رۋدنىيدا ERG كاسىپورىندارىنىڭ ماماندارى اراسىندا جارىس ءوتتى

بايقاۋدا جەتى اتالىم بويىنشا «قازاقستان ءاليۋمينيى» اق (پاۆلودار ق.), «قازاقستاندىق ەلەكتروليز زاۋىتى» (پاۆلودار ق.), «ەۆروازياتتىق ەنەرگەتيكالىق كورپوراتسيا» (اقسۋ ق., پاۆلودار وبلىسى), «قازحروم تۇك» (اقسۋ, اقتوبە جانە حرومتاۋ ق.), «شۇباركول كومىر» (قاراعاندى ق.), «3-ەنەرگوورتالىق» (شىمكەنت ق.), ERG Service (پاۆلودار ق.), «سسكوب» (رۋدنىي ق.) جانە «ترانسكوم» جشس (الماتى) وكىلدەرى باق سىنادى.

وزدەرىنىڭ كاسىبي شەبەرلىكتەرىن كوپىرلى كران ماشينيستەرى, ەلەكتر-گازبەن دانەكەرلەۋشىلەر, ەلەكتر جوندەۋشىلەرى, ەكسكاۆاتور, بۋلدوزەر جانە اۆتوساموسۆال ماشينيستەرى كورسەتتى. بايقاۋعا تۇڭعىش رەت جول مونتەرلارى اراسىندا جارىستىڭ كوماندالىق ءتۇرى ەنگىزىلدى. بۇل كەزەڭگە ەۋرازيالىق توپتىڭ بەس ديۆيزيونى قاتىستى. قۇرامىندا ءتورت مامانى بار بريگادالار جۇمىستى بەرىلگەن تاپسىرما بويىنشا اتقاردى. «التىن قور-2018» 50-دەن استام ۇمىتكەردىڭ باسىن بىرىكتىردى. ولاردىڭ بارلىعى جىل بويى توپ كاسىپورىندارىندا ۇيىمداستىرىلعان ىرىكتەۋ كەزەڭدەرىن سۇرىنبەي وتكەن.

قاتىسۋشىلار مەن بايقاۋ كوميسسياسى وكىلدەرىنىڭ ءبىرىنشى باس قوسۋى «سسكوب» اق كادرلاردى وقىتىپ دايارلاۋ ورتالىعىنىڭ اكت زالىندا ءوتتى. ءدال وسى جەردە «التىن قور-2018» بايقاۋى سالتاناتتى تۇردە اشىلدى. وندا جينالعانداردى ەۋرازيالىق توپتىڭ الەۋمەتتىك جوبالار دەپارتامەنتىنىڭ ديرەكتورى ۆلاديسلاۆ ميحايلوۆ قۇتتىقتادى.

«مۇندا ءوز ءىسىنىڭ ناعىز ماماندارى كەلىپ وتىر. سىزدەر – ەۋرازيالىق توپ ۇجىمىنىڭ ەڭ ۇزدىك وكىلىسىزدەر. «التىن قور-2018» بايقاۋىنىڭ قاتىسۋشىلارى, ەڭ الدىمەن, كومپانيانىڭ جاڭا ماقساتتارىن جۇزەگە اسىرۋشىلار, ءارى تىرەگى. جاستار سىزدەرگە قاراپ, ۇلگى الادى. بۇگىن   مەن ەرتەڭگى كۇنگە باعا بەرسەك, ERG-ءدىڭ بولاشاعى زور. ول بولاشاققا سىزدەردىڭ تاجىريبەلەرىڭىزدىڭ ارقاسىندا عانا قول جەتكىزە الامىز. مەن بارلىق قاتىسۋشىلارعا تابىس, ساتتىلىك جانە جەڭىس تىلەيمىن», دەدى ۆلاديسلاۆ ميحايلوۆ.

