قازاقستاندىقتار مەملەكەت باسشىسىنىڭ تاۋەلسىزدىكتىڭ 20 جىلدىعىنا ارنالعان سالتاناتتى جينالىستا سويلەگەن سوزىنە ءۇن قوسادى
* * *
اقساقالدار العىس ايتادى
ءبىزدىڭ قوعامدىق ۇيىم وسىدان بىرەر جىل بۇرىن عانا قۇرىلعان ەدى. وعان تومەندەگىدەي جاعداي سەبەپ بولدى. ياعني, سوناۋ توقسانىنشى جىلدارداعى قيىندىق كەزىندە اۋىل تۇرعىندارىنىڭ قالاعا قاراي اعىلىپ كوشىپ كەلگەنى بەلگىلى. سونىڭ ىشىندە كەزىندە اۋىلدا ءتۇرلى قىزمەت اتقارىپ زەينەتكە شىققان ارداگەر اقساقالدار دا كوپ بولدى. ال قالاعا كەلگەن سوڭ ءوزىمىزدى ەشكىمگە كەرەكسىز سەزىندىك. سونسوڭ قوعامنان تىسقارى قالعاندى ءجون كورمەي «اقىلداستار» دەگەن اتپەن اۋىل ارداگەرلەرىنىڭ بىرلەستىگىن قۇرعان ەدىك.
بۇگىندە زاڭدى تۇردە تىركەلگەن قوعامدىق بىرلەستىگىمىزدىڭ 120-دان استام تۇراقتى مۇشەسى بار. ءبىر سوزبەن ايتقاندا, قالاعا ءوڭىرىمىزدىڭ بارلىق جەرىنەن كەلگەن ارداگەرلەر قامتىلعان. قالا, ەل ومىرىندەگى وقيعالاردان سىرت قالىپ وتىرعان جوقپىز. جاس ۇرپاقتى وتانسۇيگىشتىك سەزىمگە باۋلۋ, ۇلتتار اراسىندا دوستىق پەن بىرلىككە دانەكەر بولۋ, حالقىمىزدىڭ سالت-ءداستۇرىن ناسيحاتتاۋ, مەملەكەتتىك ءتىلدى دامىتۋعا قولىمىزدان كەلگەنشە جاردەمدەسۋ جانە تاعى باسقا ماسەلەلەر باستى نازارىمىزدا. سونى ەسكەرگەن بولار, قالالىق اكىمدىك بىرلەستىكتى قىزمەت كابينەتىمەن قامتاماسىز ەتتى. ونىڭ سىرتىندا بىرلەستىكتىڭ 12 بەلسەندى مۇشەسى مەرەكەلىك مەدالمەن ماراپاتتالدى. سونىڭ ءبارى قوسىلا كەلگەندە كوڭىلىمىزدى كوتەرىپ, ومىرگە قۇشتارلىعىمىزدى ارتتىرا تۇسۋدە.
ونىڭ ۇستىنە ەل ومىرىندەگى وڭدى وزگەرىس-جاڭالىقتار جىگەرىمىزگە جىگەر قوسۋدا. وڭدى وزگەرىس دەمەكشى, سونىڭ ءناتيجەسىندە زەينەتاقىمىز جىل سايىن كوتەرىلە ءتۇسىپ كەلەدى. ەلباسىمىز ءتاۋەلسىزدىكتىڭ 20 جىلدىعىنا وراي سالتاناتتى جيىندا جاساعان بايانداماسىندا سوناۋ توقسانىنشى جىلداردىڭ ورتاسىندا زەينەتاقى ءمولشەرى نەبارى 29 دوللار قۇراعانى تۋرالى ايتا كەلىپ, قازىرگى وڭدى وزگەرىستەر تۋرالى دا ايتتى.
مىنە, ەندى, جاڭا جىلدان زەينەتاقى مولشەرى تاعى دا توعىز پايىزعا ارتىپ وتىر. سول ءۇشىن اقساقالدار ەلباسىنا اق العىستارىن ايتادى. مىناداي الەمدىك داعدارىس كەزىندە قارتتارعا ۇدايى قامقورلىق تانىتىپ كەلە جاتقان مەملەكەتتەر كوپ ەمەس. سونىڭ ءبىرى ءبىزدىڭ ەل ەكەندىگىنە كوڭىلىڭ مارقايادى. سوندىقتان تاۋبەمىزدى ۇمىتپايىق, اعايىن دەيمىن!
ساعىندىق بەيسەنباەۆ, «اقىلداستار» اۋىل ارداگەرلەرى قوعامدىق بىرلەستىگىنىڭ توراعاسى.
سەمەي.