قازاقستان رەسپۋبليكاسى ۇكىمەتىنىڭ 2018 جىلعى 9 قازانداعى № 624 قاۋلىسى نەگىزىندە قازاقستان رەسپۋبليكاسى ۇكىمەتىنىڭ كەيبىر شەشىمدەرىنە, ونىڭ ىشىندە «مىندەتتى زەينەتاقى جارنالارىن, مىندەتتى كاسىپتىك زەينەتاقى جارنالارىن ەسەپتەۋ, ۇستاپ قالۋ (ەسەبىنە جازۋ) جانە بىرىڭعاي جيناقتاۋشى زەينەتاقى قورىنا اۋدارۋ جانە ولار بويىنشا ءوندىرىپ الۋ قاعيدالارى مەن مەرزىمدەرىن بەكىتۋ تۋرالى» ۇكىمەتتىڭ 2013 جىلعى 18 قازانداعى № 1116 قاۋلىسىنا وزگەرىستەر مەن تولىقتىرۋلار ەنگىزىلدى, دەپ حابارلايدى «بجزق» اق ءباسپاسوز ورتالىعى.
ول 2018 جىلدىڭ 11 قازانىنان باستاپ كۇشىنە ەندى.
وسى ورايدا زەينەتاقى قورى «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» قازاقستان رەسپۋبليكاسىنىڭ زاڭىنا («قازاقستان رەسپۋبليكاسىنىڭ كەيبىر زاڭنامالىق اكتىلەرىنە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» 2018 جىلعى 2 شىلدەدەگى № 165-ءVى زاڭى) ەنگىزىلگەن وزگەرىستەرگە سايكەس ازاماتتىق-قۇقىقتىق شارتتار بويىنشا تابىس الاتىن جەكە تۇلعالار ءوز پايداسىنا بىرىڭعاي جيناقتاۋشى زەينەتاقى قورىنا (بۇدان ءارى – بجزق, قور) الاتىن تابىسىنىڭ 10 پايىزى مولشەرىندە (بىراق ەڭ تومەنگى جالاقىنىڭ 10 پايىزىنان كەم ەمەس جانە 75 ەسەلەنگەن مولشەرىنىڭ 10 پايىزىنان جوعارى ەمەس), مىندەتتى زەينەتاقى جارنالارىن (مزج) تولەۋگە ءتيىستى ەكەندىگىن مالىمدەپ وتىر.
زاڭ ەرەجەسىن ورىنداۋ ءۇشىن ەڭبەك جانە حالىقتى الەۋمەتتىك قورعاۋ مينيسترلىگى زەينەتاقى جارنالارىن اۋدارۋ قاعيدالارىنا تيىستى وزگەرىستەر ەنگىزدى. ويتكەنى اتالمىش مينيسترلىك مزج اۋدارۋ ءتارتىبى مەن مەرزىمىن ازىرلەۋگە قاتىستى ۋاكىلەتتى مەملەكەتتىك ورگان بولىپ تابىلادى. وزگەرىستەر زەينەتاقى جارنالارىن اۋدارۋ ەرەجەسىنىڭ مىنا تۇستارىنا ەنگىزىلگەن:
مزج ەسەپتەۋ نىسانىنا جەكە تۇلعالاردىڭ زاتى جۇمىستاردى ورىنداۋ (قىزمەت كورسەتۋ) بولىپ تابىلاتىن, ازاماتتىق-قۇقىقتىق شارتتار بويىنشا العان تابىستارىن قوسۋ;
1. ازاماتتىق-قۇقىقتىق شارتتار بويىنشا تابىس الاتىن, ەكىنشى دەڭگەيدەگى بانكتەردە نەمەسە جەكەلەگەن بانك وپەراتسيالارىن جۇزەگە اسىراتىن ۇيىمداردا (بۇدان ءارى – ەدب, بانكتەر) شوتى جوق جەكە تۇلعالار مزج-نى بانككە قولما-قول اقشامەن اۋدارادى, سونداي-اق مۇنداي تۇلعالاردىڭ مزج-نى مەملەكەتتىك كورپوراتسياعا اۋدارۋ مەرزىمى تابىس الىنعان ايدان كەيىنگى ايدىڭ 25-نە دەيىن بەلگىلەنگەن;
2. ناقتىلاۋشى سيپاتقا يە تۇزەتۋلەر, سولارعا سايكەس م ۇلىكتىك تابىستاردان مزج ۇستالمايدى.
