ماسكەۋدە ءوتىپ جاتقان «كرەمل كۋبوگى» جولىنداعى جارىس قازاقستاننىڭ تەننيسشىلەرى ءۇشىن ءساتسىز اياقتالدى. وسى جارىسقا قاتىسقان ءۇش جەرلەسىمىزدىڭ بارلىعى دا العاشقى اينالىمداردان اسا المادى.
ەرلەر سايىسىنىڭ العاشقى كۇنى ميحايل كۋكۋشكين ءسۇرىندى. اتر تىزىمىندە 73 ورىندا تۇرعان جەرلەسىمىز تۇساۋكەسەر كەزدەسۋدە الەمنىڭ 105 راكەتكاسى, رەسەيلىك ەۆگەني دونسكويدان ۇتىلدى – 4:6, 6:7. ودان كەيىن الەكساندر بۋبليك جەڭىلىستىڭ كەرمەك ءدامىن تاتتى. ول فرانتسيالىق پەر-يۋگ ەربەرگە ەسە جىبەردى – 3:6, 4:6.
ايەلدەر اراسىنداعى ەلىمىزدىڭ ءبىرىنشى راكەتكاسى يۋليا پۋتينتسەۆا تۇساۋكەسەر كەزدەسۋىندە رۋمىنيالىق يرينا بەگۋدى 6:2, 6:0 ەسەبىمەن ويسىراتا ۇتىپ, ءوز جانكۇيەرلەرىن ءبىر قۋانتىپ تاستاعان ەدى. الايدا ەكىنشى كەزەڭدە ول تىم مىقتى قارسىلاسقا تاپ بولدى. جەرلەسىمىزدىڭ WTA رەيتينگىندە 11 ساتىعا جايعاسقان 28 جاستاعى لاتۆيانىڭ ويىنشىسى اناستاسيا سەۆاستوۆاعا ءالى جەتپەدى – 5:7, 6:4, 4:6.
بۇگىن جانە ەرتەڭ «كرەمل كۋبوگى» جولىنداعى جارىستىڭ شيرەك فينالدىق سايىستارى وتەدى. ال جەڭىمپازدار 21 قازاندا انىقتالادى. ەستەرىڭىزگە سالا كەتەيىك, ماسكەۋدەگى ءتۋرنيردىڭ جۇلدە قورى ەرلەر اراسىندا 392 866 جانە ايەلدەر اراسىندا 932 566 اقش دوللارىن قۇرايدى.
عالىم سۇلەيمەن,
«ەگەمەن قازاقستان»