«Jas Qalam» جوباسى قورىتىندىلاندى

فورۋم جۇمىسىنا تۇڭعىش پرەزيدەنت قورىنىڭ ديرەكتورى, پارلامەنت سەناتىنىڭ دەپۋتاتى, سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى داريعا نازارباەۆا, اقپارات جانە كوممۋنيكاتسيالار ءمينيسترى داۋرەن اباەۆ قاتىستى.

جيىننىڭ رەسمي اشىلۋىندا داريعا نازارباەۆا: «جىل سايىن تۇڭعىش پرەزيدەنت – ەلباسىنىڭ قورى مەن قازاقستان جاستار كونگرەسى قوعام ءۇشىن ماڭىزدى جوبالاردى جۇزەگە اسىرىپ كەلەدى. سولاردىڭ قاتارىندا بۇگىنگى زاماندا وزەكتى ماسەلەلەردى ايقىندايتىن – «جاس قالام» جوباسى. بۇل جوبانىڭ ماڭىزدىلىعى ساپالى جانە شىنايى اقپاراتتاردى انىقتاۋعا, ەلىمىزدىڭ جاس ماماندارىنىڭ تۇراقتى قىزمەتتە الەۋەتىن دامىتۋعا ارنالعان. قازىرگى تاڭدا جۋرناليستيكانىڭ جاڭا ترەندتەرى وتە كوپ جانە وسى جاڭالىقتاردى جاستارعا ەلىمىزدىڭ تەك كاسىبي, جوعارى ساناتتى ەڭ ۇزدىك جۋرناليستەرى عانا جەتكىزە الادى. سوندىقتان «جاس قالام» ۋنيۆەرسيتەتتە العان بىلىمگە قوسا جۋرناليستيكا سالاسىن ءىس جۇزىندە دامىتىپ جاتقان شەبەرلەردىڭ تاجىريبەسىنەن ۇلگى الۋعا مول مۇمكىندىك بەرەدى», دەدى.

سونداي-اق ول جۋرناليستيكا كوپتىڭ قىزىعۋشىلىعىنا يە بولعانىن جانە قوعامدى بۇقارالىق اقپارات قۇرالدارىنسىز ەلەستەتۋ مۇمكىن ەمەس ەكەنىن ايتىپ, «جاس قالام» قاتىسۋشىلارعا ەلىمىزدەگى قوعامدىق, ساياسي, ەكونوميكالىق وقيعالاردىڭ, دەرەكتەردىڭ شىنايىلىعىن تەكسەرۋ, جاعىمسىز كونتەنتپەن جۇمىس ىستەۋ, قازىرگى زامانعى اقپاراتتىق تەحنولوگيالاردى قولدانۋ تۋرالى اقپارات الۋعا, جاس جۋرناليستەردىڭ ءرولى, ماسس-مەدياداعى وزگەرىستەر تۋرالى جۋرناليستىك قىزمەتتە تاجىريبە جيناۋعا مۇمكىندىك بەرەتىنىن اتاپ ءوتتى, دەدى. سونىمەن قاتار ول جۋرناليستەردى ەكونوميكا, قۇقىق سىندى كۇردەلى سالالاردى حالىققا تۇسىنىكتى تىلدە جەتكىزۋگە شاقىردى.

بولاشاعىن قالاممەن بايلانىستىرىپ, مەديا سالاسىن باعىندىرۋعا بەت بۇرعان جاس جۋرناليستەرگە اقپارات جانە كوممۋنيكاتسيالار ءمينيسترى داۋرەن اباەۆ: «قالامنىڭ يەسى بولۋ, مىقتى جۋرناليسكە اينالۋ ايتۋعا عانا وڭاي. ول ءۇشىن كوپ ىزدەنىس, تاجىريبە قاجەت. سوندىقتان بۇگىنگى فورۋمنىڭ ماڭىزدىلىعى جوعارى ءارى سىزدەرگە بەرەرى كوپ بولماق. وسىنداي اشىق ديالوگتىق الاڭدار قاناتتارىڭىزدى قاتايتادى, تالاپتارىڭىزدى شىڭدايدى», دەدى. ءسوز سوڭىندا اقپارات جانە كوممۋنيكاتسيالار مينيسترلىگى جاستارعا ءارى جۋرناليستيكاعا قاتىستى باستامالاردى قولداۋعا ءازىر ەكەنىن جەتكىزدى.

فورۋم بارىسىندا جاس جۋرناليستەر ءتىس قاققان تىلشىلەردىڭ ارنايى ترەنينگتەرىنە قاتىستى. تەلەۆيزيا سالاسى بويىنشا «حابار» اگەنتتىگىنىڭ باس رەداكتورى سايات جوكەن, «قازاقستان» تەلەارناسىنىڭ ديرەكتورى ەركىن مۇحامەدجانوۆ, «اتامەكەن» بيزنەس ارناسىنىڭ ديرەكتورى قانات ساحاريانوۆ, «7 ارنانىڭ» باس پروديۋسەرى ناريمان قويشىباەۆ ءدارىس وقىدى. ال «قازاقپارات» اگەنتتىگىنىڭ ديرەكتورى اسقار وماروۆ پەن «ەگەمەن قازاقستان» اق باسقارما توراعاسى دارحان قىدىرالى ءباسپاسوز جانە اقپارات اگەنتتىگىندەگى جازۋ شەبەرلىكتەرى بويىنشا ترەنينگ وتكىزدى. ايتا كەتۋ كەرەك, تۇڭعىش پرەزيدەنتى قورى مەن قازاقستان جاستار كونگرەسى ۇيىمداستىرعان «Jas Qalam» جاستار جوباسىنىڭ جاس جۋرناليستەردىڭ كاسىبي بىلىكتىلىگىن ارتتىرۋعا باعىتتالعان جوبانىڭ فورۋمدار توپتاماسى الماتى, تاراز جانە سەمەي قالالارىندا وتكەن بولاتىن. وڭىرلەردە وتكىزىلگەن فورۋمدارعا 500-دەن اسا جاس قاتىستى.

اقمارال اعزامقىزى

«ەگەمەن قازاقستان»