جۋىردا بەيبىتشىلىك جانە كەلىسىم سارايىندا الەمگە تانىمال مەملەكەتتىك اكادەميالىق كۋبان كازاكتارى حورى ۇجىمىنىڭ كونتسەرتى ءوتتى. ءىس-شارا مادەنيەت جانە سپورت مينيسترلىگىنىڭ ۇيىمداستىرۋىمەن قازاقستانداعى رەسەي مادەنيەتى كۇندەرى اياسىندا ۇيىمداستىرىلدى.
كۋبان كازاكتارىنىڭ حورى رەسەيدىڭ ۇلتتىق برەندى جانە كراسنودار ءوڭىرىنىڭ مادەني قۇندىلىعىنىڭ بويتۇمارى بولىپ تابىلادى. ەكى عاسىردان استام تاريحى بار ونەر ۇجىمىن استانا تۇرعىندارى مەن قوناقتارى قوشەمەتپەن قارسى الدى.
جينالعان كورەرمەندەر الدىندا كونتسەرتتى مادەنيەت جانە سپورت ۆيتسە-ءمينيسترى اقتوتى رايىمقۇلوۆا مەن قازاقستانداعى رەسەي فەدەراتسياسىنىڭ توتەنشە جانە وكىلەتتى ەلشىسى الەكسەي بوروداۆكين قۇتتىقتاۋ سوزدەرىمەن اشتى. ءوز سوزدەرىندە ولار مەملەكەتتىك اكادەميالىق كۋبان كازاكتارى حورىنىڭ كونتسەرتى رەسەي مەن قازاقستان حالقىن بايلانىستىرىپ وتىرعان دوستىق پەن ءوزارا سىيلاستىقتىڭ نىشانى بولىپ تابىلادى دەدى. مۇنداي ءوزارا مادەني قارىم-قاتىناس ءبىزدىڭ ەلدەرىمىزدىڭ اراسىنداعى ىنتىماقتاستىقتى دامىتۋدىڭ نەگىزىن قامتاماسىز ەتەتىندىگىن اتاپ ءوتتى.
كونتسەرت باعدارلاماسىندا ورىستىڭ حالىق اندەرى شىرقالىپ, ۆوكالدىق-حورەوگرافيالىق كومپوزيتسيالار حالىق بيلەرىنىڭ سۇيەمەلدەۋىمەن كورسەتىلدى. كەشتىڭ شارىقتاۋ شەگى ۇلى اباي قۇنانباەۆتىڭ «ايتتىم سالەم, قالامقاس» ءانىن قازاق تىلىندە ورىنداۋى بولدى. قازاق حالىق مۋزىكاسىن تاماشا ورىنداعان ارتىستەرگە كورەرمەندەر ورىندارىنان تۇرىپ قوشەمەت كورسەتتى.
«ەگەمەن-اقپارات»