مەملەكەت باسشىسى نۇرسۇلتان نازارباەۆ ءوزىنىڭ جۋىرداعى قازاقستان حالقىنا جولداۋىندا 2019 جىلدى جاستار جىلى دەپ جاريالاعان بولاتىن. اقتوبە وبلىسى جولداۋدى جۇزەگە اسىرۋ شارالارىنىڭ جوسپارىن ازىرلەۋگە كىرىسىپ كەتتى. جوسپار جاس ۇرپاق وكىلدەرىنىڭ مۇددەلەرىن ەسكەرە وتىرا جاسالۋدا. 12 قازان, جۇما كۇنى وبلىس اكىمى بەردىبەك ساپارباەۆ وڭىردەگى نەعۇرلىم بەلسەندىرەك جاستاردىڭ پىكىرلەرى مەن تىلەكتەرىن تىڭدادى.
كەزدەسۋگە وبلىس باسشىسىمەن قوسا 55 ادام قاتىستى. ولار – نازارباەۆ ينتەللەكتۋالدى مەكتەبى مەن جەتەكشى مامانداندىرىلعان مەكتەپ-ينتەرناتتاردىڭ وقۋشىلارى, ەرىكتىلەر, سپورتشىلار, جاس جۋرناليستەر, كاسىپكەرلەر مەن قوعام قايراتكەرلەرى.
- سىزدەرگە جانە سىزدەردىڭ قۇرداستارىڭىز ءۇشىن ەل پرەزيدەنتىنىڭ باستاماسىمەن 2019 جىلى جەكە باسىڭىزدىڭ وسۋىنە, سىزدەردىڭ تۋعان حالقىڭىز بەن تۋعان ەلىڭىزدىڭ گۇلدەنۋىنە وزدەرىڭىز ۇلەس قوسۋلارىڭىز ءۇشىن جاڭا مۇمكىندىكتەر اشىلادى. ارقايسىسىمىز مەملەكەت باسشىسىنىڭ باستاماسىنا, ەڭ الدىمەن, گۇلدەنگەن, زاماناۋي, مىقتى مەملەكەتتىڭ ازاماتى بولۋ ءۇشىن, ءوزىمىز ءۇشىن كىرىسۋىمىز كەرەك», - دەدى كەزدەسۋدىڭ اشىلۋىندا بەردىبەك ساپارباەۆ.
بەلسەندىلەر وبلىس اكىمىمەن اڭگىمە كەزىندە وبلىس اۋداندارىندا اعىلشىن ءتىلىنىڭ الەۋمەتتىك مەكتەپتەرىن اشۋ, ەرىكتىلەر قوزعالىسىن كۇشەيتۋ, جاستار ءۇشىن ءموبيلدى قوسىمشا ازىرلەۋ نەمەسە وليميادا قاتىسۋشىلارى ءۇشىن جازعى مەكتەپتەر اشۋ سىندى بىرنەشە تاجىريبەلىك جوبالاردى ۇسىندى.
جۇزدەسۋدى تۇيىندەگەن وبلىس اكىمى كەزدەسۋ كەزىندە كوتەرىلگەن بارلىق سۇراقتاردىڭ وزەكتى جانە ماڭىزى زور ەكەنىن اتاپ ءوتتى.
- سىزدەردىڭ بۇگىنگى ۇسىنىستارىڭىز – ماڭىزدى ءارى قىزىقتى. جاستار قاشاندا باتىل ءارى سەرپىندى يدەيالاردىڭ گەنەراتورى بولعان. جانە بۇگىن بىزگە سىزدەردىڭ بەلسەندىلىكتەرىڭىز قاجەت. وقۋ ورىندارىندا, جۇمىستا قۇرداستارىڭىزبەن ولاردى نە قىزىقتىراتىنى جانە نە تولعاندىراتىنى جايىندا تىلدەسىڭىزدەر. ولاردىڭ ايتقاندارىن جيناپ, جاستار ءىسى جونىندەگى باسقارماعا جىبەرىڭىزدەر. بۇل مەكەمە ءبارىن ساراپتاپ, بىرىكتىرەدى. بارلىق وزەكتى يدەيالار قاراشا ايىندا ازىرلەنەتىن جاستار جىلى جوسپارىنىڭ ءىس-شارالارىنا ەنگىزىلەدى,-دەدى بەردىبەك ساپارباەۆ سۇحباتتاسۋشىلارىنا قاراتا ايتقان سوزىندە.
بۇگىندە جوسپارعا جاستار اراسىنداعى كاسىبي باعدارلاۋ جۇمىسى, نازارباەۆ ينتەللەكتۋالدى مەكتەبىنىڭ تاجىريبەسىن وزگە وقۋ ورىندارىنا تاراتۋ, ءىرى جانە ورتا كاسىپورىنداردا جاستار بىرلەستىكتەرىن قۇرۋ شارالارىنىڭ كەڭ شوعىرى كىرەتىنى بەلگىلى.
ايتا كەتۋ كەرەك, اقتوبە وبلىسىنداعى جاستار جىلى «باقىتتى بالا» وڭىرلىك جوباسىنىڭ جالعاسى بولماق. وسى جىلدىڭ باسىنان بەرى اتالمىش جوبا اياسىندا 100 مىڭنان اسا بالالار مەن جاسوسپىرىمدەردىڭ قاتىسۋىمەن 3 300-دەن استام شارالار جۇزەگە اسىرىلدى. وبلىس بويىنشا 23 ءىت-سىنىپ اشىلىپ, ءبىلىم بەرۋ, مادەنيەت جانە سپورت نىساندارىنىڭ ماتەريالدىق-تەحنيكالىق بازاسى نىعايدى. 177 جاڭا سپورت جانە ويىن الاڭدارى قۇرىلدى. مىڭداعان جەتىم جانە اتا-انا قامقورىنسىز قالعان بالالاردىڭ تۇرعىن ءۇي جيناق ەسەپشوتتارى 80 ملن تەڭگەگە تولىعىپ, 81 جەتىم بالاعا جاڭا پاتەرلەر مەن ۇيلەردىڭ كىلتتەرى تابىس ەتىلدى. وسىنىڭ بارلىعى «باقىتتى بالا» جوباسى اياسىندا جۇزەگە اسىرىلعان يگى ىستەردىڭ ءبىر بولىگى عانا.