وبلىس ورتالىعىنداعى «قۇلاگەر» يپپودرومىندا ۇلتتىق ات سپورتىنىڭ بيىلعى ماۋسىمى اياقتالدى. ات جارىسىنا اقمولا, قاراعاندى, شىعىس قازاقستان جانە پاۆلودار وبلىستارىنىڭ شاباندوزدارى قاتىستى. الامان بايگە 24 شاقىرىمعا, توق بايگە 8 شاقىرىم, ۇشقىر بايگە 2, 4 شاقىرىم قاشىقتىققا ارنالدى.
قالالىق سپورت جانە دەنە شىنىقتىرۋ ءبولىمىنىڭ مالىمەتىنشە, جۇلدەگە ۇلتتىق ات سپورتىنا دەمەۋشى كاسىپكەرلەر 3 اۆتوكولىك جانە 2 موتوتسيكل تىككەن.
الامان جارىستىڭ قورىتىندىسىندا باياناۋىلدىق ءامىر نىعمانوۆتىڭ «مۋدرىي سوكرات» اتتى اتى ۇشقان قۇستاي الدا كەلدى. باپكەرى ميحايل جەكسەنباەۆ, شاباندوزى-ۆلاد نيناشوۆ.
ەكىباستۇزدىق ميراس تىلەۋبەرلى, شىعىس قازاقستان وبلىسىنىڭ كەلگەن عادىلبەك سەرىكبولدىڭ جۇيرىكتەرى مارەگە ەكىنشى جانە ءۇشىنشى بولىپ جەتتى. ۇشقىر بايگەنىڭ جۇلدەسىن بولات قوجامسەيىتتىڭ «پرەسانەللا» جەڭىپ الدى. قۇنان جارىسى بويىنشا, اقساقوۆتىڭ «وبريگاداسى» مارەگە ءبىرىنشى جەتتى. توق بايگەنىڭ جەڭىمپازى «بايسارى» اتالاتىن تۇلپار.
بۇل كۇنى اۋدارىسپاق ويىندارىنان دا قىزۋ باسەكە دوداسى ءوتتى. ويىننىڭ جەڭىمپازدارى مەن جۇلدەگەرلەرى اقشالاي سىيلىقپەن ماراپاتتالدى. پاۆلودارلىق شاباندوزدار استانادا وتكەن « ۇلى دالا رۋحى» فەستيۆالىندە اۋدارىسپاقتان ەكىنشى ورىن الىپتى.
وبلىستىق ات سپورتى جارىسىنىڭ اعا جاتتىقتىرۋشىسى جاسۇلان اليەۆتىڭ ايتۋىنشا, وبلىستا بيىل 3 رەت ات بايگەسى وتكەن. قازىر ايبىن ۋاحيتوۆ, مۇرات اعجان, باعدات اسقار سياقتى سپورتشىلار كەلەسى جىلى بولاتىن ات سپورتى جارىستارىنا دايىندىقتى باستاپ كەتىپتى.
فاريدا بىقاي,
«ەگەمەن قازاقستان»
پاۆلودار
سۋرەتتى تۇسىرگەن : ۆالەري بۋگاەۆ