قازاقستاننىڭ سوتسيال-دەموكراتيالىق «اۋىل» پارتياسى ءوزىنىڭ سايلاۋالدى تۇعىرناماسىن ناسيحاتتاۋ ءىسىن ەلىمىزدىڭ ءار وڭىرىندە قىزۋ قارقىنمەن جۇرگىزۋدە. تەك كەشەگى كۇننىڭ وزىندە عانا پارتيا اتىنان پارلامەنت ءماجىلىسى دەپۋتاتتىعىنان ۇمىتكەر رەتىندە تىركەلگەن پارتيا مۇشەلەرى 20-عا تارتا كەزدەسۋ وتكىزدى. سولاردىڭ ءبىرى الماتى وبلىسى, كەربۇلاق اۋدانىنىڭ ورتالىعىندا جانە اۋداننىڭ تاستىوزەك كەنتىندە پارلامەنت ءماجىلىسى دەپۋتاتتىعىنان ۇمىتكەر سارسەنعالي اجىباەۆپەن بولىپ ءوتتى.
جينالىسقا قاتىسۋشى ادامدار پارتيانىڭ سايلاۋالدى تۇعىرناماسىنا قولداۋ بىلدىرەتىندىگىن, اۋىل مۇددەسىن قولدايتىن ءبىر پارتيانىڭ ءبىزدىڭ قوعامىمىزعا قاشاندا بولسىن قاجەت ەكەندىگىن, سوندىقتان «اۋىل» پارتياسىنىڭ ەل پارلامەنتى ءماجىلىسىنەن ورىن الۋىنا ۇمتىلاتىندارىن جەتكىزدى.
وسىنداي كەزدەسۋ استانا قالاسىنداعى «استانا-بۋراباي» ونەركاسىپتىك بازاسىندا دا بولىپ ءوتتى. مۇندا جينالعان قاۋىم پارلامەنت ءماجىلىسى دەپۋتاتتىعىنان «اۋىل» پارتياسىنىڭ اتىنان ۇمىتكەر بولىپ تىركەلگەن اۋىل شارۋاشىلىعى سالاسىنداعى بەلگىلى عالىم, اۋىل شارۋاشىلىعى عىلىمدارىنىڭ دوكتورى, اكادەميك كوپماعامبەت ەلەمەسوۆپەن كەزدەستى. كەزدەسۋ تارتىمدى دا مازمۇندى بولدى. اۋىل شارۋاشىلىعىنىڭ جاعدايىمەن جەتە تانىس اكادەميك وسى سالاداعى جۇمىستاردىڭ قازىرگى بارىسىنا, سونىمەن قاتار, پارتيانىڭ سايلاۋالدى تۇعىرناماسىنا كەڭىنەن توقتالدى. «اۋىل» پارتياسىنىڭ كوزدەيتىن ماقسات-مۇددەسى ەلىمىزدىڭ كوپشىلىك قاراپايىم حالقىنىڭ قۇقىعى مەن بوستاندىعىن قامتاماسىز ەتۋ, الەۋمەتتىك پروبلەمالارىن شەشۋ ەكەندىگىن ءارتۇرلى فاكتىلەر ارقىلى جەتكىزىپ ايتىپ بەردى.
بۇل باسقوسۋدا دا «اۋىل» پارتياسىنىڭ سايلاۋالدى تۇعىرناماسىن جاقتايتىندار كوپ بولىپ شىقتى. سونىمەن بىرگە, ولار ەلىمىزدەگى كەيبىر پروبلەمالىق ماسەلەلەردى دە اتاپ كورسەتە وتىرىپ, ولاردىڭ شەشىلۋىنە «اۋىل» پارتياسىنىڭ بەلسەنە قاتىساتىندىعىنا سەنىم بىلدىرەتىندىكتەرىن ايتىپ ءوتتى.
ءدال وسىنداي كەزدەسۋلەر اقتوبە وبلىسىنىڭ بىرقاتار ەلدى مەكەندەرىندە, سولتۇستىك قازاقستان وبلىسىنىڭ قىزىلجار اۋدانىندا, وڭتۇستىك قازاقستان وبلىسىنىڭ كەنتاۋ قالاسىندا جانە ەلىمىزدىڭ باسقا دا وڭىرلەرىندە بولىپ ءوتتى.
سۇڭعات ءالىپباي.