بيىل «سامۇرىق-قازىنا» ءال-اۋقات قورىنىڭ قۇرىلعانىنا 10 جىل تولىپ وتىر. وسىعان وراي اكتسيونەرلىك قوعامنىڭ باسقارما توراعاسى احمەتجان ەسىموۆ قور ۇجىمىن اتاۋلى كۇنمەن قۇتتىقتادى.
SK News كورپوراتيۆتىك گازەتىندە جاريالانعان قۇتىقتاۋدا احمەتجان ەسىموۆ:
– قۇرمەتتى ارىپتەستەر! بارشاڭىزدى «سامۇرىق-قازىنا» ءال-اۋقات قورىنىڭ 10 جىلدىق مەرەيتويىمەن قۇتتىقتايمىن! ون جىلدىڭ ىشىندە «سامۇرىق-قازىنا» قورىنا قاراستى ۇلتتىق كومپانيالار ەل ەكونوميكاسىنىڭ تىرەگىنە اينالدى – بۇگىندە ۇلتتىق ەكونوميكانىڭ تورتتەن ءۇش بولىگىن قور كومپانيالارى قۇراپ وتىر.
بيىلعى جىلدىڭ ءساۋىر ايىندا پرەزيدەنت نۇرسۇلتان نازارباەۆ «سامۇرىق-قازىنا» قورىنىڭ 2018-2028 جىلدارعا ارنالعان دامۋ ستراتەگياسى مەن جاڭارتىلعان ترانسفورماتسيا باعدارلاماسىن بەكىتىپ, قوردى دامىتۋعا باعىتتالعان ءىس-شارالارعا وڭ باعاسىن بەردى. دەگەنمەن, كەلەشەك ۇرپاق ءۇشىن ۇزاقمەرزىمدى دامۋدى قامتاماسىز ەتەتىن, ۇلتتىڭ ءال-اۋقاتىن كوتەرەتىن قورعا اينالۋ ءۇشىن ءالى دە جۇمىلا ەڭبەك ەتۋىمىز قاجەت,– دەدى.
ونىڭ ايتۋىنشا, قورعا قاراستى كومپانيالاردىڭ قارجىلىق تۇراقتىلىعىن قامتاماسىز ەتىپ, ءوندىرىستى تسيفرلاندىرىپ, بيزنەس-پروتسەسستەردى وڭتايلاندىرۋ ارقىلى كومپانيالاردىڭ تيىمدىلىگىن ارتتىرۋ – اكتسيونەرلىك قوعامنىڭ نەگىزگى ماقساتى. سونىمەن قاتار, قور جەكەشەلەندىرۋ باعدارلاماسى ارقىلى ستراتەگيالىق ينۆەستورلاردى تارتىپ, پورتفەل قۇرىلىمىن وڭتايلاندىرىپ, ينۆەستيتسيالىق جوبالاردى قايتا قاراۋعا مۇددەلى. كىرىستى ءارتاراپتاندىرۋ ءۇشىن «سامۇرىق-قازىنا» قازاقستاندىق جانە شەتەلدىك سەرىكتەستەرمەن بىرىگە وتىرىپ ءتيىمدى جوبالاردى قارجىلاندىرىپ, ەلىمىزدەگى جەكە كاپيتالدى دامىتۋعا جاعداي جاساۋى ءتيىس. تۇراقتى دامۋ جولىنا ءتۇسۋ ماقساتىندا قوردىڭ قۇرامىنداعى ءاربىر كومپانيا كورپوراتيۆتىك باسقارۋدىڭ ەڭ جوعارعى ستاندارتتارىن ەنگىزۋى شارت.
– بيىل «سامۇرىق-قازىنا» قورى جاڭا كادرلىق ساياساتتى بەكىتتى. ونىڭ نەگىزگى ماقساتى - قورداعى شەشىم قابىلداۋ جىلدامدىعىن ارتتىرىپ, حولدينگتى وڭتايلى ۇيىمعا اينالدىرۋ. جاڭا كادرلىق ساياساتقا سايكەس, كورپوراتيۆتىك ورتالىقتا جاڭا باسقارۋ قۇرىلىمى ەنگىزىلدى. ەندىگى قادام – قورعا قاراستى بارلىق كومپانيالاردا قىزمەتكەرلەردى قابىلداۋدىڭ بىرىڭعاي جۇيەسىن ەنگىزۋ, وسىلايشا ادىلەتتى دە اشىق تۇردە بىلىكتى مامانداردى جيناۋ,– دەدى احمەتجان ەسىموۆ.
قۇتتىقتاۋدا ايتىلعانداي, ەلباسى الدىمىزعا قويعان ماقسات-مىندەتتەردى ورىنداپ, قازاقستاندىقتاردىڭ ءۇمىتىن اقتاۋ – قوردا قىزمەت اتقاراتىن ءاربىر ازامات ءۇشىن ۇلكەن سىن. سول سەبەپتى باسقارما توراعاسى قور كومپانيالارىندا جۇمىس اتقاراتىن 320 مىڭنان استام ازاماتتىڭ ارقايسىسىن قىزمەتكە ادال بولۋعا, جۇكتەلگەن مىندەتتى ساپالى اتقارۋعا شاقىردى.
– اقپاراتتىق تەحنولوگيالاردىڭ قارقىندى دامۋى ءومىردىڭ ءاربىر سالاسىن كوز ىلەستىرمەي وزگەرتىپ جاتىر. مۇنداي ۋاقىتتا وزگەگە دە, وزىنە دە تالاپ قويا الاتىن, بىلىمگە قۇشتار, باسەكەلەستىككە قابىلەتتى ماماندار عانا جەتىستىككە جەتەدى. مەرەيتوي قارساڭىندا بارشاڭىزدىڭ ەڭبەگىڭىزگە بەرەكە, وتباسىلارىڭىزعا باقىت, قىزمەتتەرىڭىزگە تابىس تىلەيمىن! مەرەكە قۇتتى بولسىن!– دەلىنگەن قۇتتىقتاۋدا.
الدابەرگەن كەمپىرباي