قازاقستان رەسپۋبليكاسى پارلامەنت سەناتىنىڭ دەپۋتاتتارى باقىتجان جۇماعۇلوۆ, دينار نوكەتاەۆا مەن تولەۋبەك مۇقاشەۆ قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ وقىتۋشىلارى مەن ستۋدەنتتەرىمەن كەزدەستى.
حالىق قالاۋلىلارى ساپارىنىڭ ماقساتى – مەملەكەت باسشىسى نۇرسۇلتان نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى بيىلعى جولداۋىنىڭ مازمۇنىن تالقىلاۋ, جان-جاقتى ءتۇسىندىرۋ.
– بيىلعى جولداۋدى اسىرەسە, ەلىمىزدەگى ۇستازدار قاۋىمى زور قۋانىشپەن قابىلدادى. بۇعان سەبەپ تە جوق ەمەس. مەملەكەت باسشىسى ماڭىزدى قۇجاتتا جوعارى ءبىلىم بەرۋگە قاتىستى, پەداگوگ مارتەبەسى جايىندا بىرقاتار ماڭىزدى مىندەتتەردى اتاپ ءوتتى. اتاپ ايتقاندا, 2019 جىلى «پەداگوگتاردىڭ مارتەبەسى تۋرالى» زاڭ قابىلدانادى. بۇل – قازاقستاندىق ۇستازدار قاۋىمىنىڭ قوعامداعى بەدەلىن ارتتىرىپ, ورنىن ايشىقتاۋعا زور قادام بولماق, – دەدى جيىندى اشىپ, جۇرگىزىپ وتىرعان ۋنيۆەرسيتەت رەكتورى گ. الدامبەرگەنوۆا ءوز سوزىندە.
پارلامەنت سەناتىنىڭ الەۋمەتتىك-مادەني دامۋ جانە عىلىم كوميتەتىنىڭ مۇشەسى باقىتجان جۇماعۇلوۆ ەلباسى جولداۋىندا ايتىلعان اۋقىمدى جۇمىستاردى رەت-رەتىمەن ءتۇسىندىردى. سونىمەن قاتار, جوعارى وقۋ ورىندارىنىڭ ساپاسىن ارتتىرۋ, ۇستاز مارتەبەسىن كوتەرۋ جايىندا دا كەڭىنەن توقتالىپ ءوتتى. «ەلباسى تاپسىرماسىمەن ءبىز ۇستازدىڭ مارتەبەسى جايلى زاڭ قابىلدايمىز. بۇل زاڭعا سايكەس, ۇستازداردىڭ مارتەبەسىن, جۇمىسىن, قىزمەتىن, كاسىبي جابدىقتالۋىن, ماتەريالدىق احۋالىن تۇگەل وزگەرتۋ كەرەك. سىزدەردىڭ وقۋ ورىندارىڭىزدا مۇمكىندىگى شەكتەۋلى بالالارعا ارنالعان ورتالىق بار ەكەن. وندا پەداگوگ, پسيحولوگ مامانداردىڭ تاجىريبەدەن ءوتۋى ورتالىق جۇمىسىن دامىتا تۇسەرى ءسوزسىز», – دەدى ب. جۇماعۇلوۆ.
سەنات دەپۋتاتى دينار نوكەتاەۆا ءوزى التى جىل باسشىلىق جاساعان قىزدار ۋنيۆەرسيتەتىنىڭ مارتەبەسى تۋرالى باياندادى.
– 1944 جىلى اشىلىپ, 75 جىلدان بەرى جۇمىس ىستەپ كەلە جاتقان بۇل ءبىلىم ورداسى 70 000-نان استام پەداگوگ مامان دايىنداپ شىعارعان. بيىلعى ەلباسىنىڭ جولداۋى, نەگىزىنەن, پەداگوگتارعا باعىتتالدى. ونىڭ ىشىندە ەڭ تومەنگى جالاقىنى 28 000 تەڭگەدەن 42 مىڭ تەڭگەگە جەتكىزۋ تۋرالى ايتىلدى. ۇكىمەتكە ناقتى تاپسىرما بەرىلدى. پارلامەنت قازىر وسى زاڭ جوباسىن دايىنداۋعا ءازىر, – دەپ اتاپ ءوتتى د. نوكەتاەۆا.
جيىن بارىسىندا ۋنيۆەرسيتەت ستۋدەنتتەرى مەملەكەت باسشىسىنىڭ جولداۋى توڭىرەگىندە ساۋالدار قويىپ, ۇسىنىستارىن جەتكىزدى. ۇستازدار مەن ستۋدەنتتەر ستراتەگيالىق ماڭىزدى قۇجاتتا كورسەتىلگەن مىندەتتەردى سارالاپ, تىڭ ويلارى مەن يدەيالارىن جۇزەگە اسىرۋعا نيەتتى. بۇل تاراپتا ۋنيۆەرسيتەتتىڭ ارنايى كەشەندى ءوز جوسپارى قابىلدانادى. ول پرەزيدەنت تاپسىرمالارىنىڭ ورىندالۋىن, وقۋ ورنىندا جايلى ورتا قالىپتاستىرۋدى جانە وقىتۋشىلاردىڭ كاسىبي دەڭگەيىن انىقتاۋدى قامتاماسىز ەتپەك. القالى باسقوسۋدى گ. الدامبەرگەنوۆا قورىتىندىلاپ, حالىق قالاۋلارىنا ەركىن فورماتتاعى مازمۇندى اڭگىمەسى ءۇشىن ۋنيۆەرسيتەت ۇجىمىنىڭ اتىنان العىس ءبىلدىردى.
ايگۇل احانبايقىزى,
«ەگەمەن قازاقستان»
الماتى