قىزىلوردا وبلىسىندا پاتەردى كەيىننەن ساتىپ الۋ قۇقىعىمەن جالعا بەرىلەتىن «وردا» باعدارلاماسى الەۋمەتتىك جاعىنان از قورعالعان وتباسىلاردىڭ ۇلكەن ءۇمىتى بولىپ تۇر.
وسىنداي ۇيگە قولى جەتكەن 1 توپ مۇگەدەگى زاۋرە وسكەنباەۆا «بۇل ءبىز سياقتى ادامدار ءۇشىن ۇلكەن جەڭىلدىك» دەيدى.
قىزىلوردا وبلىسىندا باستاپقى تولەمسىز تۇرعىن ءۇي الۋعا مۇمكىندىك بەرەتىن «وردا» تۇرعىن ءۇي قۇرىلىسىنىڭ «جول كارتاسى» ازىرلەنگەنىن وبلىس اكىمى حالىققا ەسەپ بەرۋ كەزدەسۋىندە ايتقان بولاتىن.
ء«بىز ءوڭىر تۇرعىندارىنىڭ الەۋمەتتىك وسال توبىن مەيلىنشە قولجەتىمدى تۇرعىن ۇيمەن قامتاماسىز ەتۋدى ماقسات ەتىپ قويدىق. سول ءۇشىن 2017 جىلى 3 جىلعا ەسەپتەلگەن «وردا» تۇرعىن ءۇي قۇرىلىسىنىڭ «جول كارتاسىن» ازىرلەدىك. نەسيەلىك تۇرعىن ءۇيدىڭ كوپبالالى وتباسىلار, مۇمكىندىگى شەكتەۋلى از قامتىلعان توپتارىنىڭ بارلىعىنا بىردەي قولجەتىمدى ەمەستىگىن ەسكەرىپ, «نۇرلى جەر» باعدارلاماسى اياسىندا سالىنىپ جاتقان نەسيەلىك تۇرعىن ۇيلەردى جەرگىلىكتى بيۋدجەت ەسەبىنەن ساتىپ الۋعا جىل سايىن وبلىستىق بيۋدجەتتەن 2 ملرد.تەڭگەدەن قارجى ءبولۋ تۋرالى شەشىم قابىلدادىق»,- دەدى قىرىمبەك ەلەۋ ۇلى.
وتكەن جىلى قىزىلوردا وبلىسىندا «نۇرلى جەر» باعدارلاماسى اياسىندا 220 وتباسى باسپانالى بولعان. بيىل دا 262 پاتەر الەۋمەتتىك جاعىنان از قورعالعان ازاماتتارعا سالىنسا, وبلىستىق بيۋدجەت ەسەبىنەن 250 وتباسى ءۇيلى بولادى.
باقتيار تايجان,
«ەگەمەن قازاقستان»
قىزىلوردا وبلىسى