جۋرناليست كۇلان بەرىكبولوۆا دۇنيەدەن ءوتتى

كۇلان بەرىكبولوۆا 1956 جىلى 4 قىركۇيەكتە شىعىس قازاقستان وبلىسى, اياگوز قالاسىندا دۇنيەگە كەلگەن.

1973 جىلى جارما ستانتسياسىنداعى ورتا مەكتەپتى, 1978 جىلى ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن بىتىرگەن.

ەڭبەك جولىن سول كەزدەگى سەمەي وبلىسى, جارما اۋدانىنىڭ «مولشىلىق ءۇشىن» گازەتىندە باستاعان (1978-81). بۇدان كەيىن ءار جىلدارى «سوتسياليستىك قازاقستان» (1981-85), «جۇلدىز» (1986-94), «بىرلىك», «اق بوساعا», ت.ب. رەسپۋبليكالىق مەرزىمدى باسىلىمداردا قىزمەت اتقارعان.

2000-2004 جىلدارى «قورعاۋ» زەينەتاقى جيناۋ قورىندا اۋدارماشى, كەيىن «ەكونوميكا», «قازاقپارات» باسپالارىندا رەداكتور بولدى.

مۇستافا وزتۇرىك جايلى «مۇزبالاق مۇستافا» (1997) ەستەلىكتەر جيناعىن, توقتارحان ءشارىپجانوۆتىڭ «قالدىردىم مۇرا حالقىما» (2003) جيناعىن قۇراستىرىپ, جارىققا شىعاردى.

ۆ.ل.نازاروۆانىڭ «شارۋاشىلىق جۇرگىزۋشى سۋبەكتىلەردەگى بۋحاگالتەرلىك ەسەپ», ۆ.ل.نازاروۆا, د.ا.فۋرسوۆ, س.د.فۋرسوۆا, م.س.جاپپارحانوۆانىڭ «باسقارۋ ەسەبى», ك.بەرداليەۆتىڭ «مەنەدجمەنت», گ.ا.جاپپاروۆانىڭ «ينفورماتيكا نەگىزدەرى», د.و.ابلەنوۆتىڭ «اۋديت نەگىزدەرى» اتتى وقۋلىقتارىن ا.جالعاباەۆپەن بىرلەسىپ, ورىسشادان قازاقشاعا اۋداردى.

ء«ۇش قيان» باسپاسىنان «ۇنىمەن ۇزدىرگەن ۇكىلىم-اي» اتتى كىتابى جارىق كوردى.