تاۋەلسىزدىكتىڭ 20 جىلدىعى بارىمىزگە ۇلكەن وي سالدى. ەل ومىرىندەگى ەرەكشە بەلەس بارشا قازاقستاندىقتار ءۇشىن تاعىلىمدى مەرەكە رەتىندە اتاپ ءوتىلدى. رۋحاني بولمىسىمىز بەن ۇلتتىق سانامىزدىڭ بيىكتەپ, مەملەكەت, ۇلت مۇددەسى جولىندا توپتاسا بىلەتىنىمىزدى ايقىن اڭعارتتى. قازاقستان رەسپۋبليكاسىنىڭ پرەزيدەنتى, ۇلت كوشباسشىسى ن.ءا.نازارباەۆ ەل تاۋەلسىزدىگىنىڭ مەرەيتويىنا ارنالعان سالتاناتتى جينالىستا سويلەگەن سوزىندە قول جەتكەن جەتىستىكتەرىمىزبەن قوسا ىرگەلى مىندەتتەردى دە بەلگىلەپ بەردى. الدا جاڭا تەحنولوگيالار توڭكەرىسى كۇتىپ تۇرعانىن, تۇبەگەيلى وزگەرىستەر جاڭا ەكونوميكالىق الەم قۇرىلىسىنىڭ نەگىزدەرىن ايقىندايتىنىن, وعان دايىن بولۋىمىز كەرەكتىگىن اتاپ ءوتتى. سونىمەن قاتار, قاۋىپ-قاتەرلەر كەزدەسەتىنىن دە ەسكەرتتى. وسىنداي تىعىرىقتارعا ۇرىنباي, امان-ەسەن شىعۋدىڭ جولى رەتىندە مىقتى ەكونوميكا مەن كۇشتى مەملەكەت قالىپتاستىرۋدى ۇسىندى. بۇل ورايدا, ءبىلىم بەرۋ مەن دەنساۋلىق ساقتاۋ, جاستار جانە تۇرعىن ءۇي ساياساتى ماڭىزدى ءرول الارى ءسوزسىز. ەندى «ءومىر ساپاسى–2030» جالپىۇلتتىق باعدارلاماسى ىسكە قوسىلىپ, ادامدار لايىقتى جۇمىسپەن, قولجەتىمدى تۇرعىن ۇيمەن, ساپالى دەنساۋلىق جانە ءبىلىم بەرۋ جۇيەلەرىمەن قامتىلاتىن بولدى. بولاشاعىن, كەلەشەگىن ويلاعان ەل عانا وسىنداي قادامدارعا بارسا كەرەك.
«دەنى ساۋ ۇلت–2030» جالپىۇلتتىق باعدارلاماسى دا جۇرتشىلىقتى سالاماتتى ءومىر سۇرۋگە ىنتالاندىرىپ, دەموگرافيالىق ءوسىمگە, انا مەن بالا ءولىمىنىڭ ازايۋىنا, اسا قاتەرلى اۋرۋلاردىڭ الدىن الۋعا ىقپال جاسارى انىق. ويتكەنى, مۇندا مەديتسينا سالاسىن دامىتۋدىڭ ۇزاق مەرزىمدى شارالارى قاراستىرىلعان.
ءبىزدىڭ بولاشاعىمىز كىمدەر دەگەندە, ءسوز جوق, قازىرگى جاستار الدىمەن ويعا ورالادى. ول زاڭدى دا. جاسامپازدىقتىڭ جيىرما جىلىندا تالابى بيىك, زاماننىڭ قازىرگى تەحنولوگيالارىن تەرەڭ مەڭگەرگەن, ءبىلىمدى بۋىن قالىپتاستى. ەلباسىنىڭ ەلىمىزبەن بىرگە كەمەلدىك كەزەڭگە اياق باسقان جاستارعا سەنىم ارتۋى – ولاردىڭ قادامىنا بەرىلگەن لايىقتى باعا. جەلكىلدەپ ءوسىپ كەلە جاتقان جاس بۋىننىڭ بىلىكتى مامان, وتانشىل ازامات بولىپ وسۋىنە, عىلىم مەن ءبىلىمنىڭ وزىق جۇيەسىن مەڭگەرۋگە ەلىمىزدە بارلىق جاعداي جاسالعان. ىرگەسى بەرىك, بىرلىگى بەكەم مەملەكەتتىڭ جاقسى داستۇرلەرىن جالعاستىرۋعا ولاردىڭ مۇمكىندىكتەرى مول.
ءبىر سوزبەن ايتقاندا, پرەزيدەنتتىڭ ءار سوزىنەن قازاقستاندىقتارعا دەگەن ناقتى قامقورلىق انىق اڭعارىلادى.
باقىتجان ساميەۆا, سولتۇستىك قازاقستان وبلىستىق ىسكەر ايەلدەر اسسوتسياتسياسىنىڭ ءتورايىمى.
سولتۇستىك قازاقستان وبلىسى.