بۇگىندە الەمنىڭ يتاليا, فرانتسيا, قىتاي, رەسەي, وزبەكستان, گوللانديا سياقتى 19 مەملەكەتىنەن كەلگەن تۋريستەر جامبىل ءوڭىرىنىڭ تاريحي جەرلەرىن ارالاپ, ولاردىڭ تاريحىمەن تانىسۋدا.
ءتىپتى ورتاعاسىرلىق اقىرتاس كەشەنى, اڭىزعا تولى ايشا ءبيبى كەسەنەسى سەكىلدى تاريحي نىساندارعا قىزىعۋشىلىق تانىتقاندارى دا كوپ. بۇل رەتتە شەتەلدىكتەرگە حالقىمىزدىڭ سان عاسىرلىق سالت-ءداستۇرىن ناسيحاتتاۋ ماقساتىندا «تورتكۇل» كەرۋەن سارايىندا «قازاق اۋىلى» ەتنوجوباسى قولعا الىندى. شەتەلدىكتەر اتالعان ەتنوجوبامەن, ۇلتىمىزدىڭ ۇلى قۇندىلىقتارىمەن دە تانىستى. جيىندا جامبىل وبلىسى اكىمىنىڭ كەڭەسشىسى اسلان سارجان ۇلى ءسوز الىپ, كونە تاراز جەرىندە «رۋحاني جاڭعىرۋ» باعدارلاماسى اياسىندا «قازاق اۋىلى» ەتنوجوباسى تۇڭعىش رەت ۇيىمداستىرىلىپ وتىرعانىن, بۇل ولكەدە تالاي قايراتكەر دۇنيەگە كەلىپ, تاربيەلەنگەندىگىن اتاپ ءوتتى.
«قازاق اۋىلى» ەتنوجوباسىنىڭ اشىلۋ سالتاناتىندا قازاق مۋزىكالىق جانە تەاتر ونەرىنىڭ فەستيۆالدارى, جەرگىلىكتى قولونەرشىلەردىڭ شەبەرلىك دارىستەرى, ۇلتتىق تاعامدار, قولونەر جانە كوركەمونەر كورمەلەرى, ەتنوستىق مۋزىكالىق فەستيۆالدار ۇيىمداستىرىلدى. ال ۇلتتىق سپورت تۇرلەرىنەن وتكەن جارىستار حالقىمىزدىڭ ەجەلدەن ەرجۇرەك, باتىر ەل ەكەنىن شەتەلدىكتەردىڭ الدىندا ايعاقتاپ تۇرعانداي ەدى. سونىمەن قاتار شەتەلدىك تۋريستەر ء«داستۇرلى اڭ اۋلاۋ تۇرلەرى», «ۇلتتىق ويىندار», «ۇلتتىق تاعام», «قازاق مۋزىكالىق-تەاتر ونەرى» جانە «قولونەرشىلەر» سەكتورلارىنان قازاق ۇلتىنىڭ وزىنە ءتان ەرەكشەلىگىن كورىپ, ريزاشىلىعىن ءبىلدىردى. جەرگىلىكتى قولونەر شەبەرلەرىنىڭ قولىنان شىققان تۇرمىستىق بۇيىمدارعا دا ەرەكشە قىزىعۋشىلىق تانىتتى.
حاميت ەسامان,
«ەگەمەن قازاقستان»
جامبىل وبلىسى