جارىستار ەكى كەزەڭنەن تۇردى: ءبىرىنشى كۇن جارىسقا قاتىسۋشىلاردىڭ تەوريالىق بىلىمدەرىن تەكسەرۋگە ارنالسا, ەكىنشى كۇنى پراكتيكالىق داعدىلارى سىنالدى. ۇسىنىلعان تاپسىرمالاردىڭ ءاربىرى قاتىسۋشىلاردىڭ جيناقىلىعىن, كاسىبي شەبەرلىگىن, ماقساتكەرلىگى مەن جاۋاپكەرشىلىگىن تالاپ ەتتى. ويتكەنى ءدال وسى قاسيەتتەر ەۋرازيالىق توپتىڭ باستى قۇندىلىقتارى سانالادى.

«بۇل مەنىڭ العاشقى كاسىبي شەبەرلىك بايقاۋىم. جارىستىڭ ءاربىر قاتىسۋشىسى – ءوز ءىسىنىڭ شەبەرى. قوبالجۋ, ارينە, بولدى. الايدا جاقسى ناتيجە كورسەتۋگە دەگەن ۇمتىلىسىم ودان باسىم بولدى. وسىلايشا ءبىلىم مەن تاجىريبەمنىڭ ارقاسىندا بارلىق سۇراقتارعا ءبىرىنشى بولىپ جاۋاپ بەردىم» دەيدى تەوريالىق كەزەڭدى ارتقا تاستاعان اقتوبە فەرروقورىتپا زاۋىتىنىڭ كران ءماشينيسى ەدۋارد كەپپەل.

«وسىنداي بايقاۋلاردىڭ ءبىز ءۇشىن ءمانى بولەك. ولار شەبەرلىك داعدىلارىمىزدى دامىتا تۇسۋگە ىنتالاندىرادى. ءوز كاسىپورنىڭنىڭ نامىسىن قورعاۋ – ۇلكەن جاۋاپكەرشىلىك. ويتكەنى بۇكىل ۇجىمنىڭ ايناسىسىڭ. سول سەبەپتى ۋايىمدى ۇمىتىپ, ۇزدىك بولۋعا ۇمتىلۋ كەرەك» دەيدى پراكتيكالىق كەزەڭنەن سۇرىنبەي وتكەن ERG Service كومپانياسىنىڭ كوپىرلىك كران ءماشينيسى تاتيانا اكيلوۆا.

«التىن قور-2018» بايقاۋىنىڭ سوڭعى نۇكتەسى «گورنياك» مادەني ويىن-ساۋىق ورتالىعىندا قويىلدى. جەڭىمپازداردى ماراپاتتاۋ سالتاناتىندا قاتىسۋشىلاردىڭ تاراپىنا كوپتەگەن جىلى سوزدەر مەن قۇتتىقتاۋلار ايتىلدى. ەۋرازيالىق توپ باسشىلىعىنىڭ شەشىمى بويىنشا ءۇشىنشى ورىن العاندار 150 000 تەڭگە كولەمىندەگى اقشالاي سىيلىققا يە بولدى. ەكىنشى ورىنعا 200 000 تەڭگە تاعايىندالسا, جەڭىمپازدارعا 250 000 تەڭگە تابىستالدى. كاسىبيلىك, بايسالدىلىق پەن تاپسىرمالاردى ورىنداۋدا ۇزدىك ناتيجە كورسەتكەندەر ەڭ جوعارى ماراپاتقا يە بولدى. ولار: ساموسۆال جۇرگىزۋشىسى ۆيتالي گۋپالوۆ («سسكوب »اق), بۋلدوزەر ءماشينيسى سەرىك دابىسوۆ («قازحروم تۇك» اق), ەكسكاۆاتور ءماشينيسى سەرگەي فريدريح («ەەك» اق), كران ءماشينيسى ماريا گورياچەۆا («قازاقستان ءاليۋمينيى»), ەلەكتر-گازبەن دانەكەرلەۋشى يۋري گراچەۆ («سسكوب» اق), ەلەكتر جوندەۋشى الەكساندر زاگۋرا («سسكوب» اق). باي    قاۋدىڭ «قاناتقاقتى» كەزەڭىندە سسكوب-تىڭ جول مونتەرلارى – قۇرامىندا الەكسەي شەينوگا, جاڭابەك وماروۆ, ءجۇنىس اقتاۋوۆ بار بريگادا جەڭىستىڭ تۇعىرىنان كورىندى.

ءنازيرا جارىمبەت,

«ەگەمەن قازاقستان»

قوستاناي