استانا مەملەكەتتىك قىزمەت حابىنىڭ باسقارۋشى كوميتەتىنىڭ توراعاسى اليحان بايمەنوۆ كانادا كىرىستەر اگەنتتىگىنىڭ اۋديت, باعالاۋ جانە تاۋەكەلدەر جونىندەگى كوميسسارىنىڭ ورىنباسارى –اۋديت جونىندەگى باس اتقارۋشى ديرەكتورى برايان فيلبينمەن كەزدەستى.
تاراپتار استانا حابىنا قاتىسۋشى ەلدەردىڭ مەملەكەتتىك قىزمەتشىلەرىنە ارنالعان اۋديت, باعالاۋ جانە تاۋەكەلدەردى باسقارۋ جۇيەسى بويىنشا بىرلەسكەن ترەنينگتەر مەن سەمينارلار وتكىزۋ مۇمكىندىگىن تالقىلادى.
اليحان بايمەنوۆ: «مەملەكەتتىك ورگانداردىڭ اۋديت جانە باعالاۋ جۇيەسى - مەملەكەتتىك باسقارۋ تيىمدىلىگىن ارتتىرۋدىڭ ماڭىزدى فاكتورى. بۇل - ايماق ەلدەرىندە ءالى دە جەتىلدىرۋدى قاجەت ەتەتىن باعىتتاردىڭ ءبىرى. وسى تۇرعىدان العاندا, كانادا تاجىريبەسى ۇلكەن قىزىعۋشىلىق تۋدىرىپ وتىر» - دەپ اتاپ ءوتتى.
ءوز كەزەگىندە برايان فلينبين مىرزا: «مەملەكەتتىك قۇرىلىمداردىڭ قىزمەتىن باعالاۋدا ەڭ ماڭىزدىسى: بىرىنشىدەن - تاۋەكەلدەردى باسقارۋدى, ەكىنشىدەن - ادامي رەسۋرستاردى باسقارۋدى باعالاۋ. ويتكەنى كەز كەلگەن جۇيەدە ادامداردىڭ ءرولى اسا ماڭىزدى. بارلىق وزگەرىستەردى ادامدار جۇزەگە اسىرادى, سوندىقتان قىزمەتكەرلەردى ساپالى ىرىكتەۋ جانە باسقارۋ - نەگىزگى فاكتور», - دەدى.
تاراپتار ءوزارا ىنتىماقتاستىقتىڭ كەلەسى ناقتى قادامدارىن ايقىندادى. قازىرگى تاڭدا, استانا حابىنىڭ قاتىسۋشى ەلدەرىنىڭ قۇرامىنا 40 مەملەكەت كىرەدى, سولاردىڭ ىشىندە ەىدۇ, تمد, كاۆكاز, ورتالىق ازيا جانە ACEAن ەلدەرى دە بار.