ەكىباستۇزعا ەرەكشە سىيلىق

بۇل كۇندەرى ەكىباستۇزدا «قا­­زاق­ستان حالىق بانكى» اق بو­لىم­شە­سىنىڭ باستاماسىمەن «سۇيىك­تى قالاعا سىيلىق!» ات­تى شارا وتكى­زىلۋدە. جالپى, ەكىباس­تۇز­دىقتار ءوز تۋعان قالاسىن جاق­سى كورەتىنى باي­قالادى. بيىل 61 جىل تولعان قالا كۇنىن دە اتاپ ءوتتى. 

اتالعان شارا قارساڭىندا بانك ءوز قاراجاتى ەسەبىنەن قالا­داعى ءماشھۇر ءجۇسىپ اتىنداعى كوشەنىڭ 75-ءشى تۇرعىن ءۇي اۋلاسىندا, ەنەرگەتيكتەر كوشەسىندە بالالارعا ارنالعان ويىن الاڭ­دارىن ورناتىپ بەردى. 

فيليال ديرەكتورى داۋ­رەن­ شە­شەم­بەكوۆتىڭ ايتۋىن­شا, بانك باستاماسىمەن وتكى­زىلەتىن شارا­لار كەنشىلەر قالا­سىنىڭ كىشكەن­تاي تۇرعىن­دارى – بالالارعا ارنالادى. بۇل­دىرشىندەر ويىن كەزىندە جاراقات الىپ قالماس ءۇشىن قاۋىپ­سىزدىك شاراسى ەسكەرىلىپ, ءۇي اۋلا­لا­رىنداعى ويىن الاڭدارىنا رە­زەڭكە جابىندى ورناتىلدى.

بانك وكىلدەرىنىڭ «سۇيىكتى قا­­لاعا سىيلىق!» شاراسى ءار الۋان تاقىرىپتى قامتيدى. قا­لا تۇر­عىندارىن قىستا تەگىن كون­كي تەبۋگە, تۋعان ولكەنىڭ شە­جىرەلى تاريحىن كورىپ ءبىلۋ ءۇشىن «تۋعان ولكەڭدى ءبىل» اتتى جەرگىلىكتى مۋزەي جادىگەرلەرىن كورۋگە شاقىرادى. سونداي-اق سوعىس جانە ەڭبەك ارداگەرلەرىنە دە ۋاقىت ءبولىپ, ورتالىق قالالىق اۋرۋحانادا ەمدەلىپ جاتقان كىشكەنتايلارعا دا بارىپ قايتۋدى داستۇرگە اي­نال­­دىرعان. مەشىتتىڭ اۋلاسىنا اعاش ەگۋ سياقتى كوگال­دان­دىرۋ جۇمىستارىن دا بانك قىز­مەت­كەرلەرى قولعا الۋدا.

قالادا ءالى دە بولسا, جوندەۋ كور­مەگەن تۇرعىن ۇيلەردىڭ اۋلالارى جەتەرلىك. بانك وكىلدەرىنىڭ «سۇيىكتى قالاعا سىيلىق!» باس­تاما­سىن قولدايتىن باسقا دا ۇيىم­دار مەن كاسىپكەرلەردىڭ نا­زا­رى تۇسەدى دەپ سەنەدى جەرگى­لىك­تى تۇرعىندار. قالالىق اكىم­دىك­­تىڭ تۇرعىن ءۇي-كوممۋنالدىق شارۋاشىلىق ءبو­لى­­مىنىڭ مالىمە­تىنشە, ەندى «حا­لىق» بانكىنىڭ جەر­گىلىكتى بولىم­­شەسى جىل سوڭىنا دەيىن 10 تۇرعىن ءۇيدىڭ اۋلا­­­سىنا بالالارعا ارنالعان ويىن الاڭدارىن ورناتۋدى جوس­پار­لاپ وتىر. الداعى جىلى قالا­داعى بارلىق تۇرعىن ءۇي اۋلالارى تولىق جوندەلىپ, قوسىمشا فۋتبول جانە سپورت الاڭدارى قۇ­رى­لادى. سونىمەن قاتار جالپى اۋدانى 29 گەكتاردى قۇرايتىن باق جو­باسى­­نىڭ قۇرىلىسى دا اتالعان بانك باستا­ماق جۇمىستاردىڭ ءبىرى بولماق.

فاريدا بىقاي,

«ەگەمەن قازاقستان»

پاۆلودار وبلىسى