مەڭدىعارا اۋدانىنداعى حاركوۆ سەلوسىندا اتاقتى مەحانيزاتور, سوتسياليستىك ەڭبەك ەرى, كسرو مەملەكەتتىك سىيلىعىنىڭ لاۋرەاتى, قوعام قايراتكەرى كامشات دونەنباەۆا تۇرعان ۇيگە ەسكەرتكىش تاقتا ءىلىندى. ونىڭ سالتاناتتى اشىلۋىنا اۋدان باسشىلارى, قازاقستاننىڭ ەڭبەك ەرى سايران بۇقانوۆ, كامشات بايعازىقىزىمەن بىرگە جۇمىس ىستەگەن ەڭبەك ارداگەرلەرى, اۋىلداستارى, تۋىستارى مەن بالا-شاعاسى قاتىستى.
«كامشات بايعاقىزىنىڭ بارلىق ءىسى زامانداستارىنا, كەيىنگى ۇرپاققا ۇلگى. ول كىسىنىڭ ارقاسىندا حاركوۆ اۋىلىن دا, وسى اتتاس شارۋاشىلىقتى دا بۇكىل كەڭەستەر وداعى عانا ەمەس, ودان دا تىس جەرلەر ءبىلدى. كامشات اپانىڭ ارامىزدان كەتكەنىنە ءبىر جىلدىڭ ءجۇزى بولدى, بىراق ءبىز ونى ەشقاشان دا ۇمىتپايمىز. ونىڭ اتىن ماڭگى ەستە قالدىرۋ ءۇشىن وبلىستا دا, اۋداندا دا ءتۇرلى شارالار اتقارىلىپ جاتىر» دەدى اۋدان اكىمى ەرلان تەمەنوۆ.
وسى شارانى ۇيىمداستىرعان «قارقىن» شارۋاشىلىعىنىڭ بۇرىنعى جەتەكشىسى, قازاقستاننىڭ ەڭبەك ەرى سايران بۇقانوۆ كامشات بايعازىقىزىن ۇلتىمىزدىڭ, قازاقستاننىڭ ماقتانىشى دەپ باعالادى.
– كامشات بايعاقىزى ەر ادامدار شىداي بەرمەيتىن جۇمىستى اتقاردى. ەرلەرمەن بىردەي ءجۇرىپ جەر جىرتتى, ەگىن ەكتى, استىق جينادى, مال ىزىعىن دايىندادى. جۇمىستان دەپۋتاتتىق ىسمەن سەزدەرگە, جينالىستارعا بارعاندا بولماسا قالمايتىن, جوسپارىن ورىنداماي تىنىم بولمايتىن. قىرداعى جۇمىسىنىڭ سىتىندا ءۇي-جايى, مالى, بالا-شاعا قامى بار. سونىڭ بارلىعىنا ول ۇلگەرەتىن.ونىڭ زامانداستارىن تاڭقالدىرعان ەڭبەكقورلىعى بۇگىنگى, كەيىنگى ۇرپاققا جەتۋى ءتيىس, – دەدى سايران بالكەن ۇلى.
حاركوۆ اۋىلىنىڭ ورتالىعىنداعى ساياباققا بۇرىنعى «حاركوۆ» كەڭشارىندا, قازىرگى «قارقىن» جاۋاپكەرشىلىگى شەكتەۋلى سەرىكتەستىگىندە ەڭبەك ەتكەن ومىردەن وتكەن مايتالمان مەحانيزاتورلار مەن شارۋاىشىقتىڭ بىلىكتى ماماندارعا ارقايسىسىنىڭ اتى جازىلعان مراموردان بەلگى تاستار قويىلعان.
ەسكەرتكىش تاقتانىڭ اشىلۋ سالتاناتىنان كەيىن اس بەرىلىپ, كامشات اپانىڭ ارۋاعىنا قۇران باعىشتالدى.
ءنازيرا جارىمبەت,
«ەگەمەن قازاقستان»
قوستاناي