وسىلايشا, ازاماتتىق-قۇقىقتىق شارتتار بويىنشا تابىس الاتىن جەكە تۇلعالار مزج-نى بانككە مىنا تارتىپپەن اۋدارادى:
ازاماتتىق-قۇقىقتىق شارتتار بويىنشا جۇمىس ىستەيتىن, قىزمەت كورسەتەتىن جەكە تۇلعالار تابىس العان سوڭ, مزج-نى ءوز بەتىمەن قورعا ەدب نەمەسە «قازپوشتا» اق ارقىلى سول تابىس العان ايدان كەيىنگى ايدىڭ 25-نەن كەشىكتىرمەي تولەيدى; ەكىنشى دەڭگەيدەگى بانكتەردە شوتى جوق جەكە تۇلعالار مزج-نى كەيىننەن مەملەكەتتىك كورپوراتسياعا اۋدارۋ ءۇشىن مزج-نى بانككە نەمەسە «قازپوشتا» اق قولما-قول اقشامەن وتكىزەدى; بانكتەر نەمەسە «قازپوشتا» اق تمك (تولەم ماقساتىنىڭ كودى) 010 كودىن قولدانا وتىرىپ, مەملەكەتتىك كورپوراتسياعا تولەم تاپسىرماسىن ازىرلەيدى.
ودان ءارى, سالىمشىلاردىڭ مزج سوماسى مەملەكەتتىك كورپوراتسيانىڭ شوتىنا كەلىپ تۇسكەن كۇننەن باستاپ ءۇش جۇمىس كۇنى ىشىندە مت-100 فورماتىنداعى ەلەكتروندىق تولەم تاپسىرمالارىمەن بجزق-عا اۋدارىلادى.
قانداي دا ءبىر كەزەڭدە تابىس بولماعان جاعدايدا بۇل تۇلعالار بجزق-عا ءتيىستى قارجى جىلىنا ارنالعان رەسپۋبليكالىق بيۋدجەت تۋرالى زاڭدا بەلگىلەنگەن ەڭ تومەنگى جالاقى مولشەرىنىڭ 10 پايىزى ەسەبىنەن ءوز پايداسىنا مىندەتتى زەينەتاقى جارنالارىن تولەۋگە قۇقىلى. زەينەتاقىمەن قامسىزداندىرۋ تۋرالى شارت جوق بولعان جاعدايدا, جەكە زەينەتاقى شوتىن اشۋ تۋرالى وتىنىشكە قول قويۋ ارقىلى مىندەتتى زەينەتاقى جارنالارىن ەسەپكە الۋ بويىنشا زەينەتاقىمەن قامسىزداندىرۋ تۋرالى شارت جاساسۋ قاجەت. ءوتىنىش ۇلگىلەرى بجزق رەسمي سايتىندا ورنالاستىرىلعان. جەكە زەينەتاقى شوتىن اشۋ تۋرالى ءوتىنىشتى جەكە باستى كۋالاندىراتىن قۇجاتپەن بجزق-نىڭ كەز كەلگەن بولىمشەسىندە نەمەسە ەلەكتروندىق تسيفرلىق قولتاڭبانىڭ كومەگىمەن enpf.kz سايتى ارقىلى بەرۋگە بولادى.
ايناش ەسالي,
«ەگەمەن قازاقستان»
الماتى