جانە تەحنولوگياسى ميكرەلەكترونيكا جۇيەسىن زەرتتەۋ ينستيتۋتىنىڭ باسشىسى ۆۋ چۋنفەن جوبانىڭ 2020 جىلى تولىقتاي جۇزەگە اساتىنىن ايتتى. بۇدان باسقا, مەملەكەتتىڭ 2025 جىلعا دەيىن «اي وبسەرۆاتورياسىن» سالۋ, 2050 جىلعا قاراي مارسقا ادام جىبەرۋ سىندى جوسپارلارى بار. ەكونوميكاسى كۇننەن كۇنگە قارىشتاي تۇسكەن مەملەكەتتىڭ 2016-2020 جىلدارعا ارنالعان ء«حىىى 5 جىلدىق جاڭعىرۋ» جوسپارىندا عارىش ماسەلەسىن الدىڭعى قاتارعا قويۋى باسقا مەملەكەتتەردىڭ دە قىزىعۋشىلىعىن تۋدىرۋدا.
قىتاي عارىش عىلىمى جانە تەحنولوگيا ينستيتۋتىنىڭ (CASC) دەرەكتەرىنە سايكەس الداعى ءۇش جىلدا مەملەكەت العاشقى عارىش ستانتسياسىنىڭ قۇرىلىسىنا بارىنشا نازار اۋداراتىن بولادى.
«چجان-4» عارىش كەمەسى جىلدىڭ سوڭىنا دەيىن ايدىڭ قاراڭعى بولىگىنە قونىپ, كەلەسى جىلدان باستاپ «چجان-5» عارىش كەمەسى اي بەتىنىڭ نۇسقالارىن الىپ كەلەدى دەپ جوسپارلانۋدا.
مارستى, قارا قۇردىمدى زەرتتەۋگە بەل بۋعان مەملەكەتتىڭ بۇدان بولەك جاھاندىق سپۋتنيكتى ناۆيگاتسيا جۇيەسى باعدارلامالارى دا بار.
ەستەرىڭىزگە سالساق, قىتاي 2003 جىلى 15 قازاندا عارىشقا ادامسىز زىمىران جىبەرگەن كەڭەس ۇكىمەتى مەن اقش-تان كەيىنگى ءۇشىنشى مەملەكەت بولاتىن.