پرەمەر-ءمينيستردىڭ ورىنباسارى – اۋىل شارۋاشىلىق ءمينيسترى ومىرزاق شوكەەۆ قاراعاندى وبلىسىندا جۇمىس ساپارىمەن بولىپ قايتتى. ۆيتسە-پرەمەر ءوڭىردىڭ بىرقاتار اگروونەركاسىپ كەشەندەرىن ارالاپ, ودان كەيىن جەرگىلىكتى اگراريلەرمەن سالاداعى وزگەرىستەردى جانە باسقا دا ماسەلەلەردى تالقىلعان كەزدەسۋ وتكىزدى.
– ەلباسى اۋىل شارۋاشىلىق كەشەنىندەگى ەڭبەك ونىمدىلىگى مەن قايتا وڭدەلگەن اۋىل شارۋاشىلىق ونىمدەرىنىڭ ەكسپورتىن كەم دەگەندە 2,5 ەسەگە ۇلعايتۋدى تاپسىردى. بۇل وتە ماڭىزدى مىندەتتەمە جانە ولار ەسكى ادىستەرمەن شەشىلمەيدى. ءبىز تاسىلدەردى قايتا قاراستىردىق, جاڭا مەملەكەتتىك باعدارلاما قابىلدادىق جانە ونى جۇزەگە اسىرۋعا كىرىسىپ تە كەتتىك. قاراعاندى وبلىسىنا ءبىز وسى باعىتتاعى جۇمىستاردىڭ قالاي ءجۇرىپ جاتقانىن كورىپ ءۇشىن كەلدىك, – دەدى ۆيتسە-پرەمەر.
ومىرزاق شوكەەۆ مارگارين ونىمدەرىن شەت ەلگە ەكسپورتتايتىن «Eurasian Foods» اق زاۋىتىندا جانە «قۇرما اگروفيرماسى» جشس قۇس فابريكاسىندا بولىپ, كاسىپورىنداردىڭ جۇمىس ىرعاعىمەن تانىستى. قۇس فابريكاسىندا ۆيتسە-پرەمەرگە قالدىقتاردان جىلۋ جانە ەلەكتر قۋاتىن شىعاراتىن بيوگازدىق قۇرىلعى كورسەتىلدى. بۇدان كەيىن ءو.شوكەەۆ شەت ەلدەرگە ەت ەكسپورتتايتىن «جاكە» شارۋا قوجالىعىنىڭ بورداقىلاۋ الاڭىنا ات باسىن تىرەدى.
ال «الفارۋح» جشس كوتەرمە-تاراتۋ لوگيستيكالىق ورتالىعىنىڭ سالىنىپ جاتقان عيماراتىن ارالاپ كورگەن ومىرزاق شوكەەۆ بىتۋگە تاياۋ قالعان ىسكە ريزاشىلىعىن ءبىلدىردى. وبلىس اكىمدىگىندە ايماقتىڭ اۋىل شارۋاشىلىق سالاسى قىزمەتكەرلەرىمەن بولعان كەزدەسۋ بارىسىندا ۆيتسە-پرەمەر اتالعان ورتالىق قۇرىلىسىنان العان اسەرىن بىلايشا ساباقتادى:
– بۇل ەلىمىزدەگى تۇڭعىش كوتەرمە-تاراتۋ لوگيستيكالىق ورتالىعى. جانە بۇل تۇبەگەيلى جاڭا پرينتسيپ بويىنشا جۇمىس ىستەيتىن نىسان: قويما دا ەمەس, بيرجا نەمەسە بازار دا ەمەس. مۇنداي ورتالىقتاردى بارلىق وبلىستاردا قۇرۋ كەرەك بولاتىن. بىراق العاشقى بولىپ قاراعاندىلىقتار ىسكە قوسقالى جاتىر. ءبىز بۇل جوبانى بارىنشا قولدايتىن بولامىز, – دەدى ۆيتسە-پرەمەر.
سونداي-اق ومىرزاق شوكەەۆ مۇنداي نىساننىڭ تۇرعىندار ءۇشىن ازىق-ت ۇلىك باعاسىن تومەندەتۋگە مۇمكىندىك بەرەتىنىن جانە وتاندىق اۋىل شارۋاشىلىق ونىمدەرىن ەكسپورتقا شىعارۋ ءۇشىن قولايلى جاعداي تۋعىزاتىنىن اتاپ ءوتتى.
جالپى قاراعاندىداعى كوتەرمە-تاراتۋ لوگيستيكالىق ورتالىعىنىڭ ءبىرىنشى كەزەگى 2018 جىلدىڭ سوڭىنا تامان قوسىلادى دەپ جوسپارلانعان. قۇنى 10 ملرد تەڭگەدەن استاتىن جوبا «بيزنەستىڭ جول كارتاسى-2020» مەملەكەتتىك باعدارلاماسى تاراپىنان مىقتى قولداۋ كورۋدە.
كەزدەسۋ بارىسىندا اۋىل شارۋاشىلىعى سالاسىنداعى ومىرگە ەنگەن جاڭالىقتار, سونىمەن قاتار ءتۇيىنى تارقاتىلماعان كەيبىر ماسەلەلەر دە ەگجەي-تەگجەيلى ءسوز بولدى. سونان سوڭ ۆيتسە-پرەمەر جيىنعا قاتىسۋشىلاردىڭ سۇراقتارىنا جاۋاپ بەردى. ماسەلەن جەرگىلىكتى اگراريلەر ەلىمىزدە توپىراقتىڭ تەرەڭ ساراپتاماسىن جاسايتىن زەرتحانالاردىڭ جوقتىعىن, زەرتتەلۋى ءتيىس ۇلگىلەردى ەۋروپاعا تاسىمالداۋعا تۋرا كەلەتىنىن قىنجىلا ايتتى.
– بۇل ورىندى سۇراق, – دەپ كەلىستى ومىرزاق شوكەەۆ. – مۇنىمەن اينالىساتىن بولامىز. ايتسا ايتقانداي, قازىر جولداۋدا قويىلعان تاپسىرمالارعا ساي, عىلىمعا قاراجات ءبولىنىپ جاتىر.
كەزدەسۋ بارىسىندا اۋىل شارۋاشىلىعى ونىمدەرىن وندىرۋشىلەر سۋبسيديالاۋعا, ءداندى-داقىلدارعا باعانىڭ بەلگىلەنۋىنە, ارزانداتىلعان ديزەلدىك وتىندى جانە مينەرالدىق تىڭايتقىشتاردى بولۋگە قاتىستى سۇراقتارىن قويىپ, ولارعا جان-جاقتى جاۋاپ الدى.
ومىرزاق شوكەەۆ «جاكە» شارۋا قوجالىعىن ۇلگى قىلا وتىرىپ, قاراعاندىلىقتاردى «زاكىرلىك» كووپەراتسيالاردى دامىتۋعا شاقىردى. سونىمەن قاتار ول اگرارلىق قولحاتتار جانە بىرىڭعاي اگرارلىق سالىق قۇرۋ يدەياسى تۋرالى دا ءوزىنىڭ وي-پىكىرىن ءبىلدىردى.
كەزدەسۋدىڭ سوڭىندا وبلىس اكىمى ەرلان قوشانوۆ ۆيتسە-پرەمەر – اۋىل شارۋاشىلىق ءمينيسترى ومىرزاق شوكەەۆكە بۇكپەسىز جانە ناتيجەلى اڭگىمە ءۇشىن العىسىن ءبىلدىردى.
قايرات ءابىلدا,
«ەگەمەن قازاقستان»
قاراعاندى وبلىسى