پاۆلودار وبلىسىندا «لەنين – اقسۋ – كوكتوبە – ۇلكەن اقجار – كۋرچاتوۆ» اۆتوموبيل جولى ۋچاسكەسىنىڭ كۇردەلى جوندەۋ جۇمىستارى اياقتالدى. BI Road Construction كومپانياسى اتالعان جولدىڭ 80-99 جانە 115-120 شاقىرىمدار ارالىعىن تولىعىمەن قالپىنا كەلتىردى.
ءسويتىپ, پاۆلودار وبلىسىنىڭ ماي اۋدانىندا جوندەلگەن بۇل جولداردىڭ جالپى ۇزىندىعى 24 شاقىرىمدى قۇرادى. جوندەۋ جۇمىستارىنان كەيىن جول ۇساق تۇيىرشىكتى اسفالت-بەتوننان جاسالعان جەتىلدىرىلگەن جابىنى بار, ەنى 7 مەترلىك III ساناتتى جول بولىپ شىعا كەلدى. وتكەن جىلدىڭ مامىر ايىندا باستالعان جوندەۋ جۇمىستارى جوسپارلانعان مەرزىمىنەن 2 اي بۇرىن اياقتالدى.
ء«بىز اۆتوجولدار وبلىس جانە جەرگىلىكتى جۇك جانە جولاۋشىلار تاسىمالى ءۇشىن ۇلكەن ماڭىزعا يە ەكەنىن تۇسىندىك. سوندىقتان دا بارلىق جۇمىستى مۇمكىندىگىنشە ەرتەرەك اياقتاۋعا بار كۇشىمىزدى سالدىق», دەيدى ابك-اۆتودور نس ديۆيزيونى پاۆلودار فيليالىنىڭ جەتەكشىسى ازامات بىرسەيىتوۆ.
قۇرىلىسشىلار ساپا مەن نورماتيۆتەردى قاتاڭ باقىلايتىن جەكە زەرتحانانى پايدالانا وتىرىپ, جولدى اناعۇرلىم ساپالى ەتۋگە مۇمكىندىك بەرگەن تەحنولوگيانى قولداندى. ونىڭ ءمانى تاس كومىردىڭ ك ۇلىندە بولىپ تابىلادى. ول تسەمەنتپەن, توپىراقپەن جانە قيىرشىق تاسپەن بىرگە جولدىڭ ءبىرىنشى جانە قوسىمشا قاباتتارىنا سالىنعان.
اعا زەرتحاناشى قۇربانبەك ومىرزاقوۆ: «كۇلدى ەكىباستۇز ماەس-1-دەن جەتكىزدىك. وسىلايشا, ونىڭ ءوندىرىسىنىڭ قالدىقتارى تەحنولوگيانىڭ ارقاسىندا ەكىنشى رەت پايدالانىلىپ, يگى ىسكە جاراتىلدى. ءبىز تسەمەنتتى نەگىزىنەن جول قىسقا ۋاقىتقا بولسا دا بەرىك بولسىن دەپ قوسامىز, ال كۇل ۋاقىت وتە كەلە قاتايادى, دەمەك, ۋاقىت وتكەن سايىن جول قاباتتارى بەكي تۇسەتىن بولادى. جەرگىلىكتى توپىراقتا سازداق كوپ, ال قوسىمشا بەرىكتىلىك بىزگە ەش ارتىقشىلىق ەتپەيدى» دەيدى.
قالعان ينەرتتى ماتەريالدار مايقايىڭ اۋىلىنان اكەلىنىپتى. ۋچاسكە باستىعى نۇرداۋلەت قاسەنوۆتىڭ ايتۋىنشا, جوبا 93 قول جانە 40 بىرلىك تەحنيكا كۇشىمەن جۇزەگە اسىرىلعان.
ۋچاسكەنى قايتا جوندەۋ – بۇل تەك جول توسەمىن سالۋ عانا ەمەس, سونىمەن قاتار سۋ وتكىزۋ قۇبىرلارىن, جولدىڭ جاناسۋلارى مەن اۆتوبۋس ايالدامالارىن سالۋ سەكىلدى قوسالقى جۇمىستاردان دا تۇرادى.
فاريدا بىقاي,
«ەگەمەن قازاقستان»
پاۆلودار وبلىسى