پاتريوتتار پارتياسىنىڭ الماتى قالالىق كوميتەتىنىڭ ءبىرىنشى حاتشىسى گۇلدانا نۇرپەيىسوۆا جانە وزگە دە بەلسەندى مۇشەلەرى كەشە قالالىق جول پوليتسياسى بولىمىنە ارنايى باس سۇقتى. وندا جول پوليتسياسىنىڭ جۇمىسى مەن ولاردىڭ مارتەبەسى جانە جول قاۋىپسىزدىگى سياقتى ماسەلەلەر كەڭىنەن ءسوز بولدى. سونىڭ ىشىندە جول پوليتسياسى قىزمەتكەرلەرىنىڭ الەۋمەتتىك پاكەتتەرىن ەنگىزۋ قاجەتتىگى, جالاقىلارىنىڭ جوعارى بولۋى جانە زەينەتاقىمەن قامتاماسىز ەتۋدىڭ جەتىلدىرىلۋى قاجەتتىگى دە نازاردان تىس قالعان جوق.
وسى ورايدا پارتيا تاراپىنان قالالىق جول پوليتسياسى عيماراتىندا وسى سالا قىزمەتكەرلەرى الدىندا ارنايى جاڭاجىلدىق كونتسەرت ۇيىمداستىرىلعاندىعىن دا ايتا كەتۋ كەرەك. سونىمەن قاتار, پارتيا بەلسەندىلەرى كوشە-كوشە بويىمەن ءجۇرىپ ءوتىپ, قالا تۇرعىندارىمەن جۇزدەستى. بۇدان باسقا پاتريوتتار قالالىق جەدەل جاردەم ستانساسىنا بارىپ, مۇندا دا كونتسەرت ۇيىمداستىردى. ارتىنان مەديتسينا قىزمەتكەرلەرىنىڭ باسىنداعى جاعداي اڭگىمە وزەگىنە اينالدى. دارىگەرلەردىڭ جالاقىسىن كوتەرۋ, قازىرگى زامانعا ساي قۇرال-جابدىقتارمەن قامتاماسىز ەتۋ ماسەلەلەرى كوتەرىلدى. جول پوليتسياسى مەن جەدەل جاردەم قىزمەتكەرلەرى دە جاڭا جىلدا جۇمىس ورىندارىندا بولاتىندىعى بەلگىلى. كۇندىز-ءتۇنى تىنىم تاپپايتىن وسى سالا قىزمەتكەرلەرىنىڭ جاعدايى جان-جاقتى جاسالۋى كەرەك, سونىڭ ىشىندە جالاقىلارىن كوتەرۋ كەرەك, دەپ ەسەپتەيدى پاتريوتتىقتار.
سونداي-اق پاتريوتتىق بەلسەندىلەر الماتىداعى ماڭگى الاۋعا بارىپ گۇل شوقتارىن قويىپ, اۋعان جانە ۇلى وتان سوعىسىنىڭ شەيىت بولعان ارداگەرلەرىنە تاعزىم ەتتى. ۇلى وتان سوعىسى كەزىندە قازاقستاندىق پانفيلوۆ ديۆيزياسى ماسكەۋ تۇبىندە نەمىستەردىڭ شابۋىلىنا تويتارىس بەرگەنى تاريحتان بەلگىلى. پارتيا سول ەرلىك ەشقاشان ۇمىتىلمايتىندىعىن وسىلايشا ءبىلدىردى. سونىمەن بىرگە, پاتريوتتىقتار ۇلى وتان سوعىسى مەن اۋعان سوعىسى ارداگەرلەرىنىڭ قازىرگى جاعدايىن ايتا كەلىپ, ولارعا ۇنەمى كوڭىل اۋدارىلۋى قاجەتتىگىن ورتاعا سالدى.
وسى رەتتە پارتيا اۋلا, شاعىن اۋدان, كوشەلەردە دە كەزدەسۋلەر وتكىزىپ, قاراپايىم قالا تۇرعىندارىمەن ءجۇزدەسىپ, ناسيحات جۇمىستارىن جۇرگىزىپ كەلە جاتقانىن ايتا كەتكەن ءجون.
اسقار تۇراپباي ۇلى.