پارلامەنت سەناتىنىڭ دەپۋتاتتارى داۋرەن ادىلبەكوۆ پەن راشيت اكىموۆ اقمولا وبلىسىنا جۇمىس ساپارى بارىسىندا استراحان اۋدانىنداعى №6 اگروتەحنيكالىق كوللەدجدىڭ وقىتۋشىلارى مەن وندىرىستىك وقىتۋ شەبەرلەرىمەن كەزدەستى, دەپ حابارلاستى قازاقستان رەسپۋبليكاسى پارلامەنتى سەناتىنىڭ ءباسپاسوز قىزمەتى.
ەلباسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىنىڭ نەگىزگى باعىتتارىن ءتۇسىندىرۋ كەزدەسۋدىڭ باستى ماقساتى بولدى.
سەناتور د.ادىلبەكوۆ جولداۋداعى الەۋمەتتىك سالاعا ارنالعان تاراۋلارىنا كەڭىنەن توقتالىپ, ءبىلىم بەرۋ مەن دەنساۋلىق ساقتاۋ سالاسىنداعى جاڭا باعدارلامالاردى بىرتىندەپ ەنگىزۋ, شاعىن جانە ورتا بيزنەسكە سالىناتىن سالىق جۇكتەمەسىن ازايتۋ تۋرالى اڭگىمەلەدى. حالىقتىڭ ءال-اۋقاتىن ارتتىرۋعا باعىتتالعان ازاماتتاردىڭ جالاقىسىن كوتەرۋ جانە وسى باعدارداعى باسقا دا ماسەلەلەر قىزۋ تالقىلاندى.
راشيت اكىموۆ ەلباسىنىڭ جولداۋىن جۇزەگە اسىرۋ ماقساتىندا ەلىمىزدىڭ اۋىل شارۋاشىلىعىن دامىتۋ ماسەلەسىنە توقتالدى. بۇل ورايدا, ءونىم ساپاسى مەن ونىمدىلىگىن ارتتىرۋ, استىق پەن ەتتىڭ ەكسپورتى جانە ولاردى قايتا وڭدەۋگە باعىتتالعان سۋبسيديالارعا باسىمدىق بەرىلەتىن بولادى. ر.اكىموۆتىڭ پىكىرىنشە, ەكونوميكا مەن اۋىل شارۋاشىلىعىنىڭ بارلىق سالالارىنا جاڭا تەحنولوگيالاردى ەنگىزۋ ارقىلى ەڭبەك ونىمدىلىگى ارتادى.
كوللەدج ديرەكتورى قانات سۇيىندىكوۆ دەپۋتاتتارعا وقۋ سىنىپتارى مەن وندىرىستىك شەبەرحانالاردى, ماتەريالدىق-تەحنيكالىق بازانى كورسەتىپ, تۇلەكتەردى جۇمىسقا ورنالاستىرۋدىڭ جاعدايى تۋرالى ايتىپ بەردى.
كەزدەسۋگە استراحان اۋدانىنىڭ اكىمى نۇرلان سەيىلوۆ پەن ءماسليحات حاتشىسى ميرام قوجاحمەت قاتىستى.