اقتوبە قالاسىندا مەملەكەت-جەكەمەنشىك ارىپتەستىگى اياسىندا مۇز سارايى سالىنىپ, پايدالانۋعا بەرىلدى. ونىڭ جالپى قۇنى – 3,7 ميلليارد تەڭگە. مۇنداعى باستى ينۆەستور الەمنىڭ وتىزدان استام ەلىندە مۇز سارايىن سالىپ, مول تاجىريبە جيناقتاعان سلوۆاكيالىق كومپانيا بولىپ وتىر.
اقتوبەدەگى كەلىستى كەشەن – ولاردىڭ قازاقستانداعى العاشقى جوباسى. اتالعان ارەنا الەمدىك ستاندارتتار مەن تەحنولوگيالارعا تولىقتاي سايكەس كەلەدى. سوندىقتان مۇز سارايىندا الەم چەمپيوناتتارىن وتكىزۋگە دە ابدەن بولادى. سلوۆاكيالىق ينۆەستورلاردىڭ تاعى ءبىر ارتىقشىلىعى قۇرىلىسقا قاجەتتى قۇرالداردى وزدەرى ءوندىرىپ, وزدەرى شىعاراتىنىندا. كەشەنگە ورناتىلعان جابدىقتار مۇز تەمپەراتۋراسىن قالىپتى ۇستاپ تۇرۋعا مۇمكىندىك بەرەدى.
مۇز الاڭى نەگىزىنەن حوككەيدەن جارىستار وتكىزۋگە ارنالعانىمەن, مۇندا سونىمەن بىرگە مانەرلەپ سىرعاناۋ سەكىلدى مۇز ۇستىندە وينالاتىن سپورتتىڭ بارلىق ءتۇرىن ءارى ءارتۇرلى ويىن-ساۋىق شارالارىن وتكىزۋگە تولىق جاعداي بار. 3000-عا جۋىق كورەرمەنگە ارنالعان كەلىستى سپورت كەشەنىنىڭ جالپى اۋماعى 8500 شارشى مەتر. سونداي-اق ونىڭ قۇرامىنا ءماجىلىس پەن جاتتىعۋ زالدارى, كەڭسەلەر, سپورت تاۋارلارى دۇكەنى مەن قوعامدىق تاماقتاندىرۋ جۇيەسى كىرەدى.
مۇز سپورت سارايىنىڭ ەسىگى تەك كاسىبي سپورتشىلار ءۇشىن عانا ەمەس, سونىمەن بىرگە اۋەسقويلار جانە حوككەيمەن جاپپاي اينالىسۋشىلارعا دا ايقارا اشىق. اتالعان كەشەننىڭ ىسكە قوسىلۋىنا بايلانىستى تاعى ءبىر ايتا كەتەرلىك ماسەلە, وسى ارقىلى اقتوبەلىكتەر قازاقستاننىڭ جاستار حوككەي ليگاسىنا قاتىسۋعا مۇمكىندىك الىپ وتىر. بۇعان جاڭادان قۇرىلعان «اقتوبە» حوككەي كومانداسى بەرىك نەگىز قالايدى. وسى ماقساتتا قازاقستاننىڭ ءۇش دۇركىن چەمپيونى, بۇعان دەيىن «ەرتىس» حوككەي كومانداسىن جاتتىقتىرىپ كەلگەن يۋليۋس پەنزەس شاقىرىلعان.
تەمىر قۇسايىن,
«ەگەمەن قازاقستان»
اقتوبە