قازاقستان پرەزيدەنتى جۋرناليستەر الدىندا سويلەگەن سوزىندە قوناقجايلىق كورسەتكەنى ءۇشىن فينليانديا پرەزيدەنتىنە ريزاشىلىق ءبىلدىرىپ, ەكى جاقتى ىنتىماقتاستىقتىڭ 26 جىلى ىشىندە مەملەكەتتەر اراسىنداعى قارىم-قاتىناستار سەرىكتەستىكتىڭ جوعارى دەڭگەيىنە جەتكەنىن اتاپ ءوتتى, دەپ حابارلايدى اقوردانىڭ ءباسپاسوز قىزمەتى.
– بۇگىن ءبىز ەكى جاقتى جانە كوپ جاقتى فورماتتاعى ىنتىماقتاستىقتىڭ احۋالى مەن كەلەشەگىن ەگجەي-تەگجەيلى ءارى ءوزارا سەنىم جاعدايىندا تالقىلادىق. قازاقستان مەن فينليانديا وڭىرلىك جانە حالىقارالىق ساياساتتىڭ مەيلىنشە وزەكتى ماسەلەلەرىن شەشۋگە قاتىستى ورتاق قاعيداتتار مەن ادىستەردى ۇستانادى, – دەدى نۇرسۇلتان نازارباەۆ.
مەملەكەت باسشىسى فينليانديانىڭ الداعى ۋاقىتتا ەۋروپا وداعىنا توراعالىق ەتەتىنىنە بايلانىستى, فين تاراپىنىڭ قازاقستان مەن ەۋروپا وداعى اراسىنداعى كەڭەيتىلگەن سەرىكتەستىك پەن ىنتىماقتاستىق تۋرالى كەلىسىم اياسىنداعى ديالوگتى تەرەڭدەتۋگە بەلسەندى ىقپال ەتەتىنىنە سەنىم ءبىلدىردى.
نۇرسۇلتان نازارباەۆ قازاقستان – فينليانديا ىنتىماقتاستىعىنىڭ تابىستىلىعى مەن زور الەۋەتىن اتاپ ءوتىپ, ونى جۇزەگە اسىرۋ ءۇشىن بارلىق جاعداي جاسالعانىن ايتتى.
– ەلدەرىمىز اراسىندا جوعارى دەڭگەيدەگى ساياسي ديالوگ تۇراقتى تۇردە وتكىزىلىپ كەلەدى. قولايلى ىسكەرلىك احۋال قالىپتاسۋدا. ءوزارا ءىس-قيمىلدىڭ شارتتىق-قۇقىقتىق جانە ينستيتۋتسيونالدىق بازاسى نىعايۋدا. سونداي-اق, تىكەلەي اۋە قاتىناسى ورناعان. وسى مۇمكىندىكتەردىڭ ءبارىن تولىق پايدالانۋ كەرەك, – دەدى قازاقستان پرەزيدەنتى.
مەملەكەت باسشىسى جۇرگىزىلگەن كەلىسسوزدەردىڭ ناتيجەلەرىنە ارنايى توقتالىپ, فينليانديالىق سەرىكتەستەرىمىز ەكى جاقتى ەكونوميكالىق بايلانىستاردى دامىتۋعا مۇددەلىلىك تانىتىپ وتىرعانىن اتاپ ءوتتى.
– ءبىز قازاقستان مەن فينليانديا اراسىنداعى ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ تيىمدىلىگىن ارتتىرۋعا, سونداي-اق ەنەرگەتيكا, كولىك, اۋىل شارۋاشىلىعى جانە ءبىلىم بەرۋ سالالارىندا قۇرىلعان جۇمىس توپتارىنىڭ قىزمەتىن جانداندىرۋعا ۋاعدالاستىق. سونىمەن قاتار, ءبىز فين كاپيتالى مەن تەحنولوگياسىن قازاقستان ەكونوميكاسىن جاڭعىرتۋ جونىندەگى جوبالارعا تارتۋدىڭ جاڭا مۇمكىندىكتەرىن تالقىلادىق, – دەدى نۇرسۇلتان نازارباەۆ.
مەملەكەت باسشىسى قازاقستان وڭىرلەرىنە فينليانديانىڭ «جاسىل» ەكونوميكاداعى ۇزدىك تاجىريبەلەرىن ەنگىزۋ جونىندەگى جوسپارلارىنا توقتالىپ, تاراپتار قايتا وڭدەۋ سالاسىن, يننوۆاتسيالىق جانە عىلىمدى قامتيتىن كاسىپورىنداردى, سونداي-اق ەكسپورتقا ارنالعان ءوندىرىستى ىنتىماقتاستىقتىڭ باسىم باعىتى رەتىندە بەلگىلەيتىنىن اتاپ ءوتتى.
نۇرسۇلتان نازارباەۆ قازاقستاننىڭ گەوگرافيالىق جاعدايىنىڭ ارتىقشىلىقتارى جونىندە ايتىپ, ءسۋوميدىڭ ەكسپورتتىق الەۋەتىن كۇشەيتۋ جانە فين ەكونوميكاسىنىڭ باسەكەگە قابىلەتتىگىن ارتتىرۋ جولىنداعى جاڭا مۇمكىندىكتەرگە نازار اۋداردى.
– قازاقستان مەن فينليانديانىڭ لوگيستيكالىق كومپانيالارىنىڭ قاتىسۋىمەن ەكى تەمىر جول باعىتىنىڭ ىسكە قوسىلۋى ەلدەرىمىز اراسىندا كولىك-ترانزيت اليانسىن قۇرۋعا جول اشادى, – دەدى مەملەكەت باسشىسى.
سونىمەن قاتار, قازاقستان پرەزيدەنتى بريفينگكە قاتىسىپ وتىرعان جۋرناليستەرگە فينليانديانىڭ بيزنەس وكىلدەرىمەن وتكەن كەزدەسۋ جونىندە ايتىپ, ەكى ەل اراسىنداعى ىنتىماقتاستىققا سەرپىن بەرەتىن جاڭا بيزنەس جوبالارعا توقتالدى.
سوڭىندا نۇرسۇلتان نازارباەۆ كەلىسسوزدەر قورىتىندىسىنا جوعارى باعا بەرىپ, بۇل ساپار حالىقتارىمىزدىڭ يگىلىگى ءۇشىن سەرىكتەستىگىمىزدى ودان ءارى نىعايتىپ, كەڭەيتە تۇسەتىنىنە سەنىم ءبىلدىردى.
***
ساپار قورىتىندىسى بويىنشا مىناداي قۇجاتتارعا قول قويىلدى:
1. قازاقستان رەسپۋبليكاسىنىڭ ەنەرگەتيكا مينيسترلىگى مەن فينليانديا رەسپۋبليكاسىنىڭ ەكونوميكالىق ماسەلەلەر جانە جۇمىسپەن قامتۋ مينيسترلىگى جانە فينليانديا رەسپۋبليكاسىنىڭ قورشاعان ورتانى قورعاۋ مينيسترلىگى اراسىنداعى ەنەرگيا جانە «جاسىل» ەكونوميكا سالاسىنداعى ستراتەگيالىق سەرىكتەستىك جونىندەگى ءوزارا تۇسىنىستىك تۋرالى مەموراندۋم;
2. قازاقستان رەسپۋبليكاسىنىڭ ينۆەستيتسيالار جانە دامۋ مينيسترلىگى مەن فينليانديا رەسپۋبليكاسىنىڭ كولىك جانە كوممۋنيكاتسيالار مينيسترلىگى اراسىنداعى ءوزارا تۇسىنىستىك تۋرالى مەموراندۋم.